ಬೆಂಗಳೂರು: ಮೋದಕ ಪ್ರಿಯ, ಕಡುಬು ಸೇವಕ ಎಂದೆಲ್ಲ ಕರೆಯುವ ಗಣಪನಿಗೆ ಈ ದೇಗುಲದಲ್ಲಿ ಪ್ರತಿ ವರ್ಷ ನವರಾತ್ರಿಯ ಸಮಯ ನಿತ್ಯ ಸೇವಿಸುವ ಆಹಾರಗಳ ಮೂಲಕವೇ ಅಲಂಕಾರ ಮಾಡಲಾಗುತ್ತಿದೆ.
ಮಾಗಡಿ ರಸ್ತೆಯ 8 ನೇ ಕ್ರಾಸ್ನ ಭುವನೇಶ್ವರಿ ನಗರದ ಪ್ರಸನ್ನ ಮಹಾ ಗಣಪತಿ ದೇಗುಲದಲ್ಲಿ ಕಳೆದ 7-8 ವರ್ಷಗಳಿಂದ ವಿಶೇಷ, ವಿಶಿಷ್ಟ ರೀತಿಯಲ್ಲಿ ವಿನಾಯಕನಿಗೆ ಅಲಂಕಾರ ಮಾಡಿ ಪೂಜಿಸಲಾಗುತ್ತಿದೆ.
ಈ ಬಾರಿ ಕೊತ್ತಂಬರಿ - ಕರಿಬೇವಿನ ಸೊಪ್ಪಿನ ಅಲಂಕಾರ, ಬನ್ ಅಲಂಕಾರ, ಚಾಕೊಲೇಟ್ ಅಲಂಕಾರ, ಚಾಮುಂಡೇಶ್ವರಿ ಅಲಂಕಾರ, 48 ವಿವಿಧ ಹೂಗಳ ಅಲಂಕಾರ, ಹಣ್ಣುಗಳ ಅಲಂಕಾರವನ್ನು ಮಾಡಲಾಗಿದ್ದು, ಎಲ್ಲರ ಗಮನ ಸೆಳೆಯುತ್ತಿದೆ.
ಈ ಕುರಿತು ದೇಗುಲದ ಪ್ರಧಾನ ಅರ್ಚಕರಾದ ಕೆ.ನರಸಿಂಹಮೂರ್ತಿಶಾಸ್ತ್ರಿ ಮಾಹಿತಿ ನೀಡಿದ್ದು, ದೇವರು ಅಲಂಕಾರ- ಅಭಿಷೇಕ ಪ್ರಿಯ, ದೇವರನ್ನು ಭಯ- ಭಕ್ತಿ, ಶ್ರದ್ಧೆಯಷ್ಟೇ ಸಂತಸದಿಂದ ಕಾಣಬೇಕು, ಧ್ಯಾನಿಸಬೇಕು. ಭಕ್ತರ ಇಚ್ಛೆಯ ಮೇರೆಗೆ ಅಲಂಕಾರಗಳನ್ನು ಮಾಡಲಾಗುತ್ತಿದೆ. ಗಣೇಶ ಚತುರ್ಥಿ ಹಾಗೂ ನವರಾತ್ರಿ ವೇಳೆಯಲ್ಲಿ ಮಹಾಗಣಪತಿಗೆ ವಿಶೇಷ ಅಲಂಕಾರ ಮಾಡುವ ಮೂಲಕ ಪೂಜಿಸಲಾಗುತ್ತಿದೆ ಎಂದು ತಿಳಿಸಿದರು.
