ಮಂಗಳೂರು: 'ಒಂದೇ ಜಾತಿ, ಒಂದೇ ಮತ, ಒಂದೇ ದೇವರು' ಎಂಬ ತತ್ವಸಂದೇಶವನ್ನು ಲೋಕಕ್ಕೆ ಸಾರಿದ ಬ್ರಹ್ಮಶ್ರೀ ನಾರಾಯಣ ಗುರುಗಳ 167ನೇ ಜಯಂತಿಯ ಪ್ರಯುಕ್ತ ಮಂಗಳೂರಿನ ಶ್ರೀಕ್ಷೇತ್ರ ಕುದ್ರೋಳಿಯಲ್ಲಿ ಸಂಭ್ರಮದಿಂದ ನಾರಾಯಣ ಗುರುಗಳ ಆರಾಧನೆ ನಡೆಯುತ್ತಿದೆ.
ಕೇರಳದ ಚೆಂಬಳತಿ ಎಂಬ ಹಳ್ಳಿಯಲ್ಲಿ ಈಳವ ಕುಟುಂಬದಲ್ಲಿ ಕ್ರಿ.ಶ. 1856ರಲ್ಲಿ ಬ್ರಹ್ಮಶ್ರೀ ನಾರಾಯಣ ಗುರುಗಳ ಜನನವಾಯಿತು. ಶೂದ್ರ ವರ್ಗದ ಅದರಲ್ಲೂ ಈಳವ, ಬಿಲ್ಲವ ಸಮುದಾಯದವರಿಗೆ ದೇವಾಲಯ ಪ್ರವೇಶವಿರದ ಕಾಲದಲ್ಲಿ ಎಲ್ಲಾ ವರ್ಗಗಳಿಗೂ ದೇವಾಲಯ ಪ್ರವೇಶಕ್ಕೆ ಅನುವು ಮಾಡಿಕೊಡುವಂತೆ ಕರ್ನಾಟಕ, ಕೇರಳ, ತಮಿಳುನಾಡು ಹಾಗೂ ಶ್ರೀಲಂಕಾದಲ್ಲಿ ಒಟ್ಟು 43ಕ್ಕೂ ಅಧಿಕ ದೇವಾಲಯಗಳನ್ನು ನಿರ್ಮಿಸಿದ್ದಾರೆ. ಈ ಮೂಲಕ ಎಲ್ಲಾ ಜನಾಂಗದವರಿಗೂ ದೇವಾಲಯ ಪ್ರವೇಶಕ್ಕೆ ಮುಕ್ತ ಅವಕಾಶ ನೀಡಿದರು. ಇಂತಹ ದೇವಾಲಯಗಳಲ್ಲಿ ಕುದ್ರೋಳಿಯ ಗೋಕರ್ಣನಾಥ ದೇವಾಲಯವೂ ಒಂದು.
ಕರಾವಳಿಯಲ್ಲಿಯೂ ಬಿಲ್ಲವ ಸಮಾಜದವರು ದೇವಾಲಯ ಪ್ರವೇಶವಿಲ್ಲದೆ ತುಳಿತಕ್ಕೊಳಗಾಗಿದ್ದರು. ಈ ಹಿನ್ನೆಲೆಯಲ್ಲಿ ಮಂಗಳೂರಿನ ಹೊಯಿಗೆ ಬಜಾರ್ನಲ್ಲಿದ್ದ ಶ್ರೀಮಂತ ವ್ಯಾಪಾರಿ ಕೊರಗಪ್ಪ ಎಂಬವರು ಶೆಡ್ಡೆ ಸೋಮಯ್ಯ ಮೇಸ್ತ್ರಿ, ಐತಪ್ಪ ಮೇಸ್ತ್ರಿ, ಅಮ್ಮಣ್ಣ ಮೇಸ್ತ್ರಿ ಹಾಗೂ ಗುತ್ತಿಗೆದಾರ ದೂಮಪ್ಪ ಎಂಬ ಬಿಲ್ಲವ ಮುಖಂಡರೊಂದಿಗೆ ಕೇರಳಕ್ಕೆ ತೆರಳಿ ಬ್ರಹ್ಮಶ್ರೀ ನಾರಾಯಣ ಗುರುಗಳನ್ನು ಭೇಟಿಯಾಗಿ ಮಂಗಳೂರಿನಲ್ಲಿಯೂ ಬಿಲ್ಲವರ ಪ್ರವೇಶಕ್ಕೆ ದೇವಾಲಯ ನಿರ್ಮಿಸಿಕೊಡಬೇಕೆಂದು ಬಿನ್ನವಿಸಿಕೊಂಡರು.
ಈ ಬಿಲ್ಲವ ಮುಖಂಡರ ಮನವಿಯ ಮೇರೆಗೆ 1908ರಲ್ಲಿ ಮಂಗಳೂರಿಗೆ ಆಗಮಿಸಿದ ನಾರಾಯಣ ಗುರುಗಳು, ಕುದ್ರೋಳಿಯ ಈಗ ದೇವಾಲಯ ಇರುವ ಸ್ಥಳದಲ್ಲಿ ಶ್ರೀ ಈಶ್ವರ ದೇಗುಲ ನಿರ್ಮಾಣಕ್ಕೆ ಸೂಕ್ತವಾದ ಸ್ಥಳವೆಂದು ಹೇಳಿ ಗರ್ಭಗುಡಿ ಹಾಗೂ ತೀರ್ಥಬಾವಿಗೆ ಸ್ಥಳ ಗುರುತಿಸಿಕೊಟ್ಟರು.
ಅಲ್ಲಿ ಸದ್ಯದ ವ್ಯವಸ್ಥೆಯಾಗಿ ಮುಳಿಹುಲ್ಲಿನ ಮೇಲ್ಛಾವಣಿಯೊಂದಿಗೆ ಸಣ್ಣ ದೇಗುಲ ನಿರ್ಮಾಣ ಮಾಡಿ ಈಶ್ವರನ ಭಾವಚಿತ್ರವನ್ನು ನಾರಾಯಣ ಗುರುಗಳೇ ಪ್ರತಿಷ್ಠಾಪನೆ ಮಾಡಿದರು. 1912ರಲ್ಲಿ ದೇಗುಲ ಸಂಪೂರ್ಣವಾಗಿ ನಿರ್ಮಾಣಗೊಂಡು ನಾರಾಯಣ ಗುರುಗಳೇ ಕುದ್ರೋಳಿ ಗೋಕರ್ಣನಾಥ ದೇವಾಲಯಕ್ಕೆ ಆಗಮಿಸಿ ಶಿವಲಿಂಗವನ್ನು ಪ್ರತಿಷ್ಠಾಪಿಸಿದರು. ಈ ಮೂಲಕ ತುಳುನಾಡಿನಲ್ಲಿ ಬಿಲ್ಲವ ಸಮುದಾಯದವರಿಂದ ತೊಡಗಿ ಎಲ್ಲರಿಗೂ ಮುಕ್ತ ಪ್ರವೇಶಕ್ಕೆ ಅನುವು ಮಾಡುವ ದೇವಾಲಯವನ್ನು ಸ್ಥಾಪಿಸಿ ಬಹುದೊಡ್ಡ ಕ್ರಾಂತಿಗೆ ನಾಂದಿ ಹಾಡಿದರು. ಇದರಿಂದ ಶೂದ್ರ ವರ್ಗಕ್ಕೂ ಧಾರ್ಮಿಕ ಕಾರ್ಯಕ್ರಮದಲ್ಲಿ ಸ್ಥಾನಮಾನ ಒದಗಿಸಿದ ಮಹಾನ್ ಹರಿಕಾರರಾದರು.
1991ರ ಸಂದರ್ಭದಲ್ಲಿ ಕುದ್ರೋಳಿ ದೇವಸ್ಥಾನ ಮಾಜಿ ಕೇಂದ್ರ ಸಚಿವ, ಕಾಂಗ್ರೆಸ್ ಮುಖಂಡ ಜನಾರ್ದನ ಪೂಜಾರಿಯವರ ನೇತೃತ್ವದಲ್ಲಿ ಮತ್ತೆ ಪುನರ್ನಿಮಾಣಗೊಂಡಿತು. ಇದೀಗ ದೇಶ-ವಿದೇಶಗಳ ಭಕ್ತರು ಹಾಗೂ ಪ್ರವಾಸಿಗರನ್ನು ಆಕರ್ಷಿಸುತ್ತಿರುವ ದ.ಕ.ಜಿಲ್ಲೆಯ ಪ್ರಸಿದ್ಧ ದೇವಾಲಯವಾಗಿ ಕುದ್ರೋಳಿ ಕಂಗೊಳಿಸುತ್ತಿದೆ.
