ಉಪಚುನಾವಣೆ - ಇಂದು ಸಿಎಂ ಬಿಎಸ್​ವೈ ಕೊನೆ ಹಂತದ ಕಸರತ್ತು: ಬೆಳಗಾವಿಯಲ್ಲಿ ಭರ್ಜರಿ ಪ್ರಚಾರ

ಜಿಟಿ ಜಿಟಿ ಮಳೆಯಲ್ಲಿ ನೀವೆಲ್ಲಾ ಕೂತಿದ್ದಿರಿ ಇದು ಒಳ್ಳೆಯ ಶುಭ ಸೂಚನೆ,ಅಥಣಿ ಮಹೇಶ್​ ಕುಮಠಳ್ಳಿ ಮತ್ತು ಕಾಗವಾಡದಲ್ಲಿ ಶ್ರೀಮಂತ ಪಾಟೀಲ್​ ಹಾಗೂ ಗೋಕಾಕದಲ್ಲಿ ರಮೇಶ್ ಜಾರಕಿಹೋಳಿ ಗೆಲ್ಲಿಸುತ್ತಿರಿ ಅನ್ನುವ ಭರವಸೆ ಇದೆ ಎಂದು ಮತದಾರರನ್ನು ಕುರಿತು ಸಿಎಂ ಬಿಎಸ್​ ಯಡಿಯೂರಪ್ಪ ವಿಶ್ವಾಸದ ಮಾತುಗಳನ್ನ ಆಡಿದ್ದಾರೆ.

ಚಿಕ್ಕೋಡಿ: ಕಾಲಿಗೆ ಚಕ್ರ ಕಟ್ಟಿಕೊಂಡಂತೆ ಸಿಎಂ ಯಡಿಯೂರಪ್ಪ ಬಿಜೆಪಿ ಅಭ್ಯರ್ಥಿಗಳ ಪರ ಭರ್ಜರಿ ಪ್ರಚಾರ ನಡೆಸಿದ್ದಾರೆ. ಬೆಳಗಾವಿ ಜಿಲ್ಲೆಯ ಅಥಣಿ ಹಾಗೂ ಕಾಗವಾಡ ಮತ ಕ್ಷೇತ್ರದಲ್ಲಿ ಎಡೆಬಿಡದೆ ಪ್ರಚಾರ ಸಮಾವೇಶಗಳನ್ನೆ ನಡೆಸಿ ಶತಾಯಗತಾಯ ಬಿಜೆಪಿ ಅಭ್ಯರ್ಥಿಗಳನ್ನ ಗೆಲ್ಲಿಸಲೇಬೇಕು ಅಂತ ಪಣತೊಟ್ಟಿದ್ದಾರೆ.

ಬೆಳಗ್ಗೆಯಿಂದ ಎರಡು ಕ್ಷೇತ್ರದಲ್ಲಿ ಒಂದಾದ ಮೇಲೊಂದು ಪ್ರಚಾರ ಕಾರ್ಯಕ್ರಮ ಹಾಗೂ ಮುಖಂಡರು ಜೊತೆ ಚರ್ಚೆ ಕೂಡ ನಡೆಸಿದರು. ಅಥಣಿಯಲ್ಲಿ ಬೃಹತ್ ಸಮಾವೇಶ ಮುಗಿಸಿ ಕಾಗವಾಡ ಕ್ಷೇತ್ರದ ಐನಾಪೂರ ಪಟ್ಟಣಕ್ಕೆ ಆಗಮಿಸಿದ ಸಿಎಂ ಯಡಿಯೂರಪ್ಪ ಮತಬೇಟೆಗೆ ಮುಂದಾದರು. ಹಣ,ಹೆಂಡ,ತೊಳ್ಬಲ, ಜಾತಿ ವಿಷಬೀಜ ಬಿತ್ತಿ ಚುನಾವಣೆ ಗೆಲ್ಲುವ ಕಾಂಗ್ರೆಸ್ ಜೆಡಿಎಸ್ ಗೆ ಡಿಸೆಂಬರ್ 9 ರಂದು ಜನ ಉತ್ತರಿಸುತ್ತಾರೆ. ಅವರಿಗೆ ಅಭಿವೃದ್ಧಿ ಬೇಕಾಗಿಲ್ಲ ಯಡಿಯೂರಪ್ಪ ಗೆ ಬಹುಮತ ಬರಬಾರದು, ಮತ್ತೆ ಚುನಾವಣೆ ನಡೆಯಬೇಕು ಎನ್ನುವ ಭ್ರಮೆಯಲ್ಲಿದ್ದಾರೆ ಎಂದು ಕಾಂಗ್ರೆಸ್​, ಜೆಡಿಎಸ್​ ವಿರುದ್ಧ ವ್ಯಂಗ್ಯವಾಡಿದರು.

ಈ ಉಪಚುನಾವಣೆಯಲ್ಲಿ ಶ್ರೀಮಂತ ಪಾಟೀಲ್‌ ಅವರನ್ನು 25 ಸಾವಿರತ ಮತಗಳಿಂದ ಆರಿಸಿ ತನ್ನಿ. ಈ ಕ್ಷೇತ್ರದಲ್ಲಿ ಏನೇನು ಯೋಜನೆ ಆಗಬೇಕು ಅಂತಾ ಅಪೇಕ್ಷ ಪಡ್ತಿರೋ ಅವೆಲ್ಲವೂ ಈಡೇರಿಸುವ ಭರವಸೆ ನೀಡುತ್ತೇನೆ ಎಂದು ಹೇಳಿದರು. ಅದರಲ್ಲು ನೀರಾವರಿ, ರೈತರ ಅಭಿವೃದ್ಧಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ. ಕರ್ನಾಟಕ ರಾಜ್ಯವನ್ನು ಮಾದರಿ ರಾಜ್ಯವನ್ನಾಗಿ ಮಾಡುವ ಕನಸು ಕಂಡಿದ್ದೇನೆ. ಶ್ರೀಮಂತ ಪಾಟೀಲ್ ಸೇರಿದಂತೆ 17 ಜನರ ರಾಜೀನಾಮೆ ನೀಡಿದ್ದರಿಂದ ಇಂದ ನಾನು ಸಿಎಂ ಆಗಿ ಅಧಿಕಾರ ಸಿಕ್ಕಿದೆ. ಶ್ರೀಮಂತ ಪಾಟೀಲ್​ ಅವರನ್ನು ಜೀವ‌ನ ಪೂರ್ತಿ ಮರೆಯಲ್ಲಾ ಎಂದು ಕೊಂಡಾಡಿದರು. ಮುಂದಿನ ದಿನದಲ್ಲಿ ಶ್ರೀಮಂತ ಪಾಟೀಲ್​​​ ಗೆ ಒಳ್ಳೆಯ ಸ್ಥಾನ ಸಿಗುತ್ತದೆ ಎಂದು ಭರವಸೆ ನೀಡುತ್ತೇನೆ ಎಂದು ಹೇಳಿದರು. ಕ್ಷೇತ್ರದ ಸಮಸ್ಯೆ ಬಗೆಹರಿಸಲು ಪ್ರಮಾಣಿಕ ಪ್ರಯತ್ನ ಮಾಡಿ ನಿಮ್ಮ ಕಣ್ಣೀರು ಒರೆಸುತ್ತೇನೆ. ಬರುವ ಡಿಸೆಂಬರ್ 5 ರಂದು ಕಮಲದ ಚಿನ್ಹೆಗೆ ಮತ ನೀಡಿ ಹೆಚ್ಚು ಮತಗಳಿಂದ ಆರಿಸಿ ತನ್ನಿ ಎಂದು ಶ್ರೀಮಂತ ಪಾಟೀಲ್​ ಪರ ಸಿಎಂ ಯಡಿಯೂರಪ್ಪ ಭರ್ಜರಿ ಮತಯಾಚನೆ ಮಾಡಿದರು.