ಕಾಟಾಚಾರಕ್ಕೆ ಸಭೆಗೆ ಹಾಜರಾದ ಅಧಿಕಾರಿ... ವಾಟ್ಸ್ಯಾಪ್​ ಚಾಟಿಂಗ್​ನಲ್ಲಿ ಬ್ಯುಸಿ..!

ಅಧಿಕಾರಿಗಳ ನಿರ್ಲಕ್ಷ್ಯತನ ಎಂಬುದು ಪದೇ ಪದೇ ಸಾಬೀತಾಗುತ್ತಿದೆ. ಜನರ ಸಮಸ್ಯೆಗೆ ಸ್ಪಂದಿಸದೆ ಕಾರ್ಯನಿರ್ವಹಣೆಯಲ್ಲಿ ಆಲಸ್ಯ ತೋರುವ ಅಧಿಕಾರಿಗಳ ಪಟ್ಟಿ ಏರುತ್ತಿದೆ. ಆ ಪಟ್ಟಿಗೆ ಈಗ ಮತ್ತೊಬ್ಬರು ಸೇರಿದದ್ದಾರೆ. ರಾಜ್ಯವೇ ಪ್ರವಾಹಕ್ಕೆ ತುತ್ತಾಗಿ ಬಳಲಿರುವಾಗ ಈ ಅಧಿಕಾರಿ ಮಾತ್ರ ವಾಟ್ಸ್ಯಾಪ್​ನಲ್ಲಿ ಬ್ಯುಸಿಯಾಗಿದ್ದರು.

ಚಿಕ್ಕೋಡಿ: ಜಿಲ್ಲೆಯಲ್ಲಿ ಒಂದು ಕಡೆ ಭೀಕರ ಪ್ರವಾಹದಿಂದ ಜನ ನಲುಗಿದ್ದಾರೆ. ಆದ್ರೆ ಕೆಲ ಅಧಿಕಾರಿಗಳ ನಿರ್ಲಕ್ಷ್ಯ ಮಾತ್ರ ಮುಂದುವರೆದಿದೆ. ಇದಕ್ಕೆ ಸಾಕ್ಷಿ ಎನ್ನುವಂತೆ ಬೆಳಗಾವಿ ಜಿಲ್ಲಾ ಆಹಾರ ಇಲಾಖೆಯ ಉಪ ನಿರ್ದೇಶಕರೋರ್ವರು ನೂತನ ಸಚಿವರು ಕರೆದಿದ್ದ ಪ್ರವಾಹದ ಸಭೆಯಲ್ಲೇ ವಾಟ್ಸ್ಯಾಪ್​ ಚಾಟಿಂಗ್ ಮಾಡುತ್ತಾ ಕಾಟಾಚಾರಕ್ಕೆ ಸಭೆಗೆ ಹಾಜರಾಗಿರುವಂತೆ ವರ್ತಿಸಿರುವ ವಿಡಿಯೋ ವೈರಲ್​ ಆಗಿದೆ.

ಚಿಕ್ಕೋಡಿ ಉಪ ವಿಭಾಗ ವ್ಯಾಪ್ತಿಯ ಸಭೆಯನ್ನ ಚಿಕ್ಕೋಡಿ ಪ್ರವಾಸಿ ಮಂದಿರದಲ್ಲಿ ಯಡಿಯೂರಪ್ಪ ನೂತನ ಸಚಿವರಾದ ಲಕ್ಷ್ಮಣ್​ ಸವದಿ ಹಾಗೂ ಶಶಿಕಲಾ ಜೊಲ್ಲೆ ಕರೆದಿದ್ದರು. ಆದ್ರೆ ಸಭೆಯಲ್ಲಿ ಜವಾಬ್ದಾರಿಯುತವಾಗಿ ವರ್ತಿಸಬೇಕಿದ್ದ ಆಹಾರ ಇಲಾಖೆಯ ಉಪ ನಿರ್ದೇಶಕಿ ಆಫ್ರಿನಾ ಬಾನು ಬಳ್ಳಾರಿ ಅವರು ಸಭೆಯಲ್ಲೇ ವಾಟ್ಸ್ಯಾಪ್​ ಚಾಟಿಂಗ್​ನಲ್ಲಿ ಬ್ಯುಸಿ ಆಗಿರುವ ದೃಶ್ಯಗಳು ಕ್ಯಾಮರಾ ಕಣ್ಣಲ್ಲಿ ಸೆರೆಯಾಗಿವೆ.

ಭೀಕರ ಪ್ರವಾಹ ಸಭೆಯಲ್ಲೂ ನಿರ್ಲಕ್ಷ್ಯ ತೋರಿರುವ ಅಧಿಕಾರಿ ವರ್ತನೆ ಸಾರ್ವಜನಿಕನರ ಆಕ್ರೋಶಕ್ಕೆ ಕಾರಣವಾಗಿದೆ. ಕಳೆದ ಮೂರು ವರ್ಷಗಳ ಹಿಂದೆ ಇದೇ ಅಧಿಕಾರಿ ಹುಕ್ಕೇರಿ ತಹಶಿಲ್ದಾರ್​ ಆಗಿದ್ದ ವೇಳೆ ಆಗಸ್ಟ್ 15 ರಂದು ರಾಷ್ಟ್ರ ಧ್ವಜವನ್ನ ಉಲ್ಟಾ ಹಾರಿಸಿ ನಿರ್ಲಕ್ಷ್ಯ ತೋರಿದ್ದರು ಎನ್ನಲಾಗ್ತಿದೆ.