ಅಥಣಿ/ಬೆಳಗಾವಿ: ಲೋಕಸಭಾ ಸದಸ್ಯ ಅಣ್ಣಾಸಾಹೇಬ ಜೊಲ್ಲೆ ಇದುವರೆಗೂ ಅಥಣಿಯ ಯಾವುದೇ ನೆರೆಪೀಡಿತ ಸ್ಥಳಗಳಿಗೆ ಭೇಟಿ ನೀಡದ ಹಿನ್ನೆಲೆ ಮುಂಬರುವ ದಿನಗಳಲ್ಲಿ ಅವರಿಗೆ ಮತ್ತು ಉತ್ತರ ಕರ್ನಾಟಕ ಪ್ರಭಾವಿ ನಾಯಕರಿಗೆ ತಕ್ಕ ಪಾಠ ಕಲಿಸ್ತೀವಿ ಎಂದು ನೆರೆಪೀಡಿತರು ಅಸಮಾಧಾನ ಹೊರಹಾಕಿದ್ರು.
ನೆರೆ ಸಂತ್ರಸ್ತರ ಮನೆ ಸರ್ವೇ ತಾರತಮ್ಯ ವಿಚಾರವಾಗಿ ಅಥಣಿ ತಾಲೂಕಿನಲ್ಲಿ ಸಂತ್ರಸ್ತ ಗ್ರಾಮಗಳಾದ ಝುಂಜರವಾಡ, ಶಿರಹಟ್ಟಿ, ಸವದಿ, ಮಹಿಷವಾಡಗಿ, ಸಪ್ತಸಾಗರ, ಜೋಗುಳ ಹೀಗೆ 26 ಹಳ್ಳಿಗಳ ಗ್ರಾಮಸ್ಥರು ಮತ್ತು ಅಥಣಿ ಅನರ್ಹ ಶಾಸಕ ಮಹೇಶ್ ಕುಮಟಳ್ಳಿ ನೇತೃತ್ವದಲ್ಲಿ ಅಥಣಿ ದಂಡಾಧಿಕಾರಿ ಬಳಿಗೇರ ಜೊತೆ ಸಭೆ ನಡೆಸಿದ್ರು.
ಈ ವೇಳೆ ಮಾತನಾಡಿದ ರೈತ ಮುಖಂಡರು, ತಾಲೂಕಿನ ಪ್ರಭಾವಿ ನಾಯಕರು ನೆರೆ ಸಂತ್ರಸ್ತರ ವಿಚಾರದಲ್ಲಿ ತಾರತಮ್ಯ ಎಸಗುತ್ತಿದ್ದಾರೆ. ಸರ್ಕಾರ ಕಬ್ಬಿಗೆ ಎಕರೆಗೆ ಕನಿಷ್ಠ 50 ಸಾವಿರ ರೂ ಆದ್ರೂ ಪರಿಹಾರ ಹಣ ನೀಡಬೇಕೆಂದು ಸಿಎಂಗೆ ಮನವಿ ಮಾಡಿದ್ರೂ ಯಾವುದೇ ಪ್ರಯೋಜನವಾಗಿಲ್ಲ. ಬದಲಿಗೆ ಕೇವಲ 13 ಸಾವಿರ ರೂ ಕೊಡ್ತೀವಿ ಎಂದು ಹೇಳುತ್ತಾರೆ ಎಂದು ಅಳಲು ತೋಡಿಕೊಂಡರು. ನೆರೆ ಪರಿಹಾರ ಹಂಚಿಕೆಯಲ್ಲೂ ಸರ್ಕಾರ ತಾರತಮ್ಯ ಎಸಗುತ್ತಿದೆ ಎಂದು ಆರೋಪಿಸಿದ್ರು.
