ಬಳ್ಳಾರಿ: ಕೋವಿಡ್ ರಾಜ್ಯದ ಪ್ರತೀ ಕ್ಷೇತ್ರದ ಮೇಲೂ ಪರಿಣಾಮ ಬೀರಿದೆ. ಕಳೆದ ವರ್ಷವೂ ಸೋಂಕು ತಡೆಗೆ ಲಾಕ್ಡೌನ್ ಘೋಷಣೆಯಾಗಿತ್ತು. ಹಂತ ಹಂತವಾಗಿ ಅನ್ಲಾಕ್ ಆಗುತ್ತಾ ಚೇತರಿಕೆ ಕಾಣುವಷ್ಟರಲ್ಲಿ ಕೋವಿಡ್ ಎರಡನೇ ಅಲೆ ಅವಾಂತರ ಸೃಷ್ಟಿಸಿಬಿಟ್ಟಿದೆ. ಇದೀಗ ಸೋಂಕು ತಡೆಗೆ ಮತ್ತೆ ಲಾಕ್ಡೌನ್ ಜಾರಿಯಾಗಿದೆ. ಬಳ್ಳಾರಿಯ ರೈಲ್ವೆ ನಿಲ್ದಾಣದ ಹೋಟೆಲ್, ಕ್ಯಾಂಟೀನ್ಗಳ ಮೇಲೂ ಕೋವಿಡ್ ಕರಿಛಾಯೆ ಬೀರಿದ್ದು, ಕಳೆದ ವರ್ಷದಿಂದ ಆರ್ಥಿಕ ಸಂಕಷ್ಟ ಎದುರಿಸುತ್ತಿವೆ.
ಕೋವಿಡ್ ಎರಡನೇ ಅಲೆ ವ್ಯಾಪಕವಾಗಿ ಹರಡಲು ಶುರುವಾದಾಗಿನಿಂದ ಬಳ್ಳಾರಿ ರೈಲ್ವೆ ನಿಲ್ದಾಣದಲ್ಲಿ ರೈಲು ಪ್ರಯಾಣಿಕರ ಸಂಖ್ಯೆ ಬಹಳಷ್ಟು ಕ್ಷೀಣಿಸಿದೆ. ಇದ್ರಿಂದ ಕ್ಯಾಂಟೀನ್ಗಳ ನಿರ್ವಹಣೆಗೂ ಕೂಡ ತೀರಾ ಸಮಸ್ಯೆಯಾಗಿದೆ. ಲಾಕ್ಡೌನ್ಗೂ ಮುಂಚೆ ಒಂದೊಂದು ಕ್ಯಾಂಟೀನ್ಗಳಲ್ಲಿ 3-4 ಮಂದಿ ಕಾರ್ಮಿಕರು ಕಾರ್ಯನಿರ್ವಹಿಸುತ್ತಿದ್ದರು. ಆದರೀಗ, ಆ ಸಂಖ್ಯೆ ಶೂನ್ಯಕ್ಕೆ ಬಂದು ನಿಂತಿದೆ. ಒಬ್ಬರ ವೇತನ ಕೊಡೋದಕ್ಕೂ ಕೂಡ ಕ್ಯಾಂಟೀನ್ ಮಾಲೀಕರು ಆರ್ಥಿಕ ಸಂಕಷ್ಟ ಎದುರಿಸುತ್ತಿದ್ದಾರೆ. ರೈಲ್ವೆ ನಿಲ್ದಾಣದ ಕ್ಯಾಂಟೀನ್ಗಳ ಟೆಂಡರ್ ಪ್ರಕ್ರಿಯೆಯಲ್ಲಾದ ವಂತಿಗೆಯನ್ನೂ ಸಹ ಕಟ್ಟಲಿಕ್ಕೆ ಹೆಣಗಾಡುತ್ತಿರೋದು ಇದೀಗ ಬೆಳಕಿಗೆ ಬಂದಿದೆ.
ಲಾಕ್ಡೌನ್ ಹಿನ್ನೆಲೆ ಸೀಮಿತ ರೈಲುಗಳ ಸಂಚಾರಕ್ಕೆ ಕೇಂದ್ರ ಸರ್ಕಾರ ಅನುವು ಮಾಡಿ ಕೊಟ್ಟಿದೆಯಾದ್ರೂ ಕೂಡ ಸಾಮಾಜಿಕ ಅಂತರ ಕಾಯ್ದುಕೊಂಡೇ ರೈಲುಗಳಲ್ಲಿ ಪ್ರಯಾಣಿಸಬೇಕಿದೆ. ಅದರಲ್ಲೂ ಈ ಸಾಂಕ್ರಾಮಿಕ ಕಾಯಿಲೆ ಹರಡುವ ಭಯದಲ್ಲೇ ಪ್ರಯಾಣಿಕರಿದ್ದು, ಉಚಿತವಾಗಿ ಕೊಡುವ ಆಹಾರ ಪೊಟ್ಟಣಗಳನ್ನೇ ತೆಗೆದುಕೊಳ್ಳಲು ಹಿಂಜರಿಯುತ್ತಾರೆ. ಇಂತಹ ಪರಿಸ್ಥಿತಿಯಲ್ಲಿ ಹಣ ಕೊಟ್ಟು ಖರೀದಿಸೋದು ದೂರದ ಮಾತು. ಕೋವಿಡ್ ಸಂದಿಗ್ಧ ಪರಿಸ್ಥಿತಿಯಲ್ಲಿ ರೈಲ್ವೆ ನಿಲ್ದಾಣದ ಹೋಟೆಲ್, ಕ್ಯಾಂಟೀನ್ಗಳಲ್ಲಿ ಹೇಗೆ ತಾನೆ ಹಣ ಕೊಟ್ಟು ಆಹಾರ ಖರೀದಿಸಲು ಮುಂದಾಗುತ್ತಾರೆ ಎಂದು ನೀವೇ ಹೇಳಿ ಅಂತಾ ರೈಲು ಪ್ರಯಾಣಿಕರೊಬ್ಬರು ಪ್ರಶ್ನೆ ಮಾಡಿದ್ದಾರೆ.
ಈ ಸಂಬಂಧ ನಮ್ಮ ಬಳ್ಳಾರಿ ಈಟಿವಿ ಭಾರತ ಪ್ರತಿನಿಧಿಯೊಂದಿಗೆ ಮಾತನಾಡಿದ ಬಳ್ಳಾರಿ ರೈಲು ನಿಲ್ದಾಣದ ಕ್ಯಾಂಟೀನ್ ಮಾಲೀಕ ವಿಜಯ ಅಗರವಾಲ, ಕಳೆದ ಎರಡು ವರ್ಷಗಳಿಂದಲೂ ರೈಲು ನಿಲ್ದಾಣದ ಹೋಟೆಲ್ ಮತ್ತು ಕ್ಯಾಂಟೀನ್ಗಳು ಆರ್ಥಿಕ ಸಂಕಷ್ಟ ಎದುರಿಸುತ್ತಿವೆ. ಹೀಗಾಗಿ, ನಾವುಗಳು ಸೇವೆ ರೂಪದಲ್ಲಿ ಕ್ಯಾಂಟೀನ್ಗಳನ್ನು ನಡೆಸುತ್ತಿದ್ದೇವೆ. ಇದರಿಂದ ಕಾರ್ಮಿಕರ ಮಾಸಿಕ ವೇತನ ಹಾಗೂ ಮಳಿಗೆಗಳ ಮಾಸಿಕ ಬಾಡಿಗೆ ಕೂಡ ನಮ್ಮ ಕೈಯಾರೆ ಕಟ್ಟುತ್ತಿದ್ದೇವೆ. ಇದು ಸತತ ಎರಡು ವರ್ಷಗಳಿಂದಲೂ ಹೀಗೆಯೇ ಮುಂದುವರೆದಿದೆ ಎಂದ್ರು ವಿಜಯ ಅಗರವಾಲ.
