ಸತತ ಓದಿನಿಂದ 7 ಕೆಲಸ ಬದಲಿಸಿದ ಸರ್ಕಾರಿ ನೌಕರ: ಕಿರಿಯ ಇಂಜಿನಿಯರ್ ಆದ ಲೈನ್​​​​ಮನ್

ಚಾಮರಾಜನಗರ ತಾಲೂಕಿನ ಹರದನಹಳ್ಳಿಯಲ್ಲಿರುವ ಚೆಸ್ಕಾಂ ಉಪವಿಭಾಗದಲ್ಲಿ ಕಿರಿಯ ಇಂಜಿನಿಯರ್ ಆಗಿ ಕಾರ್ಯ ನಿರ್ವಹಿಸುತ್ತಿರುವ ವಸಂತಕುಮಾರ್ 7 ಸರ್ಕಾರಿ ಕೆಲಸ ಬದಲಿಸಿ ಈ ಹುದ್ದೆಯನ್ನು ಅಲಂಕರಿಸಿದ್ದಾರೆ.

ಚಾಮರಾಜನಗರ: ಒಂದು ಸರ್ಕಾರಿ ನೌಕರಿ ಪಡೆಯುವುದೇ ಕಷ್ಟ. ಒಮ್ಮೆ ಓದುವುದನ್ನು ಬಿಟ್ಟರೆ ಮತ್ತೆ ತಲೆಗೆ ವಿದ್ಯೆ ಹತ್ತಲ್ಲ ಎಂಬುದಕ್ಕೆ ಅಪವಾದದಂತೆ ನೌಕರಿ ಮಾಡುತ್ತಿದ್ದರೂ ನಿರಂತರ ಓದಿನಿಂದ ಲೈನ್​ಮನ್ ಒಬ್ಬರು ಕಿರಿಯ ಇಂಜಿನಿಯರ್ ಆಗಿದ್ದಾರೆ. ಚಾಮರಾಜನಗರ ತಾಲೂಕಿನ ಹರದನಹಳ್ಳಿಯಲ್ಲಿರುವ ಚೆಸ್ಕಾಂ ಉಪವಿಭಾಗದಲ್ಲಿ ಕಿರಿಯ ಇಂಜಿನಿಯರ್ ಆಗಿ ಕಾರ್ಯ ನಿರ್ವಹಿಸುತ್ತಿರುವ ವಸಂತಕುಮಾರ್ 7 ಸರ್ಕಾರಿ ಕೆಲಸ ಬದಲಿಸಿ ಅಧಿಕಾರಿಯಾಗಿದ್ದಾರೆ.

ಉದ್ಯೋಗಯಾನ ಹೀಗಿದೆ:

1998-2000 ರಲ್ಲಿ ದಾವಣಗೆರೆಯಲ್ಲಿ ಐಟಿಐ (ಇಲೆಕ್ಟ್ರಿಶಿಯನ್)ನಲ್ಲಿ 3ನೇ ರ‍್ಯಾಂಕ್ ಪಡೆದು ತೇರ್ಗಡೆಯಾಗುತ್ತಿದ್ದಂತೆ, 18 ವರ್ಷ 1 ತಿಂಗಳಿಗೆ ಟೊಯೊಟಾ ಕಿರ್ಲೋಸ್ಕರ್​ನಲ್ಲಿ ಮೊದಲ ನೌಕರಿ ಪಡೆಯುತ್ತಾರೆ. ಆದರೆ ಸರ್ಕಾರಿ ನೌಕರಿ ಮೇಲಿನ ಮೋಹದಿಂದ ಈಶಾನ್ಯ ಸಾರಿಗೆ ಸಂಸ್ಥೆಯಲ್ಲಿ ನೌಕರಿ ಹಿಡಿಯುತ್ತಾರೆ.

ಹುಬ್ಬಳ್ಳಿಯಲ್ಲಿ ಮಾಡುತ್ತಿದ್ದ ಕೆಲಸದಲ್ಲಿ ತೃಪ್ತಿ ಕಾಣದೇ ಬಿಎಂಟಿಸಿಯಲ್ಲಿ ಮೂರನೇ ನೌಕರಿ ಪಡೆಯುತ್ತಾರೆ. ಈ ವೇಳೆ ತಾಯಿ ನಿಧನರಾದ ಬಳಿಕ ಮತ್ತೊಮ್ಮೆ ಪರೀಕ್ಷೆ ಬರೆದು ಕೆಎಸ್ಆರ್​​ಟಿಸಿಯ ನೌಕರಿ ಪಡೆದು ದಾವಣಗೆರೆಗೆ ತೆರಳುತ್ತಾರೆ.

2005ರಲ್ಲಿ ಕೆಇಬಿಯಲ್ಲಿ ಉದ್ಯೋಗ ಕರೆದಾಗ ಐಟಿಐನಲ್ಲಿ 3ನೇ ರ‍್ಯಾಂಕ್ ಪಡೆದಿದ್ದರಿಂದ ಮೊದಲಿಗೆ ಕೆಪಿಟಿಸಿಎಲ್​ನಲ್ಲಿ ಕಾರ್ಯ ನಿರ್ವಹಿಸಿ ತೃಪ್ತರಾಗದೇ ಬೆಸ್ಕಾಂನಲ್ಲಿ ಲೈನ್ ಮನ್ ಹುದ್ದೆ ಪಡೆಯುತ್ತಾರೆ. ಚನ್ನಗಿರಿ ತಾಲೂಕಿನಲ್ಲಿ ಲೈನ್​ಮನ್ ಆಗಿ 12 ವರ್ಷ ಕೆಲಸ ಮಾಡಿರುವ ವಸಂತಕುಮಾರ್ ಅಧಿಕಾರಿಯಾಗಿ ಜನಸೇವೆ ಮಾಡಬೇಕೆಂದು ದೂರ ಶಿಕ್ಷಣದ ಮೂಲಕ ಬೆಂಗಳೂರು ವಿವಿಯಲ್ಲಿ ಬಿಎ ಪದವಿ ಪಡೆದು ಬಳಿಕ, 2012 ರಲ್ಲಿ ದಾವಣಗೆರೆ ಸರ್ಕಾರಿ ಪಾಲಿಟೆಕ್ನಿಕ್​ನಲ್ಲಿ ಹೊರ ವಿದ್ಯಾರ್ಥಿಯಾಗಿ ಡಿಪ್ಲೊಮಾ ಪಡೆಯುತ್ತಾರೆ‌. ಲೈನ್​ಮನ್ ಆಗಿದ್ದರಿಂದ ಬೆಳಗ್ಗೆ 4ಕ್ಕೆ ಎದ್ದು ತಮ್ಮ ಓದಿನಲ್ಲಿ ತೊಡಗಿಕೊಂಡು ಬಳಿಕ ರಾತ್ರಿ ವೇಳೆ ಡ್ರಾಯಿಂಗ್, ಬರಹದಲ್ಲಿ ರಾತ್ರಿ 12ರ ವರೆಗೆ ಓದಿ ಲೈನ್ ಮನ್ ವೃತ್ತಿ ಮಾಡುತ್ತಾ ಡಿಸ್ಟಿಂಕ್ಷನ್​ನಲ್ಲಿ 2105ರಲ್ಲಿ ಡಿಪ್ಲೊಮಾ ತೇರ್ಗಡೆಯಾಗುತ್ತಾರೆ.

2016ರಲ್ಲಿ ಇಂಧನ ಇಲಾಖೆ ಜೆಇ ಹುದ್ದೆಗೆ ಅರ್ಜಿ ಆಹ್ವಾನಿಸಿದಾಗ ಲೈನ್ ಮನ್ ಆಗಿದ್ದ ವಸಂತಕುಮಾರ್ ಪರೀಕ್ಷೆ, ಸಂದರ್ಶನದಲ್ಲಿ ತೇರ್ಗಡೆ ಹೊಂದಿ ಕಿರಿಯ ಇಂಜಿನಿಯರ್ ಆಗಿ ಹರದನಹಳ್ಳಿಯಲ್ಲಿ ಶಾಖಾಧಿಕಾರಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಅಸಡ್ಡೆ ಬೇಡ ಶ್ರದ್ಧೆ ಇರಲಿ: ತಮ್ಮ ಈ ಉದ್ಯೋಗಯಾನದ ಕುರಿತು ವಸಂತಕುಮಾರ್ ಈಟಿವಿ ಭಾರತಕ್ಕೆ ಮಾತನಾಡಿ, ಯುವಕರು ಅಸಡ್ಡೆ ಬಿಟ್ಟು ಶ್ರದ್ಧೆಯಿಂದ ಓದಿದರೇ ಎಲ್ಲವೂ ಸಿಗಲಿದೆ ಎಂಬುದಕ್ಕೆ ನಾನೇ ಸಾಕ್ಷಿ. ಲೈನ್ ಮನ್ ಆಗಿಯೋ ಇಲ್ಲವೇ ಕೆಎಸ್ಆರ್​ಟಿಸಿಯಲ್ಲಿ ಮೆಕ್ಯಾನಿಕ್ ಆಗಿಯೋ ನನ್ನ ಕರ್ತವ್ಯ ಮುಂದುವರೆಸಬಹುದಿತ್ತು. ಆದರೆ, ನನ್ನ ತಂದೆ-ತಾಯಿ ಕಷ್ಟಪಟ್ಟು ಕಾಲೇಜಿಗೆ ಕಳುಹಿಸುತ್ತಿದ್ದುದು, ನಾನೊಬ್ಬ ಅಧಿಕಾರಿಯಾಗಬೇಕೆಂಬ ಹಂಬಲ ಶಕ್ತಿಯಾಗಿ ಶ್ರದ್ಧೆಯಿಟ್ಟು ಓದಿದೆ ಫಲ ಸಿಕ್ಕಿದೆ. ನೆಗೆಟಿವ್ ಆಗಿ ಯೋಚನೆ ಮಾಡುವುದನ್ನು ಬಿಟ್ಟು ಓದಿನಲ್ಲಿ ಶ್ರದ್ಧೆ ಇಟ್ಟರೇ ಎಲ್ಲವೂ ಸಾಧ್ಯ ಎಂದು ಪ್ರತಿಕ್ರಿಯಿಸಿದರು.