ಮೀಸಲಾತಿ ಬೇಕಾದರೆ ಬಿಜೆಪಿಗೆ ಓಟ್ ಹಾಕಬೇಡಿ: ಸಿದ್ದು ವಿವಾದಾತ್ಮಕ ಹೇಳಿಕೆ

ಮೋದಿ ಉಳ್ಳವರ ಪರವಾಗಿದ್ದಾರೆ. ಹಿಂದುಳಿದವರು, ಅಲ್ಪಸಂಖ್ಯಾತರಿಗೆ ಏನನ್ನೂ ನೀಡಿಲ್ಲ.ಹೀಗಾಗಿ ಮೀಸಲಾತಿ ಬೇಕೆಂದರೆ ಬಿಜೆಪಿಗೆ ಮತನೀಡಬೇಡಿ ಎಂದು ಚಾಮರಾಜನಗರದಲ್ಲಿ ಮಾಜಿ ಸಿಎಂ ಸಿದ್ಧರಾಮಯ್ಯ ಹೇಳಿದರು.

ಚಾಮರಾಜನಗರ: ಮೀಸಲಾತಿ ಬೇಕೆಂದರೆ ದಲಿತರು, ಹಿಂದುಳಿದವರು, ಅಲ್ಪಸಂಖ್ಯಾತರು ಬಿಜೆಪಿಗೆ ಮತ ಹಾಕಬಾರದು ಎಂದು ಮಾಜಿ ಸಿಎಂ ಸಿದ್ದರಾಮಯ್ಯ ವಿವಾದಾದ್ಮಕ ಹೇಳಿಕೆ ನೀಡಿದ್ದಾರೆ.

ಕೊಳ್ಳೇಗಾಲದಲ್ಲಿ ಸಂಸದ ಧ್ರುವನಾರಾಯಣ ಪ್ರಚಾರ ಸಭೆಯಲ್ಲಿ ಮಾತನಾಡಿದ ಅವರು, ಇಡೀ ಜಗತ್ತು ಭಾರತದ ಚುನಾವಣೆಯನ್ನು ಗಮನಿಸುತ್ತಿದೆ. ಅಂಬೇಡ್ಕರ್​ ರೂಪಿಸಿದ ಸಂವಿಧಾನಕ್ಕೆ, ಪ್ರಜಾಪ್ರಭುತ್ವಕ್ಕೆ ಅಪಾಯದ ಕುರಿತು ಚಿಂತಿಸಬೇಕಿದೆ. ಮೀಸಲಾತಿ ಬೇಕು ಎನ್ನುವ ದಲಿತರು, ಹಿಂದುಳಿದ ವರ್ಗದವರು, ಅಲ್ಪಸಂಖ್ಯಾತರು ಬಿಜೆಪಿಗೆ ಒಂದೇ ಒಂದು ಮತ ಹಾಕಬಾರದು ಎಂದರು.

ಸಂವಿಧಾನ ಬದಲಾಯಿಸಲು ಅದು ಮಗ್ಗಿ ಪುಸ್ತಕವಲ್ಲ ಎಂದು ಬಿಜೆಪಿ ಅಭ್ಯರ್ಥಿ ಹೇಳುತ್ತಾರೆ. ಅಷ್ಟಕ್ಕೂ ಸಂವಿಧಾನ ಬದಲಾವಣೆಯ ಮಾತನ್ನಾಡಿದ್ದು ಯಾರೋ ಸಾಮಾನ್ಯನಲ್ಲ, ಮೋದಿ ಸಂಪುಟದ ಸಚಿವರೇ ಹೇಳಿದ್ದು. ಈ ಹೇಳಿಕೆ ಬಗ್ಗೆ ಅವರ ಅಭಿಪ್ರಾಯ ಏನು ಎಂದು ಪ್ರಶ್ನಿಸಿದರು.

ಸಬ್ ಕಾ ಸಾಥ್ ಸಬ್ ಕಾ ವಿಕಾಸ್ ಎನ್ನುವ ಮೋದಿ, ಯಡಿಯೂರಪ್ಪ ರಾಜ್ಯದ 27 ಕ್ಷೇತ್ರಗಳಲ್ಲೂ ಒಬ್ಬ ಹಿಂದುಳಿದವರ್ಗ, ಅಲ್ಪಸಂಖ್ಯಾತನಿಗೆ ಟಿಕೆಟ್ ನೀಡಿಲ್ಲ. ಬಾಯಿ ಬಿಡುವ ಈಶ್ವರಪ್ಪ ಒಬ್ಬೇ ಒಬ್ಬ ಕುರುಬ ಸಮುದಾಯವನಿಗೆ ಟಿಕೆಟ್ ಕೊಡಿಸಿಲ್ಲ ಎಂದು ವಾಗ್ದಾಳಿ ನಡೆಸಿದರು.

ಹಿಂದುಳಿದ ವರ್ಗದವರಿಗೆ, ದಲಿತರಿಗೆ, ಅಲ್ಪಸಂಖ್ಯಾತರಿಗೆ, ರೈತರಿಗೆ ಏನನ್ನು ನೀಡದ ಮೋದಿ ಅವರಿಗೆ ಮತ ಹಾಕಬೇಕೆ...? ಈ ಚುನಾವಣೆ ಪ್ರಜಾಪ್ರಭುತ್ವ ವರ್ಸಸ್ ಸರ್ವಾಧಿಕಾರದ ನಡುವಿನ ಚುನಾವಣೆ. ಸಂವಿಧಾನದ ಉಳಿವಿಗಾಗಿ ಕಾಂಗ್ರೆಸ್ ಗೆ ಮತ ನೀಡಿ ಎಂದು ಕೋರಿದರು.

ಮಾಜಿ ಸಚಿವ ಎಚ್.ಸಿ. ಮಹದೇವಪ್ಪ, ಕಾಂಗ್ರೆಸ್ ಅಭ್ಯರ್ಥಿ ಆರ್. ಧ್ರುವನಾರಾಯಣ ಇನ್ನಿತರರು ಸಭೆಯಲ್ಲಿ ಉಪಸ್ಥಿತರಿದ್ದರು.