ಆಂಧ್ರದ ವಧುವಿನ ಜೊತೆ ವಿವಾಹವಾದ ಶಾಸಕರ ಪುತ್ರ: ಕೊರೊನಾ ರೂಲ್ಸ್ ಬ್ರೇಕ್ ಮಾಡಿದ ಪಿಟಿಪಿ

ಹಡಗಲಿ ಶಾಸಕ ಪಿ. ಟಿ. ಪರಮೇಶ್ವರ ನಾಯ್ಕ ಪುತ್ರ ಅವಿನಾಶ ಮತ್ತು ಆಂಧ್ರ ಪ್ರದೇಶದ ಅನಂತಪುರ ಜಿಲ್ಲೆಯ ಡಾ. ಕೆ. ಚರಣಿ ಅವರ ವಿವಾಹ ಸೋಮವಾರ ಹರಪನಹಳ್ಳಿ ತಾಲೂಕಿನ ಲಕ್ಷ್ಮೀಪುರ ಗ್ರಾಮದಲ್ಲಿ ಸಂಬಂಧಿಕರ ಸಮ್ಮುಖದಲ್ಲಿ ನೆರವೇರಿತು. ಈ ವೇಳೆ ಕೊರೊನಾ ಆದೇಶ ಉಲ್ಲಂಘಿಸಲಾಗಿದೆ ಎಂಬ ಆರೋಪ ಕೇಳಿಬಂದಿದೆ.

ಬಳ್ಳಾರಿ: ಹಡಗಲಿ ಶಾಸಕ ಪಿ. ಟಿ. ಪರಮೇಶ್ವರ ನಾಯ್ಕ ತಮ್ಮ ಪುತ್ರ ಅವಿನಾಶ​ಗೆ ನೆರೆಯ ಆಂಧ್ರ ಪ್ರದೇಶ ಯುವತಿ ಜೊತೆ ವಿವಾಹ ಮಾಡುವ ಮೂಲಕ ಕೋವಿಡ್- 19 ನಿಯಮ ಉಲ್ಲಂಘಿಸಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ.

ಆಂಧ್ರ ಪ್ರದೇಶದ ಅನಂತಪುರ ಜಿಲ್ಲೆಯ ಡಾ. ಕೆ. ಚರಣಿ ಮತ್ತು ಪಿ. ಅವಿನಾಶ ಅವರ ವಿವಾಹ ಸೋಮವಾರ ಹರಪನಹಳ್ಳಿ ತಾಲೂಕಿನ ಲಕ್ಷ್ಮೀಪುರ ಗ್ರಾಮದಲ್ಲಿ ಸಂಬಂಧಿಕರ ಸಮ್ಮುಖದಲ್ಲಿ ನೆರವೇರಿತು.

ಆಂಧ್ರದ ವಧುವಿನ ಜೊತೆ ವಿವಾಹವಾದ ಶಾಸಕರ ಪುತ್ರ

ವಿವಾಹ ಸಮಾರಂಭದಲ್ಲಿ ವಧು ಸೇರಿದಂತೆ, ವಧುವಿನ ಸಂಬಂಧಿಕರು ಸುಮಾರು 300 ಜನ ಆಂಧ್ರಪ್ರದೇಶದಿಂದ ಆಗಮಿಸಿದ್ದರು. ಆಂಧ್ರಪ್ರದೇಶದಲ್ಲಿ ಕೊರೊನಾ ಆರ್ಭಟ ಹೆಚ್ಚಾಗಿದ್ದು, ವಿವಾಹಕ್ಕೆ ಆಗಮಿಸಿದ ತಮ್ಮ ಸಂಬಂಧಿಕರನ್ನು ಶಾಸಕರು ಕ್ವಾರಂಟೈನ್​ನಲ್ಲಿಟ್ಟಿದ್ದರಾ? ಎನ್ನುವ ಪ್ರಶ್ನೆ ಜನ ಸಾಮಾನ್ಯರಲ್ಲಿ ವ್ಯಕ್ತವಾಗಿದೆ. ಜನ ಸಾಮಾನ್ಯರಿಗೆ ಒಂದು ನ್ಯಾಯ ಶಾಸಕರಿಗೆ ಒಂದು ನ್ಯಾಯ ಎಂದು ಶಾಸಕರ ವಿರುದ್ಧ ಸ್ಥಳೀಯರು ಬೇಸರ ವ್ಯಕ್ತಪಡಿಸಿದ್ದಾರೆ.