ಬೆಳಗಾವಿ:ಗಣ್ಯ ವ್ಯಕ್ತಿಗಳು ಹಾಗೂ ಅಮಾಯಕ ಯುವಕರನ್ನೇ ಟಾರ್ಗೆಟ್ ಮಾಡಿ ಫೇಸ್ಬುಕ್ನಲ್ಲಿ ಬೆತ್ತಲಾಗುವ ಚೆಂದುಳ್ಳಿ ಚೆಲುವೆಯರು ಬಳಿಕ ಬ್ಲ್ಯಾಕ್ ಮಾಡಿ ಹಣ ಕೀಳ್ತಿರುವ ಆನ್ಲೈನ್ ಹನಿಟ್ರ್ಯಾಪ್ ಗ್ಯಾಂಗ್ ಬೆಳಗಾವಿಯಲ್ಲಿ ಸಕ್ರಿಯವಾಗಿದೆ.
ಈಗಾಗಲೇ ನಾಲ್ಕೈದು ಪ್ರಕರಣಗಳು ಬೆಳಗಾವಿಯಲ್ಲಿ ಬೆಳಕಿಗೆ ಬಂದಿವೆ. ಯಾಮಾರಿ ಸಾವಿರಾರು ರೂಪಾಯಿ ಕಳೆದುಕೊಂಡಿರುವವರ ಬಳಿ ಮತ್ತೆ ಹಣ ನೀಡುವಂತೆ ಈ ಗ್ಯಾಂಗ್ ಸತಾಯಿಸುತ್ತಿದೆ. ಇದರಿಂದ ರೋಸಿ ಹೋಗಿರುವ ಸಂತ್ರಸ್ತರು ಬೆಳಗಾವಿಯ ಸಿಇಎನ್ ಠಾಣೆ ಮೆಟ್ಟಿಲೇರಿದ್ದಾರೆ.
ಗಣ್ಯ ವ್ಯಕ್ತಿಗಳು, ಯುವಕರೇ ಟಾರ್ಗೆಟ್!
ಫೇಸ್ಬುಕ್ನಲ್ಲಿ ಚೆಂದದ ಫೋಟೋಗಳನ್ನು ಹರಿಬಿಡುವ ಮೂಲಕ ಗಣ್ಯ ವ್ಯಕ್ತಿಗಳು ಹಾಗೂ ಯುವಕರನ್ನೇ ಈ ಚೆಲುವೆಯರ ಗ್ಯಾಂಗ್ ಟಾರ್ಗೆಟ್ ಮಾಡ್ತಿದೆ. ಫ್ರೆಂಡ್ ರಿಕ್ವೆಸ್ಟ್ ಕಳಿಸುವ ಚೆಂದುಳ್ಳಿಯರು ಅಕ್ಸೆಪ್ಟ್ ಆಗ್ತಿದ್ದಂತೆ ಮೆಸೇಂಜರ್ನಲ್ಲಿ ಚಾಟ್ ಶುರು ಹಚ್ಚಿಕೊಳ್ಳುತ್ತಾರೆ. ಕೆಲ ದಿನಗಳ ಕಾಲ ಚಾಟ್ ಮಾಡಿ ವಿಶ್ವಾಸಗಳಿಸುವ ಯುವತಿಯರು, ಬಳಿಕ ವಾಟ್ಸ್ಆ್ಯಪ್ ನಂಬರ್ ಶೇರ್ ಆಗುವಂತೆ ನೋಡಿಕೊಳ್ಳುತ್ತಾರೆ.
ಬಳಿಕ ವಿಡಿಯೋ ಕಾಲ್ ಮಾಡಿ ನಗ್ನವಾಗಿ ಕಾಣಿಸಿಕೊಳ್ಳುತ್ತಾರೆ. ಎದುರಿನವರನ್ನು ನಗ್ನವಾಗುವಂತೆ ಪ್ರಚೋದಿಸುತ್ತಾರೆ. ಆಗ ನಗ್ನವಾಗಿದ್ದುಕೊಂಡು ಸಂಭಾಷಣೆಯ ದೃಶ್ಯವನ್ನು ಸ್ಕ್ರೀನ್ ರೆಕಾರ್ಡಿಂಗ್ ಮಾಡಿಕೊಳ್ಳುತ್ತಾರೆ. ನಂತರ ತಮ್ಮ ಅಸಲಿ ಆಟ ಶುರು ಮಾಡುವ ಈ ನಾರಿಮಣಿಯರು ಮೊದಲು ಸಣ್ಣ ಪ್ರಮಾಣದ ಹಣಕ್ಕೆ ಬೇಡಿಕೆ ಇಡುತ್ತಾರೆ. ಹಣ ನೀಡಲು ನಿರಾಕರಿಸಿದರೆ ನಗ್ನ ದೃಶ್ಯಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಡುವ ಬೆದರಿಕೆ ಹಾಕುತ್ತಾರೆ.
ಆಗ ಸಾಕಷ್ಟು ಜನರು ಮರ್ಯಾದೆಗೆ ಅಂಜಿ ಹಣ ನೀಡುತ್ತಾರೆ. ಇಷ್ಟಕ್ಕೆ ಸುಮ್ಮನಿರದ ಈ ಆನ್ಲೈನ್ ಹನಿಟ್ರ್ಯಾಪ್ ಗ್ಯಾಂಗ್ನವರು ಪದೇ ಪದೆ ಹಣ ನೀಡುವಂತೆ ಕಾಟ ನೀಡುತ್ತಾರೆ.
ಪೊಲೀಸರ ಮನವಿ ಏನು?
ಫೇಸ್ಬುಕ್ನಲ್ಲಿ ಅಪರಿಚಿತರ ಫ್ರೆಂಡ್ ರಿಕ್ವೆಸ್ಟ್ ಎಕ್ಸೆಪ್ಟ್ ಮಾಡಿಕೊಳ್ಳದಂತೆ ಮಹಾನಗರ ಡಿಸಿಪಿ ಡಾ. ವಿಕ್ರಂ ಆಮಟೆ ಮನವಿ ಮಾಡಿದ್ದಾರೆ. ರಿಕ್ವೆಸ್ಟ್ ಸ್ವೀಕರಿಸಿದ್ರೂ ಮೆಸೇಂಜರ್ನಲ್ಲಿ ಚಾಟ್ ಮಾಡಬಾರದು. ಆಗ ಮಾತ್ರ ಆನ್ಲೈನ್ ಹನಿಟ್ರ್ಯಾಪ್ ಗ್ಯಾಂಗ್ನಿಂದ ಬಚಾವ್ ಆಗಲು ಸಾಧ್ಯ. ಇಲ್ಲವಾದರೆ ಹಣ ಕಳೆದುಕೊಳ್ಳಬೇಕಾಗುತ್ತದೆ. ಈಗಾಗಲೇ ಯಾರಿಗಾದರೂ ಈ ರೀತಿಯ ವಂಚನೆ ಆಗ್ತಿದ್ದರೆ ದಯವಿಟ್ಟು ಪೊಲೀಸರಿಗೆ ದೂರು ನೀಡಬೇಕು. ದೂರುದಾರರ ಮಾಹಿತಿಯನ್ನು ಗೌಪ್ಯವಾಗಿಡುವುದಾಗಿ ತಿಳಿಸಿದ್ದಾರೆ.
