ಚಿಕ್ಕಮಗಳೂರು: ವಾಹನ ನೋಂದಣಿ ಮಾಡಲು ದಂಡ ಕಟ್ಟಬೇಕು ಎಂದು ಆರ್ಟಿಓ ಅಧಿಕಾರಿಗಳು ಸಾರ್ವಜನಿಕರಿಗೆ ತಾಕೀತು ಮಾಡುತ್ತಿದ್ದು, ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಕೋವಿಡ್ ಎರಡನೇ ಅಲೆಯ ಸಂದರ್ಭ ಲಾಕ್ಡೌನ್ ಮಾಡುವ ನಾಲ್ಕು ದಿನಗಳ ಮೊದಲು ತೆಗೆದುಕೊಂಡ ವಾಹನಗಳನ್ನು ಲಾಕ್ಡೌನ್ ತೆರವು ಮಾಡಿದ ನಂತರ ನೋಂದಣಿ ಮಾಡಲಾಗುತ್ತಿದೆ. ಆದರೀಗ ಆರ್ಟಿಓ ಸಾರ್ವಜನಿಕರಿಗೆ ಪೆನಾಲ್ಟಿ ಬರೆ ಹಾಕುತ್ತಿದೆ.
ಈ ಬಗ್ಗೆ ಲಕ್ಷ್ಮಣ್ ಎಂಬುವರು ಮಾತನಾಡಿ, 2ನೇ ಅಲೆ ಸಂಬಂಧ ಲಾಕ್ಡೌನ್ ಆಗುವ ನಾಲ್ಕು ದಿನದ ಮೊದಲು ನಾನು ಹೊಸ ಕಾರು ತೆಗೆದುಕೊಂಡಿದ್ದೆ. ಅದರ ನೋಂದಣಿಗಾಗಿ ಆರ್ಟಿಓಗೆ ಬಂದಾಗ ಇದನ್ನು ಈಗ ಮಾಡಲು ಸಾಧ್ಯವಿಲ್ಲ, ಕಚೇರಿ ಬಂದ್ ಆಗಿದೆ ಎಂದು ಹೇಳಿ ಅಧಿಕಾರಿಗಳು ವಾಪಸ್ ಕಳುಹಿಸಿದ್ದರು. ಲಾಕ್ಡಾನ್ ಸಡಿಲಿಕೆಯಾದ ನಂತರ ಬಂದು ನಿಮ್ಮ ವಾಹನದ ನೋಂದಣಿ ಮಾಡಿಸಿ ಎಂದು ಹೇಳಿದ್ದಾರೆ. ಅದೇ ಸಂದರ್ಭ ಆನ್ಲೈನ್ ಮೂಲಕವೂ ನೀವು ನೋಂದಣಿ ಮಾಡಿಸಬಹುದು ಎಂದು ಅವರೇ ಸಲಹೆ ನೀಡಿದ್ದಾರೆ.
ಈ ಬಗ್ಗೆ ಡೀಲರ್ ಸಂಪರ್ಕಿಸಿದಾಗ ನಮ್ಮ ಕಚೇರಿ ಬಂದ್ ಆಗಿದೆ. ಲಾಕ್ಡೌನ್ ಓಪನ್ ಆದಾಗ ವಾಹನ ನೋಂದಣಿಗೆ ಬಂದು ಪೆನಾಲ್ಟಿ ಕಟ್ಟಬೇಕು ಎಂದು ಅಧಿಕಾರಿಗಳು ತಾಕೀತು ಮಾಡುತ್ತಿರುವುದಾಗಿ ಹೇಳಿದ್ದಾರೆ. ಹಾಗಾದ್ರೆ, ಇದು ನಮ್ಮ ತಪ್ಪಾ?, ಆರ್ಟಿಓ ಇಲಾಖೆ ಖಾಸಗಿ ವಾಹನಗಳಿಂದ ಕಂದಾಯ ಕಟ್ಟಿಸಿಕೊಳ್ಳುತ್ತಿದೆ. ಆದರೆ ಈಗ ಪೆನಾಲ್ಟಿ ಕಟ್ಟಿಸಿಕೊಂಡು ಸಾರ್ವಜನಿಕರಿಂದ ಹಣ ವಸೂಲಿ ಮಾಡುತ್ತಿದ್ದಾರೆ. ಇದನ್ನು ದಂಧೆಯಾಗಿ ನಡೆಸುತ್ತಿದ್ದಾರೆ ಅವರು ದೂರಿದರು.
ಈ ಬಗ್ಗೆ ಸರ್ಕಾರ ಯಾವುದೇ ಸರಿಯಾದ ತೀರ್ಮಾನ ತೆಗೆದುಕೊಳ್ಳುತ್ತಿಲ್ಲ. ಲಾಕ್ಡೌನ್‌ನಿಂದ ಉದ್ಯೋಗ, ಆದಾಯವಿಲ್ಲದೆ ಕಂಗೆಟ್ಟಿದೆ. ಇಂತಹ ನಿಯಮಗಳಿಂದ ಸಾರ್ವಜನಿಕರಿಗೆ ತೊಂದರೆಯಾಗುತ್ತಿದೆ. ಈ ಬಗ್ಗೆ ಸರಿಯಾದ ಕ್ರಮ ಜರುಗಿಸಬೇಕು. ಜನರಿಂದ ಕಟ್ಟಿಸಿಕೊಂಡಿರುವ ದಂಡ ಹಣವನ್ನು ಹಿಂದಿರುಗಿಸಬೇಕು ಎಂದು ಅವರು ಇದೇ ವೇಳೆ ಆಗ್ರಹಿಸಿದ್ದಾರೆ.
