ಬೆಂಗಳೂರು: ಕಳೆದ ಕೆಲವು ದಿನಗಳಿಂದ ರಾಜ್ಯ ಹೈಕೋರ್ಟ್ನ ಎಲ್ಲಾ ಪೀಠಗಳಲ್ಲಿ ಸ್ಥಗಿತಗೊಂಡಿದ್ದ ವೀಡಿಯೊ ಕಾನ್ಫರೆನ್ಸ್ ಸೇವೆ ಡಿ.11 ಸೋಮವಾರದಿಂದ ಪುನಾರಂಭವಾಗಲಿದೆ. ವಿಚಾರಣೆ ವೇಳೆ ವೀಡಿಯೊ ಕಾನ್ಫರೆನ್ಸ್ನಲ್ಲಿ ಭಾಗಿಯಾಗಲು ವಕೀಲರು, ಪಾರ್ಟಿ ಇನ್ ಪರ್ಸನ್ಸ್, ದಾವೆದಾರರಿಗೆ ಹೈಕೋರ್ಟ್ ಕಂಪ್ಯೂಟರ್ಸ್ ವಿಭಾಗ ಸುಧಾರಿತ ಮಾರ್ಗಸೂಚಿಗಳನ್ನು ಪ್ರಕಟಿಸಿದೆ.
ಮಾರ್ಗಸೂಚಿಗಳು ಹೀಗಿವೆ:
- ಜೂಮ್ ಅಪ್ಲಿಕೇಶನ್ನಲ್ಲಿ ಸೈನ್ಅಪ್ ಪ್ರಕ್ರಿಯೆ ಮೂಲಕ ಒಂದು ಬಾರಿಯ ಕ್ರಮದ ಭಾಗವಾಗಿ ಎಲ್ಲಾ ವಕೀಲರು, ಪಾರ್ಟಿ ಇನ್ ಪರ್ಸನ್ಸ್, ದಾವೆದಾರರು, ಮಾಧ್ಯಮದವರು ಕಡ್ಡಾಯವಾಗಿ ನೋಂದಣಿ ಮಾಡಿಕೊಳ್ಳಬೇಕು.
- ಜೂಮ್ ಆ್ಯಪ್ನಲ್ಲಿ ನೋಂದಾಣಿ ಮಾಡಿಕೊಳ್ಳುವುದಕ್ಕೂ ಮುನ್ನ ಪ್ರತಿಯೊಬ್ಬ ವಕೀಲ, ಪಾರ್ಟಿ ಇನ್ ಪರ್ಸನ್, ದಾವೆದಾರರು, ಸರ್ಕಾರಿ ಇಲಾಖೆಗಳು ಕಡ್ಡಾಯವಾಗಿ ಹೈಕೋರ್ಟ್ನ ಆನ್ಲೈನ್ ಡಿಜಿಟಲ್ ಕೇಸ್ ಡೈರಿ ಪೋರ್ಟಲ್ ನಲ್ಲಿ (https://karnatakajudiciary.kar.nic.in/advreg/) ಕಡ್ಡಾಯವಾಗಿ ನೋಂದಣಿ ಮಾಡಿಕೊಳ್ಳಬೇಕು.
- ಕಡ್ಡಾಯ ನೋಂದಣಿಯಾದರೆ ಮಾತ್ರ ಇ-ಮೇಲ್ ಐಡಿಗಳನ್ನು ವೈಟ್ಲಿಸ್ಟ್ ಮಾಡಲು ಸಾಧ್ಯ.
- ಸೈಬರ್ ಭದ್ರತಾ ದೃಷ್ಟಿಯಿಂದ ಈ ಕ್ರಮ ಅಗತ್ಯವಾಗಿದೆ.
- ಆನ್ಲೈನ್ ಡಿಜಿಟಲ್ ಕೇಸ್ ಡೈರಿ ಪೋರ್ಟಲ್ನಲ್ಲಿ ನೋಂದಣಿ ಮಾಡುವಾಗ ಬಳಕೆ ಮಾಡಲಾದ ಇ- ಮೇಲ್ ಐಡಿ ಸೈನ್ಅಪ್/ಲಾಗಿನ್ ಐಡಿಯಾಗಿ ಜೂಮ್ ವೀಡಿಯೊ ಕಾನ್ಫರೆನ್ಸ್ ವೇದಿಕೆಯಲ್ಲಿ ಬಳಕೆಯಾಗಲಿದೆ.
- ಈಗಾಗಲೇ ಆನ್ಲೈನ್ ಡಿಜಿಟಲ್ ಕೇಸ್ ಡೈರಿ ಪೋರ್ಟಲ್ನಲ್ಲಿ ನೋಂದಣಿ ಮಾಡಿಕೊಂಡಿರುವ ವಕೀಲರು, ಪಾರ್ಟಿ ಇನ್ ಪರ್ಸನ್ಸ್, ದಾವೆದಾರರು, ಸರ್ಕಾರಿ ಇಲಾಖೆಯವರು ಅಲ್ಲಿ ಬಳಕೆ ಮಾಡಿರುವ ಇ-ಮೇಲ್ ಐಡಿಯನ್ನು ಜೂಮ್ನಲ್ಲಿ ಬಳಕೆ ಮಾಡಬೇಕು.
- ವಕೀಲರು, ಪಾರ್ಟಿ ಇನ್ ಪರ್ಸನ್ಸ್, ದಾವೆದಾರರು ಕಾಸ್ಲಿಸ್ಟ್ ಪಟ್ಟಿ, ಪ್ರಕರಣದ ಸಂಖ್ಯೆ ಮತ್ತು ಹೆಸರನ್ನು ಉಲ್ಲೇಖಿಸಬೇಕು.
- ಅಕ್ರಿಡಿಟೇಷನ್ ಪಟ್ಟಿಯಲ್ಲಿ ಉಲ್ಲೇಖಿತವಾಗಿರುವ ಮಾಧ್ಯಮ ಪ್ರತಿನಿಧಿಗಳು ತಮ್ಮ ಇ-ಮೇಲ್ ಐಡಿಗಳನ್ನು ಹೈಕೋರ್ಟ್ನ ಕಂಪ್ಯೂಟರ್ಸ್ ರಿಜಿಸ್ಟ್ರಾರ್ ಅವರಿಗೆ ವೈಟ್ಲಿಸ್ಟ್ ಮಾಡಲು ಇ- ಮೇಲ್ ಕಳುಹಿಸಬೇಕು. ಮಾಧ್ಯಮ ಪ್ರತಿನಿಧಿಗಳು ತಮ್ಮ ಹೆಸರು, ಸಂಸ್ಥೆಯ ಹೆಸರನ್ನು ಕಡ್ಡಾಯವಾಗಿ ಉಲ್ಲೇಖಿಸಬೇಕು.
- ಕೋರ್ಟ್ ಹಾಲ್ಗಳಲ್ಲಿ ಕಾಯ್ದಿರಿಸುವ ರೂಮ್ಗಳು ಇರಲಿದ್ದು, ಸರಿಯಾದ ಪ್ರಕರಣದ ಸಂಖ್ಯೆ ಹೊಂದಿರುವವರನ್ನು ಮಾತ್ರ ವೀಡಿಯೊ ಕಾನ್ಫರೆನ್ಸ್ನಲ್ಲಿ ಭಾಗವಹಿಸಲು ಅನುಮತಿಸಲಾಗುವುದು.
- ವಿದೇಶಗಳಿಂದ ವಿಚಾರಣೆಯಲ್ಲಿ ಭಾಗವಹಿಸುವವರು ಮುಂಚಿತವಾಗಿ ನ್ಯಾಯಾಂಗ ರಿಜಿಸ್ಟ್ರಾರ್ ಅವರಿಗೆ ವೀಡಿಯೊ ಕಾನ್ಫರೆನ್ಸ್ನಲ್ಲಿ ಭಾಗವಹಿಸಲು ಅನುಮತಿ ಪಡೆದುಕೊಳ್ಳಬೇಕು.
- ಈ ರೀತಿಯಲ್ಲಿ ನೋಂದಾಯಿತ ಬಳಕೆದಾರರನ್ನು ವೀಡಿಯೊ ಕಾನ್ಫರೆನ್ಸ್ ಮೂಲಕ ಕಲಾಪಕ್ಕೆ ಅನುಮತಿಸಲು ನಿರ್ಧರಿಸಲಾಗಿದೆ ಎಂದು ಹೈಕೋರ್ಟ್ ರಿಜಿಸ್ಟ್ರಾರ್ ಪ್ರಕಟಣೆ ಹೊರಡಿಸಿದ್ದಾರೆ.
ಇದನ್ನೂ ಓದಿ: 2019-23ರಲ್ಲಿ ನಡೆದ ವಿವಿಧ ಕಾಮಗಾರಿಗಳ ತನಿಖೆಗೆ ಸಮಿತಿ ರಚನೆ: ಮಧ್ಯಂತರ ತಡೆ ನೀಡಿದ ಹೈಕೋರ್ಟ್
