ಮಂಗಳೂರು: ಚುನಾವಣೆ ವಿಜಯೋತ್ಸವ ಸಂದರ್ಭ ಎಸ್ಡಿಪಿಐ ಸಂಘಟನೆಯವರು ಪಾಕಿಸ್ತಾನ ಪರ ಘೋಷಣೆ ಕೂಗಿರುವುದನ್ನು ಖಂಡಿಸಿ, ಸಂಘಟನೆಯನ್ನು ನಿಷೇಧಿಸಬೇಕೆಂದು ಬಿಜೆಪಿ ದ.ಕ. ಜಿಲ್ಲಾ ಮಹಿಳಾ ಮೋರ್ಚಾ ಹಾಗೂ ಯುವ ಮೋರ್ಚಾ ವತಿಯಿಂದ ಉಜಿರೆ ನಗರದ ಮಿನಿವಿಧಾನ ಸೌಧದ ಮುಂಭಾಗ ಪ್ರತಿಭಟನೆ ನಡೆಸಲಾಯಿತು.
ಬಿಜೆಪಿ ಮಹಿಳಾ ಮೋರ್ಚಾ ದ.ಕ. ಜಿಲ್ಲಾಧ್ಯಕ್ಷೆ ಮಾತನಾಡಿ, ಗ್ರಾಪಂ ಚುನಾವಣೆಯ ಸಂದರ್ಭದಲ್ಲಿ ಆಯಾ ಪಕ್ಷಗಳು ಸಂಭ್ರಮಾಚರಣೆ ಮಾಡೋದು ಸಹಜ. ಆದರೆ, ಎಸ್ಡಿಪಿಐ ಕಾರ್ಯಕರ್ತರು ಭಾರತದ ಭೂಮಿಯಲ್ಲಿದ್ದು ಇಲ್ಲಿನ ಗಾಳಿ, ನೀರು ಸೇವನೆ ಮಾಡಿ ಪಾಕ್ ಪರ ಘೋಷಣೆ ಕೂಗಿ ವಿಜಯೋತ್ಸವ ಆಚರಿಸಿರುವುದು ಖಂಡನೀಯ. ಈ ಮೂಲಕ ಅವರ ಮನೋದೌರ್ಬಲ್ಯವೇನು ಎಂದು ಈಗಾಗಲೇ ಜನತೆಗೆ ಅರ್ಥವಾಗಿದೆ. ಇಂತಹ ದುಷ್ಕೃತ್ಯವನ್ನು ಮಾಡಲು ಯತ್ನಿಸಿರುವ ಸಂಘಟನೆ ಇದೆ ಎಂದಾದಲ್ಲಿ ನಮ್ಮ ಯುವ ಜನತೆ ಯಾವ ದಾರಿ ಹಿಡಿಯಲಿದೆ ಎಂಬುದನ್ನು ನಾವೆಲ್ಲ ಊಹಿಸಿಕೊಳ್ಳಬಹುದು ಎಂದರು.
ಇತ್ತಿಚೆಗೆ ಜಿಲ್ಲಾಧಿಕಾರಿ ಕಚೇರಿ ಸಂಕೀರ್ಣದಲ್ಲಿರುವ ಸಂಸದರ ಕಚೇರಿಗೆ ಮುತ್ತಿಗೆ ಹಾಕಲು ಈ ಸಂಘಟನೆ ಯತ್ನಿಸಿತ್ತು. ಇವರಿಗೆ ಮುತ್ತಿಗೆ ಹಾಕುವುದರಲ್ಲಿ ಅಷ್ಟೊಂದು ಆಸಕ್ತಿಯಿದ್ದಲ್ಲಿ ಗಡಿಯಲ್ಲಿ ನುಸುಳುಕೋರರು ಬಾರದಂತೆ ಮುತ್ತಿಗೆ ಹಾಕಲಿ. ದೇಶ ವಿರೋಧಿ ಚಟುವಟಿಕೆಗಳ ಮೂಲಕ ಎಸ್ಡಿಪಿಐ ಪಕ್ಷದ ಬಲವರ್ಧನೆ ಮಾಡಬಹುದೆಂದು ನೀವು ಕನಸು ಕಂಡಲ್ಲಿ ಅದು ಖಂಡಿತ ನನಸಾಗೋದಿಲ್ಲ. ಇಂತಹ ಕೃತ್ಯಗಳಲ್ಲಿ ತೊಡಗಿಕೊಂಡವರು ಒಂದು ದಿನ ಕಾನೂನಿನ ಕೈಗೆ ಸಿಕ್ಕಿಹಾಕಿಕೊಳ್ಳಲಿದ್ದಾರೆ. ಪೀಪಿ ಊದಿ ಟೋಪಿ ಹಾಕಿದ ಕೂಡಲೇ ನೀವೇನು ಸುಭಗರಲ್ಲ. ಎಸ್ಡಿಪಿಐ ಬೆನ್ನಿಗೆ ಚೂರಿ ಹಾಕುವ ಸಂಘಟನೆ. ಭಯೋತ್ಪಾದಕರು, ಉಗ್ರವಾದಿಗಳನ್ನು ಎಲ್ಲೂ ಹುಡುಕಬೇಕೆಂದು ಇಲ್ಲ. ನಮ್ಮ ಸುತ್ತಲೂ ಪಾಪಾಸುಕಳ್ಳಿ ತರಹ ಹುಟ್ಟಿಕೊಳ್ಳುತ್ತಿದ್ದಾರೆ. ಆದ್ದರಿಂದ ಶೀಘ್ರವಾಗಿ ಸರಕಾರ ಹಾಗೂ ಕಾನೂನು ಎಸ್ಡಿಪಿಐ ಪಕ್ಷವನ್ನು ನಿಷೇಧಿಸಬೇಕು ಎಂದು ಧನಲಕ್ಷ್ಮೀ ಗಟ್ಟಿ ಹೇಳಿದರು.
ಉಜಿರೆಯಲ್ಲಿ ದೇಶದ್ರೋಹಿ ಘೋಷಣೆ ಕೂಗಿದ ಎಸ್ಡಿಪಿಐ ವಿರುದ್ಧ ವಿಶ್ವ ಹಿಂದೂ ಪರಿಷತ್, ಬೆಳ್ತಂಗಡಿ ಬಜರಂಗದಳದ ವತಿಯಿಂದ ಪೊಲೀಸ್ ವರಿಷ್ಠಾಧಿಕಾರಿಯವರಿಗೆ ದೂರು ನೀಡಲಾಯಿತು.
