ಗಿಣಿ ತಿನ್ನಲು ಬಂದ ಹಾವು.. ಉರಗದ ಬಾಯಿಂದ ಗಿಣಿ ರಕ್ಷಿಸಿದ 5 ರ ಬಾಲಕ!

ತಾವು ಸಾಕಿದ ಮುದ್ದು ಗಿಣಿಯನ್ನು ಕಣ್ಣೆದುರೇ ಹಾವೊಂದು ಬೇಟೆಯಾಡುತ್ತಿರುವುದನ್ನು ಕಂಡ ಬಾಲಕ ಕಾರ್ತಿಕ್​ ಕೂಡಲೇ ಹಾವನ್ನು ಎಳೆದಾಡಿ, ದೂರಕ್ಕೆ ಎಸೆದು ಗಿಣಿ ರಕ್ಷಿಸಿದ್ದಾನೆ..

ಚಾಮರಾಜನಗರ : ಪಂಜರದಲ್ಲಿದ್ದ ಗಿಣಿ ತಿನ್ನಲು ಹೊಂಚು ಹಾಕುತ್ತಿದ್ದ ಹಾವನ್ನು ಬಾಲಕನೋರ್ವ ಎಳೆದು ಹಾಕಿ ತನ್ನ ಮುದ್ದಿನ ಗಿಣಿ ರಕ್ಷಿಸಿರುವ ಘಟನೆ ಚಾಮರಾಜನಗರದ ಹೊರವಲಯದ ತೋಟದ ಮನೆಯೊಂದರಲ್ಲಿ ನಡೆದಿದೆ.

ಚಾಮರಾಜನಗರ ಹೊರವಲಯದಲ್ಲಿ ವಾಸವಾಗಿರುವ ಮಹದೇವಮ್ಮ ಎಂಬುವರ ಮನೆಯಲ್ಲಿ ಕಳೆದ ಮೂರು ದಿನಗಳ ಹಿಂದೆ ನಡೆದಿದ್ದ ಘಟನೆಯೊಂದು ತಡವಾಗಿ ಬೆಳಕಿಗೆ ಬಂದಿದೆ. ಕೃಷಿ ಚಟುವಟಿಕೆಗೆ ಮನೆಮಂದಿಯೆಲ್ಲಾ ತೆರಳಿದ್ದ ವೇಳೆ ಗಿಣಿಯಿದ್ದ ಪಂಜರದೊಳಕ್ಕೆ ನುಸುಳಲು ಹಾವೊಂದು ಯತ್ನಿಸುತ್ತಿದ್ದದ್ದನ್ನು ಆಟವಾಡುತ್ತಿದ್ದ ಕಾರ್ತಿಕ್ ನೋಡಿದ್ದಾನೆ‌. ಕೂಡಲೇ, ಪಾಲಕರನ್ನು ಕರೆದನಾದರೂ ಯಾರಿಗೂ ಈತನ ಧ್ಚನಿ ಕೇಳಿಸಿಲ್ಲ.

ತಾವು ಸಾಕಿದ ಮುದ್ದು ಗಿಣಿಯನ್ನು ಕಣ್ಣೆದುರೇ ಹಾವೊಂದು ಬೇಟೆಯಾಡುತ್ತಿರುವುದನ್ನು ಕಂಡ ಬಾಲಕ ಕಾರ್ತಿಕ್​ ಕೂಡಲೇ ಹಾವನ್ನು ಎಳೆದಾಡಿ, ದೂರಕ್ಕೆ ಎಸೆದು ಗಿಣಿ ರಕ್ಷಿಸಿದ್ದಾನೆ ಎಂದು ತಿಳಿದು ಬಂದಿದೆ.

ಬಾಲಕನ ಸಮಯ ಪ್ರಜ್ಞೆಯಿಂದ ಗಿಣಿ ಉಳಿದರೂ ಈ ಮೊದಲೇ ಗಾಯಗೊಂಡಿದ್ದ ಹಾವು ಸತ್ತಿದೆ ಎಂದು ತಿಳಿದು ಬಂದಿದೆ. ಆದರೆ, ಹಾವು ಕಂಡರೆ ದೊಡ್ಡವರೇ ಭಯಪಡುವಾಗ ಧೈರ್ಯ ಮಾಡಿದ ಬಾಲಕನ ಗಿಣಿ ಪ್ರೀತಿ ನಿಜಕ್ಕೂ ಅಚ್ಚರಿಗೆ ಕಾರಣವಾಗಿದೆ.