ದಾವಣಗೆರೆ: ಕೊರೊನಾ ಸೋಂಕು ಹರಡುವುದನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಕೋವಿಡ್-19 ಮೊಬೈಲ್ ಫೀವರ್ ಕ್ಲಿನಿಕ್ ಬಸ್ಗೆ ಇಂದು ನಗರದ ಕೆಎಸ್ಆರ್ಟಿಸಿ ಬಸ್ ನಿಲ್ದಾಣದಲ್ಲಿ ಸಾರಿಗೆ ಸಚಿವರಾದ ಡಿಸಿಎಂ ಲಕ್ಷ್ಮಣ್ ಸವದಿ ಚಾಲನೆ ನೀಡಿದರು.
ಕೊರೊನಾ ಸೋಂಕಿನ ಪ್ರಕರಣ ಹೆಚ್ಚಾಗುತ್ತಿರುವ ಜಿಲ್ಲೆಗಳಲ್ಲಿ ಮೊಬೈಲ್ ಫೀವರ್ ಕ್ಲಿನಿಕ್ ಬಸ್ ಅನ್ನು ಈಗಾಗಲೇ ಸೇವೆಗೆ ನೀಡಲಾಗಿದೆ. ಬೆಂಗಳೂರು ಸೇರಿದಂತೆ ಬೇರೆಡೆಗಳಲ್ಲಿ ಈಗಾಗಲೇ ಈ ಬಸ್ ಕಾರ್ಯ ನಿರ್ವಹಿಸುತ್ತಿದ್ದು, ಈಗ ದಾವಣಗೆರೆಯಲ್ಲಿಯೂ ಸಹ ಕಾರ್ಯ ನಿರ್ವಹಿಸಲಿದೆ.
ಈ ಬಸ್ ನ ವಿಶೇಷತೆಗಳೇನು...?
ಕ್ವಾರಂಟೈನ್ ಝೋನ್, ಹಳ್ಳಿ ಪ್ರದೇಶ ಸೇರಿದಂತೆ ಮನೆ ಮನೆಗೆ ತೆರಳಿ ಗಂಟಲು ದ್ರವ ಪರೀಕ್ಷೆ ಹಾಗೂ ಇನ್ನಿತರ ರೀತಿಯ ವ್ಯವಸ್ಥೆಯನ್ನು ಈ ಬಸ್ ನಲ್ಲಿ ಕಲ್ಪಿಸಲಾಗಿದೆ. ನಾಲ್ವರು ವೈದ್ಯಕೀಯ ಸಿಬ್ಬಂದಿ ಈ ಬಸ್ ನಲ್ಲಿ ಇರಬಹುದು. ಇಬ್ಬರು ವೈದ್ಯರು, ನರ್ಸ್ ಇರಲು ವ್ಯವಸ್ಥೆಯನ್ನು ಒಂದೆಡೆ ಮಾಡಿದ್ದರೆ, ಮತ್ತೊಂದೆಡೆ ಕೊರೊನಾ ಶಂಕಿತರ ಸ್ವ್ಯಾಬ್ ಪಡೆಯುವ ವ್ಯವಸ್ಥೆ ಕಲ್ಪಿಸಲಾಗಿದೆ. ಬಸ್ ಹತ್ತುತ್ತಿದ್ದಂತೆ ಕೈ ತೊಳೆದುಕೊಳ್ಳಲು ನೀರು, ಸ್ಯಾನಿಟೈಸರ್, ಮೆಡಿಕಲ್ ಕಿಟ್ , ಸಂವಾದ ನಡೆಸಲು ಮೈಕ್, ಲೈಟ್ಸ್, ಫ್ಯಾನ್ ಅನ್ನು ಅಳವಡಿಸಲಾಗಿದೆ. ಒಟ್ಟಿನಲ್ಲಿ ಆಸ್ಪತ್ರೆಗೆ ಹೋಗಿ ಗಂಟಲು ದ್ರವ ಪರೀಕ್ಷೆ ಮಾಡಿಸಿಕೊಳ್ಳುಲು ಕಷ್ಟ ಆಗುವವರಿಗೆ ಇದು ಅನುಕೂಲವಾಗಲಿದೆ.
