ಬೆಂಗಳೂರು: ರೆಡ್ ಮರ್ಕ್ಯೂರಿಗೆ ಬಹಳ ಬೇಡಿಕೆ ಇದೆ ಎಂದು ನಂಬಿಸಿ ಮೋಸ ಮಾಡಿರುವ ಘಟನೆ ನಗರದಲ್ಲಿ ಬೆಳಕಿಗೆ ಬಂದಿದೆ. ಬಾಣಸವಾಡಿ ನಿವಾಸಿ ಶ್ರೀಧರ್ ಮೋಸಕ್ಕೆ ಒಳಗಾದವರು. ಆದರೆ ಮೋಸ ಮಾಡಿದವನು ಶ್ರೀಧರ್ ವಿರುದ್ಧವೇ ಪ್ರತಿದೂರು ನೀಡಿದ್ದಾನೆ.
ಶ್ರೀಧರ್ ಬಾಣಸವಾಡಿ ಬಳಿಯ ನಿವಾಸಿಯಾಗಿದ್ದು, ಕಮ್ಮನಹಳ್ಳಿ ಬಳಿ ಮೊಬೈಲ್ ಅಂಗಡಿ ಇಟ್ಟುಕೊಂಡಿದ್ದ. ಆದರೆ ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ಹಳೇ ಟಿವಿ ಮತ್ತು ರೆಡಿಯೋ ಇನ್ನಿತರ ಎಲೆಕ್ಟ್ರಾನಿಕ್ ವಸ್ತುವಿನಲ್ಲಿರುವ ರೆಡ್ ಮರ್ಕ್ಯೂರಿಗೆ ಬೇಡಿಕೆ ಎಂದು ತಿಳಿದಿದ್ದರು. ಹಾಗೆಯೇ ಕೆಲ ದಿನಗಳ ಹಿಂದೆ ಈ ವಿಚಾರ ಕುರಿತು ಸ್ನೇಹಿತನ ಬಳಿ‌ಯೂ ಚರ್ಚೆ ಮಾಡಿದ್ದ. ಹೀಗಾಗಿ ಸ್ನೇಹಿತ ಸಾಗರ್ ಎಂಬಾತ ಕರೆ ಮಾಡಿ ಮನೋಜ್ ಸ್ಟಿಪನ್ ಎಂಬಾತನ ಬಳಿ ರೆಡ್ ಮರ್ಕ್ಯೂರಿ ಇದೆ. ಅದು ಕೋಟಿ ರೂಪಾಯಿ ಬೆಲೆ ಬಾಳುತ್ತೆ, ಆದರೆ ಮೊದಲು ಮೂರು ಲಕ್ಷ ಕೊಡಬೇಕೆಂದು ನಂಬಿಸಿದ್ದರು.
ಇನ್ನೂ ಮೂರು ಲಕ್ಷ ಹಣ ಜೋಡಿಸಿ ಕಾರಿನಲ್ಲಿ ಚನ್ನರಾಯಪಟ್ಟಣ ಬಳಿ ತೆರಳಿದಾಗ ಮನೋಜ್ ಮತ್ತು ಆತನ ತಂಡದವರು ಅಲ್ಲಿಗೆ ಬಂದಿದ್ದಾರೆ. ಶ್ರೀಧರ್ ಮರ್ಕ್ಯೂರಿ ತೋರಿಸುವಂತೆ ಕೇಳಿದ್ದಾರೆ. ಆದರೆ ಎದುರಾಳಿ ಗ್ಯಾಂಗ್‌ ಮೊದಲು ಹಣ ತೋರಿಸಿ ಎಂದು ಹೇಳಿ ದೋಚಿಕೊಂಡು ಹೋಗಿದ್ದಾರೆಂದು ಹೆಬ್ಬಾಳ ಠಾಣೆಯಲ್ಲಿ ಶ್ರಿಧರ್ ದೂರು ದಾಖಲಿಸಿದ್ದಾರೆ.
ಶ್ರೀಧರ್ ದೂರು ದಾಖಲು ಮಾಡುತ್ತಿದ್ದಂತೆ ಮನೋಜ್ ಅದೇ ಠಾಣೆಯಲ್ಲಿ ಪ್ರತಿದೂರು ನೀಡಿದ್ದಾರೆ. ನನ್ನ ಬಳಿ ಹಣ ಕಿತ್ಕೊಂಡು ಹೋಗಿದ್ದಾರೆ. ಹಾಗೆ ಪ್ರಾಣ ಬೆದರಿಕೆ ಹಾಕಿದ್ದಾರೆಂದು ಹೇಳಿದ್ದು, ಸದ್ಯ ಎರಡು ಎಫ್ಐಆರ್ ದಾಖಲಾಗಿವೆ. ಪೊಲೀಸರು ಅಸಲಿ ಯಾವುದು ಅನ್ನೋದರ ತನಿಖೆ ಮುಂದುವರೆಸಿದ್ದಾರೆ. ಹಾಗೆ ಇದರಲ್ಲಿ ಕೆಲವರನ್ನು ಬಂಧಿಸಿದ್ದು, ಮನೋಜ್ ಮತ್ತು ಶ್ರೀಧರ್ನನ್ನು ವಶಕ್ಕೆ ಪಡೆದು ತನಿಖೆ ನಡೆಸುತ್ತಿದ್ದಾರೆ.
