ಉಳ್ಳಾಲ: ಇತ್ತೀಚೆಗೆ ಕೊರೊನಾ ಕಾರಣದಿಂದಾಗಿ ಗಲ್ಫ್ ರಾಷ್ಟ್ರದಿಂದ ಮರಳಿ ಬಂದಿದ್ದ ಯುವಕನ ಶವ ಆಡಂಕುದ್ರ ಬಳಿ ನೇತ್ರಾವತಿ ನದಿಯಲ್ಲಿ ದೊರೆತಿದೆ.
ನಿತಿನ್ (32) ಸೋಮವಾರ ಮಧ್ಯಾಹ್ನ ತನ್ನಿಬ್ಬರು ಸ್ನೇಹಿತರ ಜೊತೆಗೆ ಸೋಮೇಶ್ವರ ದೇವಸ್ಥಾನದ ಬ್ರಹ್ಮಕಲಶೋತ್ಸವದಲ್ಲಿ ಪಾಲ್ಗೊಂಡು ನಂತರ ಸಂಜೆ ಮೂವರು ಸೇರಿ ನೇತ್ರಾವತಿ ರೈಲ್ವೇ ಸೇತುವೆ ಬಳಿ ತೆರಳಿದ್ದರು. ಅಲ್ಲಿಂದ ನಿತಿನ್ ನಾಪತ್ತೆಯಾಗಿದ್ದರು.
ಈ ಬಗ್ಗೆ ನಿತಿನ್ ಸಹೋದರ ಉಳ್ಳಾಲ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ಪೊಲೀಸರು ನಿತಿನ್ ಜೊತೆಗಿದ್ದ ಇಬ್ಬರು ಸ್ನೇಹಿತರ ವಿಚಾರಣೆ ನಡೆಸಿದ್ದು, ನಿನ್ನೆ ಸಂಜೆಯ ವೇಳೆಗೆ ಮೃತದೇಹ ಪತ್ತೆಯಾಗಿದೆ.
ಸ್ನೇಹಿತರ ಜೊತೆಗೆ ವಿಹರಿಸುತ್ತಿದ್ದ ಸಂದರ್ಭ ರೈಲು ಬಂದಿದ್ದು, ಇದರಿಂದ ಗಾಬರಿಗೊಂಡು ನಿತಿನ್ ನದಿಗೆ ಹಾರಿದ್ದ ಎನ್ನಲಾಗ್ತಿದೆ. ನಿತಿನ್ ಈ ಹಿಂದೆ ಗಲ್ಫ್ ರಾಷ್ಟ್ರದಲ್ಲಿ ಉದ್ಯೋಗದಲ್ಲಿದ್ದು, ಕೊರೊನಾ ಲಾಕ್ಡೌನ್ ನಂತರ ಊರಿಗೆ ಬಂದು ವೆಲ್ಡರ್ ವೃತ್ತಿ ನಡೆಸುತ್ತಿದ್ದರು.
ಮತ್ತೊಂದು ಶವ ಪತ್ತೆ
ಚಿಕ್ಕಮುಡ್ನೂರು ಗ್ರಾಮದ ಜಿಡೆಕಲ್ಲು ರಾಗಿದಕುಮೇರು ನಿವಾಸಿಯೊಬ್ಬರ ಮೃತದೇಹ ಪಾಣೆಮಂಗಳೂರು ಸಮೀಪ ನೇತ್ರಾವತಿ ಹೊಳೆಯಲ್ಲಿ ಪತ್ತೆಯಾಗಿದೆ.
ರಾಗಿದಕುಮೇರು ನಿವಾಸಿ ಪದ್ಮನಾಭ ರೈ ಅವರ ಪುತ್ರ ನಿರಂಜನ ರೈ (35) ಶವ ನೇತ್ರಾವತಿ ನದಿಯಲ್ಲಿ ದೊರೆತಿದೆ. ನಿರಂಜನ ರೈ 28 ರಂದು ತಡರಾತ್ರಿ ಹೊಟ್ಟೆನೋವೆಂದು ಮನೆಯಿಂದ ಸ್ನೇಹಿತರ ಬೈಕ್‌ನಲ್ಲಿ ಆಸ್ಪತ್ರೆಗೆಂದು ತೆರಳಿದ್ದರಂತೆ. ಆದರೆ ಬೆಳಗ್ಗಿನ ತನಕ ಅವರು ಮನೆಗೆ ಹಿಂದಿರುಗದೇ ಇರುವುದನ್ನು ಗಮನಿಸಿದ ಮನೆ ಮಂದಿ ಹುಡಕಾಟದಲ್ಲಿ ತೊಡಗಿದ್ದರು.
ಈ ನಡುವೆ ಪಾಣೆಮಂಗಳೂರು ಸೇತುವೆಯಲ್ಲಿ ಬೈಕ್ ಚಾಲನೆಯಲ್ಲಿರುವುದನ್ನು ಗಮನಿಸಿದ ಪೊಲೀಸರು ಬೈಕ್ ಮಾಲೀಕರಿಗೆ ಫೋನ್‌ ಮಾಡಿದ್ದಾರೆ. ಬಳಿಕ ಹೊಳೆಯಲ್ಲಿ ಪತ್ತೆ ಕಾರ್ಯ ನಡೆಸಿದಾಗ ಮೃತದೇಹ ದೊರೆತಿದೆ.
