ಬಳ್ಳಾರಿ: ಗಣಿನಾಡು ಬಳ್ಳಾರಿ ಜಿಲ್ಲಾದ್ಯಂತ ಅಂದಾಜು 18242 ವಿಶೇಷ ಚೇತನರಿದ್ದಾರೆ. ಆ ಪೈಕಿ 17641 ವಿಶೇಷ ಚೇತನರನ್ನು ಮತದಾರರ ಪಟ್ಟಿಯಲ್ಲಿ ಮಾರ್ಕ್ ಮಾಡಲಾಗಿದ್ದು, ಅವರಿಗೆ ಮತದಾನ ಮಾಡಲು ಅನುಕೂಲವಾಗುವಂತೆ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ಡಾ. ವಿ. ರಾಮಪ್ರಸಾತ್ ಮನೋಹರ ತಿಳಿಸಿದ್ದಾರೆ.
ಬಳ್ಳಾರಿಯ ಡಿಸಿ ಕಚೇರಿಯಲ್ಲಿಂದು ಈಟಿವಿ ಭಾರತದೊಂದಿಗೆ ಅವರು ಮಾತನಾಡಿ, ಏಪ್ರಿಲ್ 23ರಂದು ಮತದಾನ ಪ್ರಕ್ರಿಯೆ ನಡೆಯಲಿದೆ. ಆ ದಿನದಂದು ವಿಶೇಷ ಚೇತನರನ್ನು ಮತಗಟ್ಟೆಗೆ ಕರೆದುಕೊಂಡು ಬರಲು 322 ವಿಶೇಷ ವಾಹನಗಳ ಸೌಲಭ್ಯ ಕಲ್ಪಿಸಲಾಗಿದೆ ಎಂದು ಮನೋಹರ ತಿಳಿಸಿದ್ದಾರೆ.
ವಿಶೇಷ ಚೇತನರಿಗೆ ಅನುಕೂಲವಾಗಲು ತ್ರಿಸೈಕಲ್ ವ್ಯವಸ್ಥೆ, ಬೂತಗನ್ನಡಿ, ರ್ಯಾಂಪ್ ಹಾಗೂ ಪ್ರತಿ ಮತಗಟ್ಟೆಗೆ ಒಬ್ಬರು ಸಹಾಯಕರಂತೆ 2151 ಜನ ಸಹಾಯಕರನ್ನು ನೇಮಿಸಲು ಕ್ರಮ ವಹಿಸಲಾಗಿದೆ ಎಂದು ವಿವರಿಸಿದ್ದಾರೆ.
ಅಲ್ಲದೇ, ಸಿ ವಿಜಲ್ ಆ್ಯಪ್ ಮೂಲಕ ಹಣ ಹಂಚಿಕೆ ಸೇರಿದಂತೆ ಚುನಾವಣಾ ಅಕ್ರಮದ ಕುರಿತು ಸಾರ್ವಜನಿಕರು ದೂರು ನೀಡಬಹುದು. ಈಗಾಗಲೇ ಆ ಆ್ಯಪ್‌ಅನ್ನು ಮೊದಲಿಗೆ ತಮ್ಮ ಅಧಿಕಾರಿ ವರ್ಗದ ಸರಿಸುಮಾರು 300 ಮಂದಿಯ ಮೊಬೈಲ್ನಲ್ಲಿ ಪ್ರಾಯೋಗಿಕವಾಗಿ ಡೌನ್ಲೋಡ್ ಮಾಡಿ, ಅದರ ಸಾಧಕ-ಬಾಧಕಗಳನ್ನು ಪರಿಶೀಲಿಸಲಾಗಿದೆ. ಈ ಹಿಂದಿನ ಚುನಾವಣೆಯಲ್ಲಿ ಬೆಂಗಳೂರಿಗರಿಗೆ ಮಾತ್ರ ಈ ಆ್ಯಪ್ ಸೀಮಿತ ಆಗಿತ್ತು. ಆದರೀಗ ರಾಜ್ಯವ್ಯಾಪಿ ವಿಸ್ತರಿಸಲಾಗಿದೆ. ಆಯಾ ಜಿಲ್ಲೆಗಳ ದೂರುಗಳನ್ನೂ ಕೂಡ ನೋಡಬಹುದಾಗಿದೆ. ಯಾವುದಾದರೂ ಘಟನೆಯ ಕುರಿತು ಚುನಾವಣಾ ಆಯೋಗಕ್ಕೆ ದೂರು ನೀಡುವುದಾದರೆ ಇರುವ ಸ್ಥಳದಿಂದಲೇ ವಿಡಿಯೋ ಅಥವಾ ಫೋಟೋವನ್ನ ಅಪ್ಲೋಡ್ ಮಾಡಬಹುದು. ಆದರೆ, ದೂರಿನ ಕುರಿತಾದ ಯಾವುದೇ ಮಾಹಿತಿಯು ಆ ಸಿ ವಿಜಲ್ ಆ್ಯಪ್ನಲ್ಲಿ ದೊರಕುವುದಿಲ್ಲ. ಅದೇನಿದ್ದರೂ ಆಯೋಗಕ್ಕೆ ಮಾತ್ರ ದೊರಕಲಿದೆ. ಅಲ್ಲದೇ, ದೂರು ನೀಡಿದಾಕ್ಷಣ ಸತ್ಯವೆಂದಲ್ಲ. ಅದನ್ನ ಪರಿಶೀಲಿಸಿ ಮುಂದಿನ ಕ್ರಮ ಜರುಗಿಸಬಹುದಷ್ಟೇ ಎಂದರು.
ಮಹಿಳಾ ಮತದಾರರು ಹೆಚ್ಚಿನ ಸಂಖ್ಯೆಯಲ್ಲಿರುವುದರಿಂದ ಹಾಗೂ ಕಡಿಮೆ ಮತದಾನ ಕೇಂದ್ರಗಳಲ್ಲಿ ಮತದಾನ ಪ್ರಮಾಣವನ್ನು ಹೆಚ್ಚಿಸುವ ದೃಷ್ಟಿಯಿಂದ ಒಟ್ಟು 17 ಪಿಂಕ್/ಸಖಿ ಮತಗಟ್ಟೆಗಳನ್ನು ಸ್ಥಾಪಿಸಲು ಮತಗಟ್ಟೆಗಳನ್ನು ಈಗಾಗಲೇ ಗುರುತಿಸಲಾಗಿದೆ ಎಂದರು.
ಜಿಲ್ಲೆಯಲ್ಲಿ ಇವಿಎಂ ಮತ್ತು ವಿವಿಪ್ಯಾಟ್ ಬಗ್ಗೆ ಜಾಗೃತಿ ಮೂಡಿಸಲು 223 ತಂಡಗಳನ್ನು ರಚನೆ ಮಾಡಲಾಗಿದೆ. ಪ್ರತಿ ದಿನ 91 ಇವಿಎಂ ಮತ್ತು ವಿವಿಪ್ಯಾಟ್‍ಗಳ ಮೂಲಕ ಜಿಲ್ಲಾ, ತಾಲೂಕು ಹಾಗೂ ಮತಗಟ್ಟೆ ಮಟ್ಟದಲ್ಲಿ ಜಾಗೃತಿ ಮೂಡಿಸಲಾಗುತ್ತಿದೆ. ಮಾ. 15 ರೊಳಗೆ ಎಲ್ಲ ಮತಗಟ್ಟೆ ಪ್ರದೇಶಗಳಲ್ಲಿ ಜಾಗೃತಿ ಮೂಡಿಸಲಾಗುವುದು ಎಂದರು.
