ಹುಬ್ಬಳ್ಳಿ : ಮಕ್ಕಳಿಗೆ ಗುಣಮಟ್ಟದ ಶಿಕ್ಷಣದ ಜತೆಗೆ ಗುಣಮಟ್ಟದ ಆಹಾರ ನೀಡುವ ಬಿಸಿಯೂಟದ ಯೋಜನೆ ಈಗ ಮರೆಯಾಗಿದೆ. ಕೊರೊನಾ ಕಾಟದಿಂದ ಶಾಲೆಗಳಿಗೆ ಬೀಗ ಬಿದ್ದಿದೆ. ಆದ್ರೆ, ಮಕ್ಕಳು ಪೌಷ್ಟಿಕ ಆಹಾರದಿಂದ ವಂಚಿತರಾಗಬಾರದು ಎಂಬ ದೃಷ್ಟಿಯಿಂದ ರಾಜ್ಯ ಸರ್ಕಾರ ಈಗ ಮಕ್ಕಳ ಮನೆ ಬಾಗಿಲಿಗೆ ರೇಷನ್ ಒದಗಿಸುತ್ತಿದೆ.
ಈಗಾಗಲೇ ಸರ್ಕಾರದ ನಿರ್ದೇಶನದ ಮೇರೆಗೆ ಧಾರವಾಡ ಜಿಲ್ಲಾಡಳಿತ ದಾಸ್ತಾನು ಮಾಡಿರುವ ರೇಷನ್‌ನ ಮಕ್ಕಳಿಗೆ ನೀಡುತ್ತಿದೆ. ಒಂದರಿಂದ ಹತ್ತನೇ ತರಗತಿವರೆಗಿನ ಮಕ್ಕಳಿಗೆ ಎಷ್ಟು ರೇಷನ್ ವಿತರಣೆ ಮಾಡಬೇಕು ಎಂಬ ಸರ್ಕಾರದ ನಿರ್ದೇಶನದಂತೆ ಅಕ್ಕಿ, ಬೇಳೆ, ಎಣ್ಣೆ ಹಾಗೂ ಉಪ್ಪು ಸೇರಿದಂತೆ ಎಲ್ಲ ಆಹಾರ ಪದಾರ್ಥಗಳನ್ನು ಮಕ್ಕಳ ಪೋಷಕರಿಗೆ ವಿತರಿಸಲಾಗುತ್ತಿದೆ.
ಸುಮಾರು ದಿನಗಳಿಂದ ಶಾಲೆಗಳು ಬಂದ್ ಆಗಿರುವ ಹಿನ್ನೆಲೆ, ಮಕ್ಕಳ ಬಿಸಿಯೂಟಕ್ಕೆ ದಾಸ್ತಾನು ಮಾಡಿರುವ ಆಹಾರ ಉತ್ಪನ್ನಗಳನ್ನು ಮಕ್ಕಳಿಗೆ ನೀಡುವ ಮೂಲಕ ಬಿಸಿಯೂಟದ ಯೋಜನೆ ಸೌಲಭ್ಯಗಳನ್ನು ಮಕ್ಕಳು ಮನೆಯಲ್ಲಿಯಿಂದಲೇ ಪಡೆದುಕೊಳ್ಳಬಹುದು. ಅವರವರ ವಯೋಮಾನಕ್ಕೆ ತಕ್ಕಂತೆ ಆಹಾರ ಧಾನ್ಯ ವಿತರಣೆ ಮಾಡಲಾಗುತ್ತಿದೆ.
ಇದನ್ನೂ ಓದಿ: ಕೋವಿಡ್ನಿಂದ ರಾಜಧಾನಿಯಲ್ಲಿ ಕೊಂಚ ಕಡಿಮೆಯಾಯ್ತು ಅಗ್ನಿ ಅವಘಡಗಳು
132 ದಿನದ ಬಿಸಿಯೂಟದ ರೇಷನ್ ಅನ್ನು ಈಗಾಗಲೇ ಮಕ್ಕಳಿಗೆ ನೀಡುತ್ತಿದ್ದು, ಪಾಲಕರು ಶಾಲೆಗೆ ಭೇಟಿ ನೀಡಿ ಪಡೆಯುತ್ತಿದ್ದಾರೆ.
