ಕೋವಿಡ್ ಲಸಿಕೆ ಕೊರತೆ: ಆಸ್ಪತ್ರೆಗೆ ಅಲೆದಾಡಿ ಸುಸ್ತಾದ ಸಿಲಿಕಾನ್ ಸಿಟಿ ಮಂದಿ

ಸಿಲಿಕಾನ್ ಸಿಟಿಯ ಜನ ಕೋವಿಡ್ ಲಸಿಕೆ ಪಡೆಯಲು ಪರದಾಡುತ್ತಿದ್ದು, ಬಹುತೇಕ ಆಸ್ಪತ್ರೆಗಳ ಮುಂದೆ ಉದ್ದದ ಸರತಿ ಸಾಲುಗಳು ಕಂಡು ಬರುತ್ತಿವೆ. ಆಸ್ಪತ್ರೆ ಸಿಬ್ಬಂದಿ ಲಸಿಕೆ ಕೊರತೆಯ ಕಾರಣ ನೀಡುತ್ತಿದ್ದಾರೆ.

ಬೆಂಗಳೂರು: ಅಗತ್ಯ ವಸ್ತುಗಳ ಖರೀದಿ ಆಯ್ತು, ಇದೀಗ ಕೋವಿಡ್ ಲಸಿಕೆ ಪಡೆಯಲು ಜನ ಲಸಿಕಾ ಕೇಂದ್ರಗಳ ಮುಂದೆ ಸರತಿ ಸಾಲಿನಲ್ಲಿ ಗಂಟೆಗಟ್ಟಲೆ ಕಾಯುತ್ತಿದ್ದಾರೆ.

ನಗರದ ಮಲ್ಲೇಶ್ವರದ ಕೆಸಿ ಜನರಲ್ ಅಸ್ಪತ್ರೆಯಲ್ಲಿ ಲಸಿಕೆ ಹಾಕಿಸಿಕೊಳ್ಳಲು ಸಾರ್ವಜನಿಕರು ಕಾದು ನಿಂತ ದೃಶ್ಯ ಕಂಡು ಬಂತು. ಹಿರಿಯ ನಾಗರಿಕರು, ಯುವ ಜನರು ಸೇರಿದಂತೆ 100ಕ್ಕೂ ಅಧಿಕ ಮಂದಿ ಸರತಿ ಸಾಲಿನಲ್ಲಿ ನಿಂತಿದ್ದರು. ಬೆಳಗ್ಗೆ 9:30ಕ್ಕೆ ಕೆಸಿ ಜನರಲ್ ಆಸ್ಪತ್ರೆಯಲ್ಲಿ ಲಸಿಕೆ ವಿತರಣೆ ಪ್ರಾರಂಭಗೊಂಡಿದೆ. ಈ ನಡುವೆ ನಗರದ ಕೆಲ ಕೇಂದ್ರಗಳಲ್ಲಿ ಕೋವ್ಯಾಕ್ಸಿನ್ ಕೊರತೆ ಎದುರಾಗಿದೆ.

ಸಾರ್ವಜನಿಕರ ಅಳಲು: ವಾರದಿಂದ ಸುತ್ತಾಡಿದರೂ ಲಸಿಕೆ ಸಿಗುತ್ತಿಲ್ಲ. ಪ್ರತಿದಿನ ಅಸ್ಪತ್ರೆಗೆ ಬಂದು ವಾಪಸ್ ಹೋಗುತ್ತಿದ್ದೇವೆ. ಆರೇಳು ವಾರ ಕಳೆದರೂ ಎರಡನೇ ಡೋಸ್ ಲಸಿಕೆ ಸಿಕ್ಕಿಲ್ಲ. ಲಾಕ್​​ಡೌನ್ ನಡುವೆ ಪ್ರತಿದಿನ ಬರುವುದು ಕಷ್ಟವಾಗ್ತಿದೆ. ರಸ್ತೆಗಿಳಿದರೆ ಪೊಲೀಸರ ಕಾಟ. ಅವರಿಗೆ ದಿನಾಲು ಸಮಜಾಯಿಸಿ ನೀಡಲು ನಮ್ಮಿಂದ ಆಗುತ್ತಿಲ್ಲ. ನಮ್ಮಲ್ಲಿ ಯಾವುದೇ ದಾಖಲೆ ಇಲ್ಲ, ಮೆಸೇಜ್ ತೋರಿಸಿದರೆ ಅವರು ಕೇಳಲ್ಲ ಎಂದು ಸಾರ್ವಜನಿಕರು ಆಳಲು ತೋಡಿಕೊಂಡಿದ್ದಾರೆ.

ಅಸ್ಪತ್ರೆಯವರು ಮಾಹಿತಿ ಕೊಡಬೇಕು: ಯಾವಾಗ ಲಸಿಕೆ ಸಿಗುತ್ತದೆ ಎಂದು ಆಸ್ಪತ್ರೆಯವರು ಸರಿಯಾದ ಮಾಹಿತಿ ನೀಡಬೇಕು. ದಿನಾಲು ಬಂದು ಹೋಗಲು ನಮಗೆ ಆಗುವುದಿಲ್ಲ ಎಂದು ಲಸಿಕೆ ಪಡೆಯಲು ಬಂದವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕೆಸಿ ಜನರಲ್ ಅಸ್ಪತ್ರೆಯಲ್ಲಿ ಗಂಟೆ ಗಂಟೆಗೂ ಲಸಿಕೆ ಪಡೆಯುವವರ ಸಾಲು ಹೆಚ್ಚುತ್ತಿದ್ದು, ಬೆಳಗ್ಗೆ 7 ಗಂಟೆಯಿಂದಲೇ ಅಸ್ಪತ್ರೆ ಬಳಿ ಜನ ಲಸಿಕೆಗಾಗಿ ಕಾಯುತ್ತಿದ್ದಾರೆ. ಈ ಪೈಕಿ ಬಹುತೇಕ ಮಂದಿ 2ನೇ ಡೋಸ್​ಗಾಗಿ ಬಂದವರಾಗಿದ್ದಾರೆ.