ಮಧ್ಯರಾತ್ರಿ ರಕ್ತದಾನ: ಹುಬ್ಬಳ್ಳಿಯಲ್ಲಿ ಬಾಲಕನ ಜೀವ ಉಳಿಸಿದ ಆ್ಯಂಬುಲೆನ್ಸ್ ಚಾಲಕ!

ಸಾವು-ಬದುಕಿನ ನಡುವೆ ಹೋರಾಟ ನಡೆಸುತ್ತಿದ್ದ ಬಾಲಕನಿಗೆ ಆ್ಯಂಬುಲೆನ್ಸ್​ ಚಾಲಕ ಮಧ್ಯರಾತ್ರಿ ರಕ್ತದಾನ ಮಾಡಿ ಜೀವ ಉಳಿಸಿದ್ದಾರೆ.

ಹುಬ್ಬಳ್ಳಿ: ಕರ್ತವ್ಯನಿರತ ಆ್ಯಂಬುಲೆನ್ಸ್ ಚಾಲಕನ ಸಮಯ ಪ್ರಜ್ಞೆಯಿಂದ 12 ವರ್ಷದ ಬಾಲಕ ಮರುಜೀವ ಪಡೆದಿದ್ದಾನೆ. ಚಾಲಕನ ಕಾರ್ಯಕ್ಕೆ ಎಲ್ಲೆಡೆ ಪ್ರಶಂಸೆ ವ್ಯಕ್ತವಾಗಿದೆ.

ಬಾಲಕ ರಾಹುಲ್ ಡೆಂಗ್ಯೂ ಜ್ವರದಿಂದ ಬಳಲುತ್ತಿದ್ದ. ಆತನನ್ನು ಇಲ್ಲಿನ ಸ್ಪರ್ಶ ಆಸ್ಪತ್ರೆಗೆ ದಾಖಲಾಗಿಸಿತ್ತು. ಪ್ಲೇಟ್​​ಲೆಟ್ಸ್​​ ಕೇವಲ 20,000ಕ್ಕಿಂತ ಕಡಿಮೆಯಾಗಿ ತುರ್ತಾಗಿ ಒಂದು ಯೂನಿಟ್ O + ve ಪ್ಲೇಟ್​​ಲೆಟ್ಸ್​​ (SDP) ಬೇಕಾಗಿತ್ತು.

ಲಾಕ್​​​​​ಡೌನ್ ಹಿನ್ನೆಲೆ ರಕ್ತ ಸಂಗ್ರಹ ಇಲ್ಲದ್ದರಿಂದ ಸಮಸ್ಯೆಯಾಗಿತ್ತು. ಸಮಯ ರಾತ್ರಿ 12 ಆಗಿದ್ದರ ಪರಿಣಾಮ ರಕ್ತ ಸಿಗುವುದು ಕಷ್ಟವಾಗಿತ್ತು. ಆಗ ಕರ್ತವ್ಯದಲ್ಲಿದ್ದ ಲೈಫ್ ಲೈನ್ 24x7 ಆಸ್ಪತ್ರೆಯ ಆ್ಯಂಬುಲೆನ್ಸ್​​​​​ಚಾಲಕ ನಿಂಗಪ್ಪ ಹಂಗರಕಿ (ಬ್ಯಾಹಟ್ಟಿ ಗ್ರಾಮದವರು) ರಕ್ತದಾನ ಮಾಡಿ ಬಾಲಕನ ಜೀವ ಉಳಿಸಿದ್ದಾರೆ.