ಗದಗ: ಕೊರೊನಾ ರೋಗಿಗಳಿಗೆ ಅಂತಾನೇ ಜಿಲ್ಲೆಯ ಜಿಮ್ಸ್ ಆಸ್ಪತ್ರೆಯಲ್ಲಿ ಕೋವಿಡ್ ಸೆಂಟರ್ ತೆರೆಯಲಾಗಿದೆ. ಆದರೂ ಕೂಡಾ ಇಲ್ಲಿ ಸರಿಯಾಗಿ ಚಿಕಿತ್ಸೆ ನೀಡುತ್ತಿಲ್ಲ ಎಂಬುದು ಸೋಂಕಿತರೊಬ್ಬರ ಸಹೋದರಿ ವಿಡಿಯೋವೊಂದನ್ನು ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಮಾಡಿದ್ದರು. ಆಕೆಯೂ ಕೂಡಾ ಸೋಂಕಿತೆಯಾಗಿದ್ದು, ಮೂರು ದಿನದಿಂದ ತನ್ನ ಸಹೋದರ ಉಸಿರಾಟ ಸಮಸ್ಯೆಯಿಂದ ಬಳಲುತ್ತಿದ್ದರೂ ವೆಂಟಿಲೇಟರ್ ಅಳವಡಿಸದೇ ವೈದ್ಯರು ನಿರ್ಲಕ್ಷ್ಯ ತೋರುತ್ತಿದ್ದಾರೆ ಎಂದು ಆರೋಪ ಮಾಡಿದ್ದಳು.
ಈ ಆರೋಪಕ್ಕೆ ಪ್ರತಿಕ್ರಿಯೆ ನೀಡಿರುವ ಜಿಮ್ಸ್ ನಿರ್ದೇಶಕ ಪಿ.ಎಸ್.ಭೂಸರೆಡ್ಡಿ ನಮ್ಮಲ್ಲಿ ವೆಂಟಿಲೇಟರ್ಗಳಿಗೆ ಯಾವುದೇ ಸಮಸ್ಯೆ ಇಲ್ಲ. ರೋಗಿಯ ದೈಹಿಕ ಅವಶ್ಯಕತೆಗನುಗುಣವಾಗಿ ವೆಂಟಿಲೇಟರ್ ಅಳವಡಿಸಲಾಗುತ್ತದೆ. ರೋಗಿಗೆ ಯಾವಾಗ?, ಯಾವ ಬಗೆಯ ಚಿಕಿತ್ಸೆ ನೀಡಬೇಕು? ಎಂಬುದನ್ನು ವೈದ್ಯರು ನಿರ್ಧಾರ ಮಾಡುತ್ತಾರೆ. ನಮ್ಮಲ್ಲಿ ಯಾವುದೇ ಬಗೆಯ ವೆಂಟಿಲೇಟರ್ ಕೊರತೆಯಿಲ್ಲ ಎಂದಿದ್ದಾರೆ.
ಇದನ್ನೂ ಓದಿ: ಜಿಮ್ಸ್ನಲ್ಲಿ ಕೊರೊನಾ ಸೋಂಕಿತನ ನರಳಾಟ: ವೈದ್ಯರ ನಿರ್ಲಕ್ಷ್ಯ ಆರೋಪ
ಇನ್ನು ಸೋಂಕಿತ ವ್ಯಕ್ತಿ ನರಗುಂದ ಪಟ್ಟಣದಲ್ಲಿ ಬಸ್ ಕಂಡಕ್ಟರ್ ಆಗಿ ಕೆಲಸ ನಿರ್ವಹಿಸುತ್ತಿದ್ದನು. ಈತನಿಂದ ಮೂರು ಮಕ್ಕಳೂ ಸೇರಿ ಕುಟುಂಬದ ಏಳು ಮಂದಿ ಹಾಗೂ ಅಕ್ಕಪಕದವರೂ ಸೇರಿ ಒಟ್ಟು 11 ಜನರಿಗೆ ಸೋಂಕು ಹರಡಿತ್ತು. ನಂತರ ಈತನನ್ನು ಗದಗ್ ಕೋವಿಡ್ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿತ್ತು. ಈ ವೇಳೆ ಆತನ ಸಹೋದರಿ ವೈದ್ಯರು ಸರಿಯಾಗಿ ಚಿಕಿತ್ಸೆ ನೀಡುತ್ತಿಲ್ಲ ಎಂದು ಆರೋಪಿಸಿ, ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಮಾಡಿದ್ದಳು.
ಜಿಮ್ಸ್ ನಿರ್ದೇಶಕರ ಪ್ರಕಾರ ಉಸಿರಾಟದ ಸಮಸ್ಯೆಯಿರುವ ಇನ್ನೂ ಇಪ್ಪತ್ತು ಜನ ರೋಗಿಗಳು ದಾಖಲಾದರೂ ಅವರಿಗೆ ಸೂಕ್ತ ವ್ಯವಸ್ಥೆ ಇದೆ. ಆದರೆ ವಿಡಿಯೋದಲ್ಲಿರುವುದು ಸತ್ಯವೋ..? ಅಥವಾ ಜಿಮ್ಸ್ ನಿರ್ದೇಶಕರು ಹೇಳುವುದು ಸತ್ಯವೊ..? ಎಂಬುದು ಇನ್ನು ಮುಂದಷ್ಟೇ ಗೊತ್ತಾಗಬೇಕಿದೆ.
