ಹುಬ್ಬಳ್ಳಿ : ಸಾಮಾಜಿಕ ಜಾಲತಾಣದಲ್ಲಿ ಹಲವು ಚಾಲೆಂಜ್ಗಳು ಆಗಾಗ ಸದ್ದು ಮಾಡುವುದೇನೂ ಹೊಸತಲ್ಲ. ಸದ್ಯ ಫೇಸ್‌ಬುಕ್ನಲ್ಲಿ ಬಗೆಬಗೆ ಚಾಲೆಂಜ್ಗಳು ಟ್ರೆಂಡ್ ಕ್ರಿಯೇಟ್ ಮಾಡಿವೆ.
ಕಪಲ್ ಚಾಲೆಂಜ್, ಸಿಂಗಲ್ ಚಾಲೆಂಜ್, ಮದರ್ ಚಾಲೆಂಜ್ ಹೀಗೆ.. ಸಾಕಷ್ಟು ಚಾಲೆಂಜ್ಗಳು ಹವಾ ಸೃಷ್ಟಿಸಿವೆ. ಅದೇ ರೀತಿ ಇಲ್ಲಿನ ಕಾಂಗ್ರೆಸ್ ಮುಖಂಡ ರಜತ್ ಉಳ್ಳಾಗಡ್ಡಿಮಠ ವಿಭಿನ್ನ ರೀತಿಯ ಚಾಲೆಂಜ್ ಆರಂಭಿಸಿ ನಗರದ ಜನತೆಯ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ನಗರದಲ್ಲಿ ಗುಂಡಿ ಬಿದ್ದ ರಸ್ತೆಗಳ ಫೋಟೋಗಳನ್ನು ಫೇಸ್‌ಬುಕ್ನಲ್ಲಿ ಶೇರ್ ಮಾಡಿ ಚಾಲೆಂಜ್ ಮಾಡುತ್ತಿರುವ ರಜತ್ ಉಳ್ಳಾಗಡ್ಡಿಮಠ ಅವರ ಚಾಲೆಂಜ್ಗೆ ಹುಬ್ಬಳ್ಳಿ-ಧಾರವಾಡ ಜನತೆ ಸ್ಪಂದಿಸಿದ್ದಾರೆ.
ಹುಬ್ಬಳ್ಳಿ ಸ್ಮಾರ್ಟ್ ಸಿಟಿಗೆ ಒಳಪಟ್ಟಿದ್ದರು ಕೂಡ ಇಲ್ಲಿನ ರಸ್ತೆಗಳು ಸ್ಮಾರ್ಟ್ ಆಗದೇ ಇನ್ನಷ್ಟು ಹದಗೆಟ್ಟಿವೆ. ಈ ಬಗ್ಗೆ ಜನಸಾಮಾನ್ಯರು ಸಾಕಷ್ಟು ಬಾರಿ ಮನವಿ ಮಾಡಿಕೊಂಡರು ಅಧಿಕಾರಿಗಳು, ಜನಪ್ರತಿನಿಧಿಗಳು ಮಾತ್ರ ಎಚ್ಚೆತ್ತಿಲ್ಲ.
ಪರಿಣಾಮ ನಗರದ ರಸ್ತೆಗಳ ಪರಿಸ್ಥಿತಿ ಹೇಳತೀರದಾಗಿದೆ. ನಿತ್ಯ ಶಪಿಸುತ್ತಾ ಓಡಾಡುವಂತಾಗಿದೆ. ಕಲಘಟಗಿ, ನವಲಗುಂದ, ಕುಂದಗೋಳ ತಾಲೂಕುಗಳ ನೂರಾರು ಜನ ಹುಬ್ಬಳ್ಳಿ ಮೇಲೆಯೇ ಹೆಚ್ಚಾಗಿ ಓಡಾಡಬೇಕು.
ಸಂಚಾರ ದುಸ್ಥರವಾಗಿದ್ದು, ರಸ್ತೆಗಳ ಗುಂಡಿ ನೋಡಿ ಹೈರಾಣಾಗಿದ್ದಾರೆ. ರಸ್ತೆಗಳಲ್ಲಿ ಗುಂಡಿ ಬಿದ್ದಿದ್ದರಿಂದ ಅಪಘಾತಗಳು ಸಹ ಹೆಚ್ಚಾಗುತ್ತಿವೆ.
ಈ ಹಿನ್ನೆಲೆಯಲ್ಲಿ ಸ್ಥಳೀಯ ಜನಪ್ರತಿನಿಧಿಗಳ ಗಮನ ಸೆಳೆಯಲು ಕಾಂಗ್ರೆಸ್ ಮುಖಂಡ ರಜತ್ ಅವರು ಸಾಮಾಜಿಕ ಜಾಲತಾಣ ಮೊರೆ ಹೋಗುವ ಮೂಲಕ ಈ ರೀತಿಯ ಚಾಲೆಂಜ್ ಆರಂಭಿಸಿದ್ದಾರೆ. ಈ ವಿನೂತನ ಪ್ರತಿಭಟನೆ ಇದೀಗ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ.
