ಬೆಂಗಳೂರು/ತಿರುಪತಿ: ಆಂಧ್ರಪ್ರದೇಶದ ತಿರುಪತಿಯಲ್ಲಿ ನಡೆದ ದಕ್ಷಿಣ ವಲಯ ಮಂಡಳಿಯ ಸಭೆಯಲ್ಲಿ(South Zone Board Meeting) ರಾಜ್ಯದ ನೀರಾವರಿ ಯೋಜನೆಗಳು ಹಾಗೂ ನೆರೆ ರಾಜ್ಯದ ನೀರಾವರಿ ಯೋಜನೆಗಳಿಂದ ರಾಜ್ಯಕ್ಕೆ ಆಗಲಿರುವ ಸಮಸ್ಯೆಗಳ ಕುರಿತು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ(Chief Minister Basavaraja Bommai) ಬೆಳಕು ಚೆಲ್ಲಿ ಗಮನ ಸೆಳೆದರು.
ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಮಾತನಾಡಿದ ಸಿಎಂ, ಗೋದಾವರಿ/ಕಾವೇರಿ ಲಿಂಕ್ ಯೋಜನೆಗೆ ಸಂಬಂಧಿಸಿದಂತೆ ರಾಷ್ಟ್ರೀಯ ಜಲ ಅಭಿವೃದ್ಧಿ ಸಂಸ್ಥೆ (NWDA)ಗೆ ತನ್ನ ಅಭಿಪ್ರಾಯವನ್ನು ರಾಜ್ಯ ತಿಳಿಸಿದೆ.
ಪೊಲ್ಲವರಂ ಯೋಜನೆಯಡಿಯಲ್ಲಿ ಕೃಷ್ಣಾ ನದಿಗೆ ಗೋದಾವರಿ ತಿರುವಿನ ಸಂದರ್ಭದಲ್ಲಿ ಮಾಡಿದಂತೆ ಕರ್ನಾಟಕ ರಾಜ್ಯವು ಕಾವೇರಿ, ಕೃಷ್ಣಾ ಮತ್ತು ಪೆನ್ನಾರ್ ಜಲಾನಯನ ಪ್ರದೇಶಗಳಲ್ಲಿ ತನ್ನ ನ್ಯಾಯಯುತ ಪಾಲನ್ನು ಪಡೆಯಲು ಪ್ರಯತ್ನಿಸುತ್ತದೆ ಎಂದು ರಾಜ್ಯದ ನೀರಾವರಿ ಯೋಜನೆಗಳನ್ನು ಸಮರ್ಥಿಸಿಕೊಂಡರು.
ಸಹ-ಜಲಾನಯನ ರಾಜ್ಯಗಳ ಪಾಲನ್ನು ನಿರ್ಧರಿಸಲಾಗಿಲ್ಲವಾದರೂ ತಮಿಳುನಾಡು ರಾಜ್ಯವು ಕಾವೇರಿ ವಾಗೈ-ಗುಂಡಾರ್ ಲಿಂಕ್‌ನೊಂದಿಗೆ (ಸಿವಿಜಿ ಲಿಂಕ್) ಮುಂದೆ ಹೋಗುತ್ತಿದೆ. ಇದು ಕಾನೂನಿನಲ್ಲಿ ಸ್ವೀಕಾರಾರ್ಹವಾಗಿದೆ.
ಹೀಗಾಗಿ, ಕಾವೇರಿ-ವಾಗೈ-ಗುಂಡಾರ್ ಸಂಪರ್ಕವನ್ನು ತೆಗೆದುಕೊಳ್ಳುವ ತಮಿಳುನಾಡು ಪ್ರಸ್ತಾವನೆಯನ್ನು ಅನುಮೋದಿಸದಂತೆ ಕೇಂದ್ರ ಸರ್ಕಾರವನ್ನು ಪತ್ರದ ಮೂಲಕ ನಾವು ಒತ್ತಾಯಿಸಿದ್ದೇವೆ.
ಜಲ ನ್ಯಾಯಮಂಡಳಿ ಆದೇಶ ಉಲ್ಲಂಘಿಸಿ ಹೆಚ್ಚುವರಿ ನೀರನ್ನು ಬಳಸಿಕೊಳ್ಳಲು ಯೋಜಿಸಲಾದ ಬೃಹತ್ ಪ್ರಮಾಣದ ಶಾಶ್ವತ ಯೋಜನೆಗಳಿಗೆ ಯಾವುದೇ ಶಾಸನಬದ್ಧ ಅನುಮತಿಗಳನ್ನು ನೀಡಬಾರದು ಎಂದು ಕರ್ನಾಟಕ ರಾಜ್ಯವು ತನ್ನ ನಿಲುವನ್ನು ಪುನರುಚ್ಚರಿಸುತ್ತದೆ ಎಂದು ಸಿಎಂ ಸ್ಪಷ್ಟಪಡಿಸಿದರು.
ತೆಲಂಗಾಣ ರಾಜ್ಯವಾಗಲಿ ಅಥವಾ ಅಪೆಕ್ಸ್ ಕೌನ್ಸಿಲ್ ಆಗಲಿ ಶ್ರೀಶೈಲಂ ಜಲಾಶಯದಿಂದ(Srisailam Reservoir) ಹೆಚ್ಚುವರಿ ನೀರನ್ನು ಸೆಳೆಯಲು ಪಾಲಮುರು ರಂಗಾರೆಡ್ಡಿ ಮತ್ತು ನಕ್ಕಲಗಂಡಿಯಲ್ಲಿ ಏತ ನೀರಾವರಿ ಯೋಜನೆಗಳನ್ನು ಜಾರಿಗೊಳಿಸುವ ಹಕ್ಕನ್ನು ಹೊಂದಿಲ್ಲ. ಆದರೂ ಯೋಜನೆಗೆ ಮುಂದಾಗಿದೆ. ಈ ಸಮಸ್ಯೆಗೆ ಪರಿಹಾರ ಕಲ್ಪಿಸುವ ಕುರಿತ ಯಾವುದೇ ಪ್ರಸ್ತಾಪಕ್ಕೆ ದಕ್ಷಿಣ ವಲಯ ಮಂಡಳಿ ಸಭೆ ಮುಂದಾದಲ್ಲಿ ಅದನ್ನು ನಾವು ಸ್ವಾಗತಿಸುತ್ತೇವೆ. ಈ ವಿವಾದ ಇತ್ಯರ್ಥಕ್ಕೆ ಕರ್ನಾಟಕ ಸಿದ್ದವಿದೆ ಎನ್ನುವ ಘೋಷಣೆ ಮಾಡಿದರು.
ತೆಲಂಗಾಣ ರಾಜ್ಯದಿಂದ ರಾಜೀವ್ ಗಾಂಧಿ ಸಂಗಮ ಬಂದಾ ಬ್ಯಾರೇಜ್ ನಿರ್ಮಾಣವನ್ನು ಕರ್ನಾಟಕವು ವಿರೋಧಿಸುತ್ತದೆ. 2050ರಲ್ಲಿ ಪರಿಶೀಲನೆಗೆ ಬರುವ ಉಳಿತಾಯದ ನೆಪದಲ್ಲಿ ಉಳಿದ ನೀರನ್ನು ಬಳಸಿಕೊಳ್ಳುವುದರಿಂದ ಇದು ಕರ್ನಾಟಕದ ಮೇಲೆ ಪರಿಣಾಮ ಬೀರುತ್ತದೆ. ಅಲ್ಲದೆ ತೆಲಂಗಾಣ ರಾಜ್ಯವು ಕೃಷ್ಣಾ ಜಲಾನಯನದ ಅತ್ಯಂತ ಕಡಿಮೆ ನದಿ ವಿಸ್ತಾರವನ್ನು ಹೊಂದಿರುವ ಕಾರಣ ಹೆಚ್ಚುವರಿ ಉಳಿಕೆ ನೀರನ್ನು ಬಳಸಿಕೊಳ್ಳಲು ಯಾವುದೇ ಹಕ್ಕು ಹೊಂದಿಲ್ಲ. ಆದರೂ ರಾಜ್ಯವು ತೆಲಂಗಾಣದ ಸಹಭಾಗಿತ್ವದಲ್ಲಿ ಜಂಟಿ ಸಮೀಕ್ಷೆ ನಡೆಸಲು ಸಿದ್ಧವಾಗಿದೆ ಎಂದರು.
ಆಂಧ್ರಪ್ರದೇಶ ರಾಜ್ಯವು ತುಂಗಭದ್ರಾ ನದಿಗೆ ಅಡ್ಡಲಾಗಿ ನಿರ್ಮಿಸುವ ಗುಂಡ್ರಾವುಲು ಯೋಜನೆಗೆ ಸಂಬಂಧಿಸಿದಂತೆ, ಕರ್ನಾಟಕ ರಾಜ್ಯದಲ್ಲಿನ ಹಳ್ಳಿಗಳು ಮತ್ತು ಜಮೀನುಗಳ ಮುಳುಗುವಿಕೆಯ ಪ್ರಮಾಣವನ್ನು ನಿರ್ಧರಿಸಲು ಜಂಟಿ ಸಮೀಕ್ಷೆಯನ್ನು ಕೈಗೊಳ್ಳಬೇಕು.
ಅದಕ್ಕೂ ಮೊದಲು, ಕೇಂದ್ರ ಸರ್ಕಾರದಿಂದ ಪಡೆದ ಅನುಮೋದನೆಗಳೊಂದಿಗೆ ನ್ಯಾಯಾಧಿಕರಣಕ್ಕೆ ಸಲ್ಲಿಸಿದಂತೆ ನೀರಿನ ಹಂಚಿಕೆಗೆ ಸಂಬಂಧಿಸಿದಂತೆ ವಿವರಗಳನ್ನು ಒದಗಿಸಬೇಕು ಎಂದು ಆಂಧ್ರಪ್ರದೇಶಕ್ಕೆ ಮನವಿ ಮಾಡಿದರು.
ಅಂತಾರಾಜ್ಯ ಸಾರಿಗೆ ಒಪ್ಪಂದ ಪ್ರಸ್ತಾಪ : ಕರ್ನಾಟಕ ಮತ್ತು ನೆರೆಯ ರಾಜ್ಯಗಳ ನಡುವಿನ ಅಂತಾರಾಜ್ಯ ಪರಸ್ಪರ ಸಾರಿಗೆ ಒಪ್ಪಂದ ಕುರಿತು ಪ್ರಸ್ತಾಪಿಸಿದ ಸಿಎಂ ಬೊಮ್ಮಾಯಿ,ತೆಲಂಗಾಣ, ಪಾಂಡಿಚೇರಿ, ತಮಿಳುನಾಡು, ಆಂಧ್ರಪ್ರದೇಶ ಮತ್ತು ಕೇರಳದ ಪ್ರಸ್ತಾವನೆಗಳು ಬಾಕಿ ಇವೆ. ಅದನ್ನು ತ್ವರಿತಗೊಳಿಸುವಂತೆ ದಕ್ಷಿಣ ವಲಯ ಮಂಡಳಿ ಅಧ್ಯಕ್ಷರಲ್ಲಿ ವಿನಂತಿಸಿದರು.
ಗಡಿಯಾಚೆ ಸಂವಹನ ಜಾಲ ಬೆಂಬಲಕ್ಕೆ ಮನವಿ : ಗೃಹ ಇಲಾಖೆಗಳ ಅಂತಾರಾಜ್ಯ ಸಮನ್ವಯವು ವಿವಿಧ ಅಪರಾಧಗಳನ್ನು ತಡೆಗಟ್ಟಲು ಬಹಳ ನಿರ್ಣಾಯಕವಾಗಿದೆ. ಆದ್ದರಿಂದ ಗಡಿಯಾಚೆಗಿನ ಸಂವಹನ ಜಾಲಗಳನ್ನು ಬೆಂಬಲಿಸಲು ಕೇಂದ್ರ ಗೃಹ ಸಚಿವರು ಸಹಾಯ ಮಾಡಬೇಕು ಎಂದು ಸಿಎಂ ಮನವಿ ಮಾಡಿದರು.
ನವೀಕರಿಸುವ ಇಂಧನದ ಅಂತಾರಾಜ್ಯ ದರಪಟ್ಟಿ ವ್ಯತ್ಯಾಸ ತೊಡೆದು ಹಾಕಬೇಕು : ನವೀಕರಿಸಬಹುದಾದ ಇಂಧನ ದರ ನಿಗದಿಯಲ್ಲಿನ ವ್ಯತ್ಯಾಸದ ಬಗ್ಗೆ ಸಭೆಯಲ್ಲಿ ಚರ್ಚಿಸಲಾಗಿದೆ. ನವೀಕರಿಸಬಹುದಾದ ಇಂಧನದಲ್ಲಿ ಕರ್ನಾಟಕ ಮೊದಲ ಸ್ಥಾನದಲ್ಲಿದೆ ಎಂದು ಹೇಳಲು ನನಗೆ ಹೆಮ್ಮೆಯಾಗುತ್ತಿದೆ. ಕೇಂದ್ರ ಸರ್ಕಾರ ನಿಗದಿಪಡಿಸಿದ ನವೀಕರಿಸಬಹುದಾದ ಇಂಧನ ಖರೀದಿ ಕಟ್ಟುಪಾಡುಗಳ (RPOS) ಗುರಿಗಳನ್ನು ಸಾಧಿಸುತ್ತಿರುವ ಏಕೈಕ ರಾಜ್ಯ ಕರ್ನಾಟಕವಾಗಿದೆ.
ಆದರೂ ಈ ಶಕ್ತಿಯ ಮೂಲದ ಪೂರ್ಣ ಪ್ರಮಾಣದ ಸಾಮರ್ಥ್ಯವನ್ನು ಬಳಸಿಕೊಳ್ಳಲು ನಮಗೆ ಸಾಧ್ಯವಾಗುತ್ತಿಲ್ಲ. ಕಡಿಮೆ ದರಪಟ್ಟಿ ಇರುವುದರಿಂದಾಗಿ ಇದು ಹೂಡಿಕೆದಾರರಿಗೆ ಕಷ್ಟವಾಗುತ್ತಿದೆ. ಹಾಗಾಗಿ, ಅಂತಾರಾಜ್ಯ ದರ ವ್ಯತ್ಯಾಸವನ್ನು ತೆಗೆದು ಹಾಕುವಂತೆ ಮನವಿ ಮಾಡಿದರು.
ಆತ್ಮನಿರ್ಭರ ಭಾರತ್ ಯೋಜನೆಯಡಿ ಮೇಕ್ ಇನ್ ಇಂಡಿಯಾ ಉತ್ಪನ್ನಗಳ ಉತ್ಪಾದನಾ ಮಾರುಕಟ್ಟೆಯನ್ನು ಉತ್ತೇಜಿಸುವ ಮೂಲಕ ಪ್ರಧಾನ ಮಂತ್ರಿಗಳ ದೂರ ದೃಷ್ಟಿಗೆ ಪೂರಕವಾಗಿ ನಾವು ಕೆಲಸ ಮಾಡುತ್ತಿದ್ದೇವೆ. ಎಸ್‌ಡಿಜಿ ಭಾರತ ಸೂಚ್ಯಂಕ 2020-21ರ ನೀತಿ ಆಯೋಗದ ಅಡಿಯಲ್ಲಿ ಕೇರಳ, ತಮಿಳುನಾಡು ಮತ್ತು ಕರ್ನಾಟಕ ಮೊದಲ ಮೂರು ಸ್ಥಾನಗಳಲ್ಲಿ ಸ್ಥಾನ ಪಡೆದಿರುವುದು ಹೆಮ್ಮೆಯ ವಿಷಯವಾಗಿದೆ. ಈ ಸಭೆಯು ಆರೋಗ್ಯಕರ ಮತ್ತು ಸಮೃದ್ಧ ರಾಷ್ಟ್ರವನ್ನು ನಿರ್ಮಿಸಲು ಒಟ್ಟಾಗಿ ಕೆಲಸ ಮಾಡಲು ನಮ್ಮನ್ನು ಒಟ್ಟುಗೂಡಿಸುತ್ತದೆ ಎಂದು ನಾನು ಭಾವಿಸುತ್ತೇನೆ ಎಂದು ಭಾಷಣ ಮುಗಿಸಿದರು.
