ಮಂಗಳೂರು: ಅಪಘಾತವೊಂದರಲ್ಲಿ ಹೆತ್ತವರು, ಸಹೋದರ, ಸಹೋದರಿ ಸಮೇತ ತನ್ನ ಮನೆಯವರನ್ನೆಲ್ಲಾ ಕಳೆದುಕೊಂಡ ವಿದ್ಯಾರ್ಥಿನಿ, ಈ ದುಃಖವನ್ನು ಮೆಟ್ಟಿ ನಿಂತು ಪಿಯುಸಿ ಪರೀಕ್ಷೆಯಲ್ಲಿ ಶೇ.92 ಪ್ರತಿಶತ ಅಂಕಗಳಿಸಿ ಸಾಧನೆ ಮೆರೆದಿದ್ದಾಳೆ.
ಕೊಡಗಿನವಳಾದ ಪ್ರಕೃತಿ ಅಶೋಕ್ ಮೂಡುಬಿದಿರೆಯ ಎಕ್ಸಲೆಂಟ್ ಕಾಲೇಜಿನ ವಿದ್ಯಾರ್ಥಿನಿ. ಕಳೆದ ಸೆಪ್ಟೆಂಬರ್ನ ಗಣೇಶ ಚತುರ್ಥಿಯಂದು ಮೂಡುಬಿದಿರೆಯ ಎಕ್ಸಲೆಂಟ್ ಕಾಲೇಜಿನ ಹಾಸ್ಟೇಲ್ನಲ್ಲಿದ್ದ ಪ್ರಕೃತಿಯನ್ನು ಕಾಣಲು ಆಕೆಯ ತಂದೆ ನಿಡ್ಯಮಲೆ ಅಶೋಕ್, ತಾಯಿ ಹೇಮಲತಾ, ಸಹೋದರ ಯಶಸ್, ಸಹೋದರಿ ವರ್ಷಾ ಕಾರಿನಲ್ಲಿ ಬರುತ್ತಿರುವಾಗ ಬೆಳಗ್ಗಿನ ಜಾವ ಪುತ್ತೂರಿನ ಬಳಿ ಅಪಘಾತ ಸಂಭವಿಸಿತ್ತು. ಪರಿಣಾಮ ಕಾರು ರಸ್ತೆ ಬೀದಿಯಲ್ಲಿರುವ ಕೆರೆಗೆ ಬಿದ್ದು ನಾಲ್ವರೂ ಮೃತಪಟ್ಟಿದ್ದರು.
ಈ ದುರಂತದಿಂದ ಪ್ರಕೃತಿಗೆ ಬಹುದೊಡ್ಡ ಆಘಾತವಾಗಿದ್ದು, ಆಕೆಯನ್ನು ಎಕ್ಸಲೆಂಟ್ ಶಿಕ್ಷಣ ಸಂಸ್ಥೆಯ ಯುವರಾಜ್ ಜೈನ್ ಹಾಗೂ ರಶ್ಮಿತಾ ದಂಪತಿ ಸ್ವಂತ ಮಗಳಂತೆ ಆರೈಕೆ ಮಾಡಿದ್ದರು. ಅವಳ‌ಲ್ಲಿನ ನೋವನ್ನು ನಿವಾರಿಸಿ, ಆತ್ಮಶಕ್ತಿ ತುಂಬುವಲ್ಲಿ ಅವರು ಕಠಿಣ ಪರಿಶ್ರಮ ವಹಿಸಿದ್ದಾರೆ. ಆ ಬಳಿಕ ಆಕೆಯ ಎಲ್ಲಾ ಬೇಕು, ಬೇಡಗಳನ್ನು ನಿಭಾಯಿಸುತ್ತಾ ಪೋಷಕರಾಗಿ ನೋಡಿಕೊಂಡಿದ್ದಾರೆ. ಜೊತೆಗೆ ಕಾಲೇಜಿನ ಶಿಕ್ಷಕರು, ಕ್ಲಾಸ್ಮೇಟ್ಸ್‌ ಆಕೆಯ ಬಗ್ಗೆ ಕಾಳಜಿ ವಹಿಸಿದ್ದಾರೆ.
ಇದೆಲ್ಲವೂ ಆಕೆಯ ನೋವುಗಳನ್ನು ಮೆಟ್ಟಿ ನಿಲ್ಲಲು ಸಹಕಾರಿಯಾಯಿತು. ಮುಂದೆ ಪಿಯುಸಿ ಪರೀಕ್ಷೆಯಲ್ಲಿ ಶೇ.92 (550) ಅಂಕ ಗಳಿಸಿ ಸಾಧನೆ ತೋರಿದ್ದಾಳೆ.
ತನ್ನ ಸಾಧನೆಯ ಹಿಂದೆ ಎಕ್ಸಲೆಂಟ್ ಶಿಕ್ಷಣ ಸಂಸ್ಥೆಯ ಮ್ಯಾನೇಜ್ಮೆಂಟ್ ಅಲ್ಲದೆ ಶಿಕ್ಷಕರು, ಸಹಪಾಠಿಗಳ ಕೊಡುಗೆ ಇದೆ ಎಂದು ಹೇಳುವ ಪ್ರಕೃತಿ, ಜೀವನದಲ್ಲಿ ಯಾವ ರೀತಿ ಕಷ್ಟಗಳು ಎದುರಾಗುತ್ತವೆ ಎಂದು ಹೇಳಲು ಅಸಾಧ್ಯ. ಅದೆಲ್ಲವನ್ನೂ ಎದುರಿಸುವ ಛಲವಿದ್ದರೆ ಎಲ್ಲವೂ ಸಾಧ್ಯ ಎನ್ನುತ್ತಾಳೆ.
