ಮಂಗಳೂರು ಹಿಂಸಾಚಾರ​ ಪ್ರಕರಣ: ನಾಳೆಯೂ ಶಾಲಾ ಕಾಲೇಜುಗಳು ಬಂದ್​

ಮಂಗಳೂರಲ್ಲಿ ಪ್ರತಿಭಟನೆ ಕಾವು ಇನ್ನೂ ಹಾಗೆ ಇರುವ ಈ ಹಿನ್ನೆಲೆ ನಾಳೆಯೂ ಶಾಲಾ ಕಾಲೇಜುಗಳಿಗೆ ರಜೆ ಘೋಷಣೆ ಮಾಡುವಂತೆ ಜಿಲ್ಲಾಧಿಕಾರಿ ಸಿಂಧು ಬಿ ರೂಪೇಶ್​ ಆದೇಶಿಸಿದ್ದಾರೆ.

ಮಂಗಳೂರು: ರಾಜ್ಯವನ್ನೇ ತಲ್ಲಣಗೊಳಿಸಿರುವ ಮಂಗಳೂರು ಹಿಂಸಾಚಾರ​ ಪ್ರಕರಣ ಸೂಕ್ಷ್ಮತೆಯನ್ನು ಪಡೆದುಕೊಳ್ಳುತ್ತಿದೆ.

ಗುರುವಾರ ಪ್ರತಿಭಟನೆ ವೇಳೆ ಮೃತಪಟ್ಟವರ ಅಂತ್ಯಕ್ರಿಯೆ ಇಂದು ನೆರವೇರಿದ್ದು, ಪ್ರತಿಭಟನೆಯ ಕಾವು ಹಾಗೂ ಹೋರಾಟಗಾರರ ಮನಸ್ಥಿತಿ ಬೂದಿ ಮುಚ್ಚಿದ ಕೆಂಡದಂತಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಏನಾದರೂ ವಿಷಯಗಳನ್ನು ವೈರಲ್​ ಮಾಡಿ ಕೋಮು ಪ್ರಚೋದನೆ ಮಾಡಬಹುದು ಎಂಬ ಉದ್ದೇಶದಿಂದ ಈಗಾಗಲೇ ಇಂಟರ್​ನೆಟ್​ ಬಂದ್​ ಮಾಡಲಾಗಿದೆ.

ಘಟನೆ ಹಿನ್ನೆಲೆ ನಾಳೆಯೂ ಕೂಡ ಶಾಲೆ, ಕಾಲೇಜು, ಬಾರ್​ ಆ್ಯಂಡ್​ ರೆಸ್ಟೋರೆಂಟ್ಸ್​, ವೈನ್​ ಶಾಪ್​​ಗಳನ್ನು ಬಂದ್​ ಮಾಡುವಂತೆ ಜಿಲ್ಲಾಧಿಕಾರಿ ಸಿಂಧು ಬಿ ರೂಪೇಶ್​ ಆದೇಶ ಹೊರಡಿಸಿದ್ದಾರೆ.

ಕಾಂಗ್ರೆಸ್​ ನಿಯೋಗವನ್ನೂ ಬಿಡದ ಪೊಲೀಸರು:

ಬೆಂಗಳೂರಿನಿಂದ ಕಾಂಗ್ರೆಸ್​ ನಿಯೋಗ ಮಂಗಳೂರಿನ ಸ್ಥಿತಿ ಗತಿ ವಿಚಾರಿಸಲು ಹಾಗೂ ಮೃತಪಟ್ಟವರ ಕುಟುಂಬಕ್ಕೆ ಸಾಂತ್ವಾನ ತುಂಬಲು ಆಗಮಿಸಿತ್ತಾದರೂ ಅವರನ್ನು ಪೊಲೀಸರು ವಿಮಾನ ನಿಲ್ದಾಣದಿಂದ ಹೊರಗಡೆ ಬಿಡಲೇ ಇಲ್ಲ. ಬೆಳಗ್ಗೆ 12 ಗಂಟೆಗೆ ಬಂದ ನಿಯೋಗ ಇದುವರೆಗೂ ವಿಮಾನನಿಲ್ದಾಣದಲ್ಲೇ ಇದ್ದು ಈಗ ಬೆಂಗಳೂರಿಗೆ ವಾಪಸ್​ ಆಗಿದೆ.