ಖಾದರ್ ಮಾತಾಡುವಾಗ ತಮ್ಮ ಸರ್ಕಾರ ಮಾಡಿದ್ದನ್ನು ಯೋಚಿಸಲಿ: ಕೋಟಾ ಶ್ರೀನಿವಾಸ ಪೂಜಾರಿ

ಖಾದರ್ ಅವರು ಈಗಿನ ಸರ್ಕಾರವನ್ನು ಟೀಕೆ ಮಾಡುವ ಮೊದಲು ತಮ್ಮ ಸರ್ಕಾರ ಮಾಡಿದ್ದನ್ನು ತಿಳಿದು ಮಾತನಾಡಲಿ ಎಂದು ಕೋಟಾ ಶ್ರೀನಿವಾಸ ಪೂಜಾರಿ ಹೇಳಿದ್ದಾರೆ.

ಮಂಗಳೂರು: ಮಾಜಿ ಸಚಿವ ಯು.ಟಿ.ಖಾದರ್ ಅವರು ಮಾತನಾಡುವಾಗ ತಮ್ಮ ಸರ್ಕಾರ ಇದ್ದಾಗ ಮಾಡಿದ್ದನ್ನು ಯೋಚಿಸಿ ಮಾತನಾಡಲಿ ಎಂದು ಸಚಿವ ಕೋಟಾ ಶ್ರೀನಿವಾಸ ಪೂಜಾರಿ ಹೇಳಿದ್ದಾರೆ.

ಮಂಗಳೂರಿನಲ್ಲಿ ಮಾತನಾಡಿದ ಅವರು, ಮಹಾರಾಷ್ಟ್ರ ಹೊರತುಪಡಿಸಿ ಉಳಿದ ರಾಜ್ಯಗಳಿಂದ ಬರುವವರಿಗೆ ಹೋಂ ಕ್ವಾರಂಟೈನ್ ಮಾಡಲಾಗುವುದು. ಮಹಾರಾಷ್ಟ್ರದಿಂದ ಬರುವವರಿಗೆ 7 ದಿನ ಸರ್ಕಾರಿ ಕ್ವಾರಂಟೈನ್ ಮಾಡಲಾಗುವುದು ಎಂದರು. ಮಾಜಿ ಸಚಿವ ಖಾದರ್ ಅವರು ಎರಡನ್ನೂ ಹೇಳುತ್ತಾರೆ. ಕ್ವಾರಂಟೈನ್ ಮಾಡದೆ ಬಿಡಿ ಎಂದು ಹೇಳುತ್ತಾರೆ. ಮನೆಗೆ ಕಳುಹಿಸಿದ ಬಳಿಕ ಪಾಸಿಟಿವ್ ಬಂದರೆ ಸರ್ಕಾರ ಕಾರಣ ಎನ್ನುತ್ತಾರೆ. ಲಾಕ್​ಡೌನ್ ಕಡ್ಡಾಯವಾಗಿ ಪಾಲಿಸಬೇಕು ಎನ್ನುತ್ತಾರೆ. ನಂತರ ತಾವೇ ಲಾಕ್​ಡೌನ್ ಮುರಿದು ಮನೆಗೆ ತಲುಪಿಸಿ ಮಾನವೀಯತೆ ಮೆರೆದೆ ಎನ್ನುತ್ತಾರೆ. ಖಾದರ್ ಅವರು ಈಗಿನ ಸರ್ಕಾರವನ್ನು ಟೀಕೆ ಮಾಡುವ ಮೊದಲು ತಮ್ಮ ಸರ್ಕಾರ ಮಾಡಿದ್ದನ್ನು ತಿಳಿದು ಮಾತನಾಡಲಿ ಎಂದು ಕಿವಿಮಾತು ಹೇಳಿದರು.