ಬೆಂಗಳೂರು: ನಗರದಲ್ಲಿ ದಿನೇ ದಿನೇ ಅಪರಾಧ ಪ್ರಕರಣಗಳು ಹೆಚ್ಚಾದಂತೆ ಪೊಲೀಸರು ತ್ವರಿತವಾಗಿ ತನಿಖೆ ನಡೆಸಿ ಆರೋಪಿಗಳನ್ನು ಹೆಡೆಮುರಿ ಕಟ್ಟುವಲ್ಲಿ ಸಫಲರಾಗುತ್ತಿದ್ದಾರೆ. ಕೊಲೆ, ಸುಲಿಗೆ ಹಾಗೂ ಡಕಾಯಿತಿ ಪ್ರಕರಣಗಳನ್ನ ಸುಲಭವಾಗಿ ಭೇದಿಸುತ್ತಿರುವ ಪೊಲೀಸರಿಗೆ ವಾಹನ ಕಳವು, ಮನೆ ಕಳವು ಹಾಗೂ ವಂಚನೆ ಪ್ರಕರಣಗಳಲ್ಲಿ ಆರೋಪಿಗಳನ್ನು ಹಿಡಿಯುವುದೇ ಹೆಚ್ಚು ತಲೆನೋವಾಗಿ ಪರಿಣಮಿಸಿದೆ.
ಕೊರೊನಾ ಭೀತಿಯಲ್ಲೂ ಮಿಂಚಿನ ಕಾರ್ಯಾಚರಣೆ..
ಕೊರೊನಾ ಭೀತಿ ನಡುವೆಯೂ ಕಳೆದ ಜನವರಿಯಿಂದ ಜುಲೈ ಅಂತ್ಯದವರೆಗೆ ಸೈಬರ್ ಅಪರಾಧ ಹೊರತುಪಡಿಸಿ 10,544 ಕೇಸ್ಗಳು ವರದಿಯಾಗಿವೆ. ಈ ಪೈಕಿ 5,580 ಕೇಸ್ಗಳನ್ನು ಬೆಂಗಳೂರು ನಗರ ಪೊಲೀಸರು ಭೇದಿಸಿದ್ದಾರೆ.
ಹಳೆ ದ್ವೇಷ, ಹಣಕಾಸು ಹಾಗೂ ಕ್ಷುಲ್ಲಕ ಕಾರಣಗಳಿಗಾಗಿ ನಡೆಯುವ ಬಹುತೇಕ ಕೊಲೆ ಪ್ರಕರಣಗಳನ್ನು ಖಾಕಿ ಭೇದಿಸಿದೆ. ನಗರದಲ್ಲಿ ಕಳೆದ ಏಳು ತಿಂಗಳಲ್ಲಿ 82 ಕೊಲೆಗಳ ಪೈಕಿ 80 ಪ್ರಕರಣಗಳನ್ನು ಭೇದಿಸಲಾಗಿದೆ. 22 ಡಕಾಯಿತಿ ಪ್ರಕರಣಗಳ ಪೈಕಿ 21 ಪ್ರಕರಣದ ಆರೋಪಿಗಳ ಹೆಡೆಮುರಿ ಕಟ್ಟಲಾಗಿದೆ. 87 ಸರಗಳ್ಳತನ ಪ್ರಕರಣಗಳಲ್ಲಿ 64 ಕೇಸ್ಗಳನ್ನು ಭೇದಿಸಿದ್ದು 23 ಪ್ರಕರಣಗಳು ಬಾಕಿ ಉಳಿದಿವೆ.
219 ರಾಬರಿ ಕೇಸ್ಗಳಲ್ಲಿ 162 ಕೇಸ್ ಭೇದಿಸಲಾಗಿದ್ದು 57 ಕೇಸ್ಗಳು ಬಾಕಿಯಿದೆ. ಕಿಡ್ನ್ಯಾಪ್ ಹಾಗೂ ಮಿಸ್ಸಿಂಗ್ 413 ಕೇಸ್ಗಳಲ್ಲಿ 244 ಪ್ರಕರಣ ಭೇದಿಸಲಾಗಿದ್ದು 169 ಕೇಸ್ ಬಾಕಿಯಿದೆ. ಲೈಂಗಿಕ ಕಿರುಕುಳದಡಿ 304 ಕೇಸ್ ವರದಿಯಾದರೆ, 189 ಕೇಸ್ ಪತ್ತೆಯಾಗಿದ್ದು 115 ಬಾಕಿ ಯಿವೆ. ಆತ್ಯಾಚಾರದಡಿ 59 ಕೇಸ್ಗಳು ವರದಿಯಾದರೆ 53 ಪ್ರಕರಣಗಳನ್ನು ಮಾತ್ರ ಭೇದಿಸಲಾಗಿದೆ. ಮಹಿಳೆ ಮೇಲೆ ಹಲ್ಲೆ ಮತ್ತು ವರದಕ್ಷಿಣೆ ಕಿರುಕುಳಕ್ಕೆ ಸಂಬಂಧಿಸಿದಂತೆ 207 ಪ್ರಕರಣಗಳ ಪೈಕಿ 178 ಇತ್ಯರ್ಥವಾಗಿದ್ದು 29 ಕೇಸ್ ಬಾಕಿ ಉಳಿದಿವೆ.