ಮಂಗಳೂರು: ಹೊರನಾಡು ಶ್ರೀ ಅನ್ನಪೂರ್ಣೇಶ್ವರಿ ದೇವಿಗೆ ಹರಕೆಯಾಗಿ ಎತ್ತಿಟ್ಟ ಅಕ್ಕಿಯನ್ನು ಮಂಗಳೂರಿನ ಹೋಟೆಲ್ ಮಾಲೀಕರೊಬ್ಬರು ನಿರಾಶ್ರಿತರ ಹೊಟ್ಟೆ ತುಂಬಿಸಲು ವಿನಿಯೋಗಿಸಿ ಮಾನವೀಯತೆ ಮೆರೆದಿದ್ದಾರೆ.
ಮಂಗಳೂರಿನ ಪಾಂಡೇಶ್ವರ ಶ್ರೀ ಗಣೇಶ್ ಹೋಟೆಲ್ ಮಾಲೀಕ ಹರಿಪ್ರಸಾದ್ ಶೆಟ್ಟಿಯವರು ಈ ಮಾನವೀಯ ಕಾರ್ಯದಲ್ಲಿ ತೊಡಗಿದವರು. ಎಂಬಿಎ ಪದವೀಧರರಾಗಿರುವ ಇವರು, ನಾಲ್ಕು ವರ್ಷಗಳ ಹಿಂದೆ ಹೋಟೆಲ್ ಆರಂಭಿಸಿದ್ದರು. ವ್ಯಾಪಾರ ಅಭಿವೃದ್ಧಿಗಾಗಿ ಹೊರನಾಡು ಕ್ಷೇತ್ರಕ್ಕೆ ತೆರಳಿ ಶ್ರೀ ಅನ್ನಪೂರ್ಣೇಶ್ವರಿ ದೇವಿಯಲ್ಲಿ ಪ್ರಾರ್ಥಿಸಿದ್ದರು. ಈ ಸಂದರ್ಭ ಅಲ್ಲಿನ ಪುರೋಹಿತರು ನಿತ್ಯವೂ ಹೋಟೆಲ್ ಊಟಕ್ಕೆ ಬಳಸುವ ಅಕ್ಕಿಯಲ್ಲಿ ಒಂದು ಹಿಡಿ ಅಕ್ಕಿಯನ್ನು ಕ್ಷೇತ್ರಕ್ಕೆ ಹರಕೆಯಾಗಿ ಎತ್ತಿಡಿ ಎಂದಿದ್ದರು.
ಆ ಪ್ರಕಾರವಾಗಿ ಹರಿಪ್ರಸಾದ್ ಶೆಟ್ಟಿ ಕಳೆದ ನಾಲ್ಕು ವರ್ಷಗಳಿಂದಲೂ ನಿತ್ಯವೂ ಒಂದು ಹಿಡಿ ಅಕ್ಕಿಯನ್ನು ಹರಕೆಯಾಗಿ ಎತ್ತಿಡಲು ಆರಂಭಿಸಿದ್ದಾರೆ. ಬಳಿಕ ವರ್ಷ, ಆರು ತಿಂಗಳಿಗೊಮ್ಮೆ ಅಕ್ಕಿಯನ್ನು ಹೊರನಾಡಿಗೆ ಹರಕೆಯಾಗಿ ತೀರಿಸುತ್ತಿದ್ದರು. ಆದರೆ ಲಾಕ್ಡೌನ್ ನಿಂದ ಹರಕೆ ತೀರಿಸಲು ಸಾಧ್ಯವಾಗದ್ದಕ್ಕೆ ಅದೇ ಅಕ್ಕಿಯನ್ನು ನಿರಾಶ್ರಿತರ ಹಸಿದವರ ಹೊಟ್ಟೆ ವಿನಿಯೋಗಿಸಿದ್ದಾರೆ. ಈ ಮೂಲಕ ದಿನವೂ ಇದೇ ಅಕ್ಕಿಯ ಅನ್ನವನ್ನು ಮಾಡಿ ಸಾಂಬಾರ್ನೊಂದಿಗೆ ನಿರಾಶ್ರಿತರಿಗೆ ಹಂಚುತ್ತಿದ್ದಾರೆ.
ಕಳೆದ ಲಾಕ್ಡೌನ್ ನಲ್ಲಿ ಹರಕೆಗಾಗಿ ಎತ್ತಿಟ್ಟ 400ಕೆಜಿ ಅಕ್ಕಿಯನ್ನು ನಿರಾಶ್ರಿತರಿಗೆ ಹಂಚಿದ್ದಾರೆ. ಈ ಬಾರಿ‌ಯ ಲಾಕ್ಡೌನ್ ಸಂದರ್ಭದಲ್ಲಿ 150ಕೆಜಿ ಹರಕೆಯ ಅಕ್ಕಿ ಶೇಖರಣೆಯಾಗಿದೆ. ಎರಡನೇ ಹಂತದ ಲಾಕ್ಡೌನ್ ಆರಂಭವಾದಾಗಿನಿಂದಲೂ ಮತ್ತೆ ನಿರಾಶ್ರಿತರಿಗೆ ಅನ್ನ ನೀಡುವ ಕಾರ್ಯದಲ್ಲಿ ತೊಡಗಿದ್ದಾರೆ. ದಿನವೂ ಮಧ್ಯಾಹ್ನ 350-400 ಮಂದಿಗೆ ಊಟ ಕೊಡುವ ಕಾರ್ಯ ನಡೆಯುತ್ತಿದ್ದು, ದಿನಕ್ಕೆ 4-5 ಸಾವಿರ ರೂ. ಇದಕ್ಕಾಗಿ ವ್ಯಯ ಮಾಡಲಾಗುತ್ತಿದೆ.
ಈ ಕಾರ್ಯದಲ್ಲಿ ಹೋಟೆಲ್ ಸಿಬ್ಬಂದಿ ಜೊತೆಗೆ ಹತ್ತಿರದ ಪಾಂಡೇಶ್ವರ ಅಗ್ನಿಶಾಮಕ ದಳ ಸಿಬ್ಬಂದಿಯೂ ಕೈಜೋಡಿಸಿದ್ದು, ನಿರಾಶ್ರಿತರಿಗೆ ಅನ್ನಹಾರ ಸರಬರಾಜು ಮಾಡಲು ಅಗ್ನಿಶಾಮಕ ದಳದ ವಾಹನವನ್ನೂ ಒದಗಿಸುತ್ತಿದ್ದಾರೆ. ಅಲ್ಲದೇ ಕೆಲ ದಾನಿಗಳೂ ಈ ಕೈಂಕರ್ಯದಲ್ಲಿ ಕೈಜೋಡಿಸಿದ್ದಾರೆಂದು ಹರಿಪ್ರಸಾದ್ ಶೆಟ್ಟಿ ಹೇಳಿದರು.
