ಬೆಂಗಳೂರು: ಕೊರೊನಾ ಅಂದರೆ ಭಯ ಬೇಡ- ಜಾಗೃತಿ ಇರಲಿ, ರೋಗ ಲಕ್ಷಣ ಕಾಣಿಸಿಕೊಂಡರೆ ಕೊರೊನಾ ಪರೀಕ್ಷೆ ಮಾಡಿಸಿ ಅಂತ ಆರೋಗ್ಯ ಇಲಾಖೆಯೇನೋ ಸಾರುತ್ತಿದೆ. ಆದರೆ, ಕೊರೊನಾ ಆತಂಕಕ್ಕೆ ಕೋವಿಡ್ ಟೆಸ್ಟ್ ಮಾಡಿಸುವ ಮಂದಿಗೆ ಬರುವ ರಿಪೋರ್ಟ್ ಟ್ವಿಸ್ಟ್ ಮೇಲೆ ಟ್ವಿಸ್ಟ್ ನೀಡಿ ಶಾಕ್ ಕೊಡುತ್ತಿದೆ. ಇದೇನು ಲ್ಯಾಬ್ಗಳಲ್ಲಿ ಆಗುವ ಎಡವಟ್ಟಾ ಅಥವಾ ಕೊರೊನಾ ವೈರಸ್ ನಾ ರಿಫ್ಲೆಕ್ಟಾ ಒಂದು ಗೊತ್ತಾಗುತ್ತಿಲ್ಲ.
ಹೌದು, ದಿನೇ ದಿನೆ ರಾಜ್ಯದಲ್ಲಿ ಸೋಂಕಿತರ ಸಂಖ್ಯೆ ಏರಿಕೆ ಆಗುತ್ತಿದ್ದು, ಸೋಂಕಿತರ ಸಂಪರ್ಕಿತರ ಸಂಖ್ಯೆಯು ಕಡಿಮೆ ಏನು ಇಲ್ಲ. ಇತ್ತ ಸೋಂಕು ನಿಯಂತ್ರಣಕ್ಕೆ ಬರಬೇಕು ಅಂದರೆ ಹೆಚ್ಚು ಹೆಚ್ಚು ಕೋವಿಡ್ ಪರೀಕ್ಷೆ ಮಾಡಿಸಲೇಬೇಕು. ರೋಗ ಲಕ್ಷಣ ಗೊತ್ತಾದ ಕೂಡಲೇ ಸೂಕ್ತ ಚಿಕಿತ್ಸೆ ಕೊಡಿಸಬೇಕು ಎಂದು ಆರೋಗ್ಯ ಇಲಾಖೆ ಈಗಾಗಲೇ 22 ಲಕ್ಷಕ್ಕೂ ಅಧಿಕ ಮಂದಿಯನ್ನು ಪರೀಕ್ಷೆಗೆ ಒಳಪಡಿಸಿದೆ. ಸ್ವಯಂ ಪ್ರೇರಿತ ಪರೀಕ್ಷೆ ಮಾಡಿಸಿಕೊಳ್ಳಿ ಮುಚ್ಚು ಮರೇ ಬೇಡ ಅಂತ ಸಲಹೆ ನೀಡಿದೆ. ಆದರೆ ಇದೇ ದೊಡ್ಡ ಸಮಸ್ಯೆಗೆ ಕಾರಣವಾಗಿದೆ.
ಕೋವಿಡ್ ಟೆಸ್ಟ್ ಮಾಡಿಸುವ ಮುನ್ನ ಎಚ್ಚರ:
ಹೌದು, ಲ್ಯಾಬ್ನಲ್ಲಿ ಕೋವಿಡ್ ಪರೀಕ್ಷಿಸಿದಾಗ ಮೊದಲು ನೆಗೆಟಿವ್ ನಂತರ ಪಾಸಿಟಿವ್ ಬರುವುದು. ಸಮಪರ್ಕವಾದ ಕೋವಿಡ್ ಟೆಸ್ಟ್ ರಿಸಲ್ಟ್ ಬರದೇ ಇರಲು ಕಾರಣವೇನು? ಯಾಕೆ ಈ ರೀತಿ ಸಮಸ್ಯೆ ಆಗ್ತಿದೆ ಎಂದು ಹುಡುಕುತ್ತಾ ಹೋದರೆ ಅದಕ್ಕೆ ನಾನಾ ಕಾರಣ ತೆರೆದುಕೊಳ್ಳುತ್ತಿದೆ.
ಆದರೆ ಇದಕ್ಕೂ ಮೊದಲು ರಿಪೋರ್ಟ್ ಗಜಿಬಿಜಿ ಬಗ್ಗೆ ನೋಡೋದಾದರೆ, ಹಲವು ಪ್ರಕರಣಗಳು ಕಣ್ಣ್ ಮುಂದೆ ಬರುತ್ತೆ. ಬೆಂಗಳೂರಿನ ವಿಜಯನಗರದ ಚಂದ್ರಲೇಔಟ್ ನಿವಾಸಿ ಕಿರಣ್ ಕುಮಾರ್, ಬೇರೊಂದು ಊರಿಗೆ ತೆರಳುವ ಉದ್ದೇಶದಿಂದ ಅದೇ ಏರಿಯಾದ ಬಿಬಿಎಂಪಿ ಆರೋಗ್ಯ ಕೇಂದ್ರದಲ್ಲಿ ಮುಂಜಾಗ್ರತಾ ಕ್ರಮವಾಗಿ ಆಗಸ್ಟ್ 3 ರಂದು ಕೋವಿಡ್ ಟೆಸ್ಟ್ ಮಾಡಿಸಿದ್ದಾರೆ. ಅದೇ ದಿನ ರಾತ್ರಿ ಕರೆ ಮಾಡಿ ಪಾಸಿಟಿವ್ ಇರುವುದಾಗಿ, ಕೋವಿಡ್ ಕೇರ್ ಸೆಂಟರ್ಗೆ ಶಿಫ್ಟ್ ಮಾಡುತ್ತೇವೆ ಎಂದು ಸಿಬ್ಬಂದಿ ಹೇಳಿದ್ದಾರೆ.
ಇತ್ತ ರಾತ್ರಿಯಾಗಿದ್ದರಿಂದ ಬೆಳಗ್ಗೆ ಬರೋದಾಗಿ ಕಿರಣ್ ಮಾಹಿತಿ ನೀಡಿದ್ದಾರೆ. ಯಾವುದೇ ರೋಗ ಲಕ್ಷಣ ಇಲ್ಲದಿದ್ದರೂ ಪಾಸಿಟಿವ್ ಬಂದ ಕಾರಣ ಅನುಮಾನಗೊಂಡು ಆಗಸ್ಟ್ 4 ರಂದು ಖಾಸಗಿ ಲ್ಯಾಬ್ನಲ್ಲಿ ಸ್ವಾಬ್ ನೀಡಿದ್ದಾರೆ. ಅದೇ ದಿನ ಮತ್ತೆ ಪಾಲಿಕೆ ಸಿಬ್ಬಂದಿ ಆ್ಯಂಬುಲೆನ್ಸ್ ಬರಲಿದ್ದು ರೆಡಿಯಾಗಿ ಅಂದಿದ್ದಾರೆ. ಈ ವೇಳೆ ಮೊಬೈಲ್ಗೆ ಪಾಸಿಟಿವ್ ರಿಪೋರ್ಟ್ ಮಸೇಜ್ ಬಂದಿಲ್ಲ, ರಿಪೋರ್ಟ್ ಕೊಟ್ಟರೆ ಬರೋದಾಗಿ ಕಿರಣ್ ತಿಳಿಸಿದ್ದಾರೆ. ಕೊನೆಗೆ ಒತ್ತಾಯಕ್ಕೆ ಮಣಿದು ನಗರದ ಹಜ್ ಭವನದ ಕೋವಿಡ್ ಕೇರ್ ಸೆಂಟರ್ಗೆ ಒಲ್ಲದ ಮನಸ್ಸಿನಿಂದಲ್ಲೇ ಶಿಫ್ಟ್ ಆಗಿದ್ದಾರೆ. ಆಗಲೂ ವರದಿ ಕೇಳಿದಾಗ ಆರೋಗ್ಯಾಧಿಕಾರಿಗಳು ನೀಡಿಲ್ಲ.
ಆಗಸ್ಟ್ 5 ರಂದು ಖಾಸಗಿ ಲ್ಯಾಬ್ನಿಂದ ರಿಪೋರ್ಟ್ ಬಂದಾಗ ಅದು ನೆಗಟಿವ್ ಆಗಿದೆ. ಅದನ್ನು ಬಿಬಿಎಂಪಿ ಅಧಿಕಾರಿಗಳಿಗೆ ತೋರಿಸಿದಾಗ ಸಮಸ್ಯೆಯಾಗೋದು ಬೇಡ ಅಂತ ಒಂದೇ ದಿನಕ್ಕೆ ಮನೆಗೆ ವಾಪಸ್ ಕಳಿಸಿದ್ದಾರೆ. ಈ ಬಗ್ಗೆ ಈ ಟಿವಿ ಭಾರತ್ನೊಂದಿಗೆ ಕಿರಣ್ ಕುಮಾರ್ ತಮಗಾದ ಅನುಭವವನ್ನು ಹಂಚಿಕೊಂಡಿದ್ದಾರೆ. ಕೋವಿಡ್ ಟೆಸ್ಟ್ ಮಾಡಿಸಿದಾಗ ಪಾಸಿಟಿವ್ ಬಂದರೆ ರಿಪೋರ್ಟ್ ಕೇಳಿ ನಂತರ ಕೋವಿಡ್ ಸೆಂಟರ್ಗೆ ಹೋಗಿ ಅಂತ ಸಲಹೆ ನೀಡುತ್ತಾರೆ. ಹಾಗೇ ಕೋವಿಡ್ ಸೆಂಟರ್ನಲ್ಲಿ ನಡೆಯುವ ಧೂಮಪಾನ ಮಧ್ಯಪಾನದ ಬಗ್ಗೆಯೂ ವಿವರಿಸಿದ್ದಾರೆ.
ಕಿರಣ್ ಕುಮಾರ್ ಅವರ ಕೋವಿಡ್ ರಿಪೋರ್ಟ್ನಲ್ಲಿ ಪಾಲಿಕೆ ವಿಲನ್ ಆದರೆ, ಇತ್ತ ಇಂತಹುದೇ ಎಡವಟ್ಟು ಮಾಡಿದ್ದು ಖಾಸಗಿ ಲ್ಯಾಬ್. ಇದರ ಕಥೆ-ವ್ಯಥೆಯನ್ನು ಪೋಷಕರು ಬಿಚ್ಚಿಟ್ಟಿದ್ದಾರೆ.
ಅಪೆಂಡಿಕ್ಸ್ ಸಮಸ್ಯೆಯಿಂದ ಬಳಲುತ್ತಿದ್ದ 4 ವರ್ಷದ ಮಗುವಿಗೆ ಮೊದಲು ಪಾಸಿಟಿವ್ ನಂತರ ನೆಗಟಿವ್..!
ಇದು ನಗರದ ರಾಜಾಜಿನಗರದಲ್ಲಿ ನಡೆದ ಘಟನೆಯಾಗಿದೆ. ಅಪೆಂಡಿಕ್ಸ್ ಸಮಸ್ಯೆಯಿಂದ ಬಳಲುತ್ತಿದ್ದ 4 ವರ್ಷದ ಮಗುವಿಗೆ ಪಾಸಿಟಿವ್ ರಿಪೋರ್ಟ್ ಕೊಟ್ಟಿದ್ದಾರೆ. ನಗರದ ಖಾಸಗಿ ಆಸ್ಪತ್ರೆಯಲ್ಲಿ ಪಾಸಿಟಿವ್ ರಿಪೋರ್ಟ್ ಬಂದಿದೆ. ಅನುಮಾನಗೊಂಡು ತಾಯಿ ರಾಜಲಕ್ಷ್ಮೀ ಬೇರೆ ಸರ್ಕಾರಿ ಲ್ಯಾಬ್ನಲ್ಲಿ ಇಡೀ ಕುಟುಂಬದವರು ಸ್ವಾಬ್ ಟೆಸ್ಟ್ ಮಾಡಿಸಿದ್ದಾರೆ. ಆಗ ಎಲ್ಲರದ್ದೂ ನೆಗಟಿವ್ ಬಂದಿದ್ದು ಸುಖಾಸುಮ್ನೆ ಪಾಸಿಟಿವ್ ಅಂತ ರಿಪೋರ್ಟ್ ಕೊಟ್ಟು ಹಣ ದೋಚಲು ಹೊಸ ಮಾರ್ಗನಾ ಅಂತಲೂ ಪೋಷಕರು ಅಳಲು ತೋಡಿಕೊಂಡಿದ್ದರು. ನೆಗೆಟಿವ್ - ಪಾಸಿಟಿವ್ ರಿಪೋರ್ಟ್ನ್ನು ವೈದ್ಯರ ಮುಂದಿಟ್ಟಾಗ ಸರ್ಜನ್ ವೈದ್ಯರೇ ಗೊಂದಲಕ್ಕೆ ಸಿಲುಕಿದರು ಎಂದು ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ.
ಸದ್ಯ ಈ ಕೋವಿಡ್ ರಿಪೋರ್ಟ್ ಪಜಿತಿಯಿಂದಾಗಿ ಮಗನ ಆಪರೇಷನ್ ಮಾಡಿಸೋದು ಮುಂದೂಡಲಾಗಿದೆ. ಹೊಟ್ಟೆಯೊಳಗೆ ಅಪೆಂಡಿಕ್ಸ್ ಇನ್ಫೆಕ್ಷನ್ ಆಗಿದ್ದರೂ ಕೂಡ ಜ್ವರ ಅಥವಾ ಮತ್ಯಾವುದೇ ಅನಾರೋಗ್ಯ ಸಮಸ್ಯೆ ಇಲ್ಲ ಇದೇ ನೆಗೆಟಿವ್ ಅಂತ ತೋರಿಸಿದೆ ಎಂದರು.
ಯಾಕೆ ಈ ಗೊಂದಲ??
ಇಷ್ಟಕ್ಕೂ ಈ ರೀತಿ ಲ್ಯಾಬ್ಗಳಲ್ಲಿ ಕೋವಿಡ್ ರಿಪೋರ್ಟ್ ಎಡವಟ್ಟು ಆಗಲು ಕಾರಣವೇನು? ಯಾಕೆ ಈ ರೀತಿ ಗೊಂದಲ ಆಗ್ತಿದೆ ಅಂತ ನೋಡಿದರೆ,
*ಲ್ಯಾಬ್ಗಳಿಗೆ ಭರಪೂರ ಬರುತ್ತಿರುವ ಸ್ಯಾಂಪಲ್ಸ್.
*ರಿಪೋರ್ಟ್ ಅದಲು ಬದಲು ಆಗುವುದು.
*ಒಂದೇ ಹೆಸರಿನ ಎರಡು ಸ್ಯಾಂಪಲ್ಸ್ನಿಂದಾಗಿಯು ಗೊಂದಲ.
* ಹೆಚ್ಚು ಸ್ಯಾಂಪಲ್ಸ್ನಿಂದ ಸಿಬ್ಬಂದಿಯಲ್ಲಿ ಒತ್ತಡ.
*ಇಲಾಖೆಯಿಂದ ಸಿಬ್ಬಂದಿಗಳಿಗೆ ಕೋವಿಡ್ ಟೆಸ್ಟ್ ಟಾರ್ಗೆಟ್ಗಳು- ಅತುರಕ್ಕೆ, ಒತ್ತಡಕ್ಕೆ ಒಳಗಾಗಿ ಎಡವಟ್ಟು
*ಕೆಲವೊಮ್ಮೆ ರಿಪೋರ್ಟ್ನಲ್ಲಿ ಕಳ್ಳಾಟ. ಪಾಸಿಟಿವ್ ರಿಪೋರ್ಟ್ ಕೊಟ್ಟು ಹಣದೋಚುವ ಪ್ರವೃತಿ.
ಒಟ್ಟಾರೆ ಕೊರೊನಾ ಟೆಸ್ಟ್ ಮಾಡಿಸಿದರು ಕಷ್ಟ, ಮಾಡಿಸದೇ ಇದ್ದರೂ ನಷ್ಟ ಎನ್ನುವಂತಾಗಿದೆ. ಸರ್ಕಾರಿ- ಖಾಸಗಿ ಲ್ಯಾಬ್ಗಳ ಸಣ್ಣ ನಿರ್ಲಕ್ಷ್ಯವೂ ಮತ್ತೊಬ್ಬರ ಬದುಕಿಗೆ ಕಂಟಕವಾಗಲಿದೆ. ಈ ಬಗ್ಗೆ ಸರ್ಕಾರ ಗಮನಹರಿಸಬೇಕಿದ್ದು, ಕೊರೊನಾ ಕಂಟ್ರೋಲ್ ಮಾಡುವ ಬರದಲ್ಲಿ ಮತ್ತೊಂದು ಕಗ್ಗಂಟು ಮಾಡಿಕೊಳ್ಳದೇ ಇರಲಿ ಅನ್ನೋದೇ ನಮ್ಮ ಆಶಯ.
