ಬೆಂಗಳೂರು : ನಗರದ ಜಿಕೆವಿಕೆ (GKVK) ಆವರಣದಲ್ಲಿ ನಡೆಯುತ್ತಿರುವ ಕೃಷಿ ಮೇಳ (krishi mela)ಕ್ಕೆ ಆಗಾಗ ಮಳೆ ಸುರಿದು ಅಡ್ಡಿ ಮಾಡುತ್ತಿದೆ. ನಿನ್ನೆಯಂತೆ ಇಂದು ಸಹ ಮಳಿಗೆಗಳಿದ್ದ ಪ್ರದೇಶ ಕೆಸರುಗದ್ದೆಯಾಗಿಯೇ ಉಳಿದಿತ್ತು. ಆದರೆ, ಇದ್ಯಾವುದನ್ನೂ ಲೆಕ್ಕಿಸದೆ ಜನ ಭಾರಿ ಸಂಖ್ಯೆಯಲ್ಲಿ ಆಗಮಿಸಿ ಕೃಷಿಮೇಳವನ್ನು ಯಶಸ್ವಿಗೊಳಿಸುತ್ತಿದ್ದಾರೆ.
ನಿನ್ನೆಯ ರೀತಿಯಲ್ಲೇ ಇಂದು ಸಹ ಮಳೆ ಸುರಿಯುತ್ತದೆ ಎಂದು ಭಾವಿಸಿದ್ದ ಜನ ಮಧ್ಯಾಹ್ನ 12 ಗಂಟೆಯವರೆಗೂ ಅಷ್ಟು ದೊಡ್ಡ ಪ್ರಮಾಣದಲ್ಲಿ ಮೇಳದತ್ತ ಆಗಮಿಸಲಿಲ್ಲ. ಇದಾದ ಬಳಿಕ ನಿಧಾನವಾಗಿ ಬಸ್ಗಳು ಹಾಗೂ ಖಾಸಗಿ ವಾಹನಗಳಲ್ಲಿ ಗುಂಪು ಗುಂಪಾಗಿ ಜನ ಬಂದರು.
ನಿನ್ನೆಯಂತೆ ಇಂದು ಸಹ ಸಾಕಷ್ಟು ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ಮೇಳದಲ್ಲಿ ಭಾಗವಹಿಸಿದ್ದರು. ಗೃಹಬಳಕೆ ವಸ್ತುಗಳ ಮಳಿಗೆಗಳತ್ತ ಹೆಚ್ಚಿನ ಜನರು ಆಕರ್ಷಿತರಾಗಿದ್ದರು.
ವೇದಿಕೆ ಕಾರ್ಯಕ್ರಮಕ್ಕೆ ಜನರ ಕೊರತೆ
ಕೃಷಿಮೇಳಕ್ಕೆ ಆಗಮಿಸಿದ ಜನ ಮಳಿಗೆಗಳಲ್ಲಿ ಹೆಚ್ಚಿನ ಓಡಾಟ ಮಾಡಿದರೆ ಹೊರತು, ಪ್ರಶಸ್ತಿ ಪ್ರದಾನ ಸೇರಿದಂತೆ ಯಾವುದೇ ರೀತಿಯ ಸಭಾ ಕಾರ್ಯಕ್ರಮದಲ್ಲಿ ಅಷ್ಟಾಗಿ ಗೋಚರಿಸಲಿಲ್ಲ. ಬೆರಳೆಣಿಕೆಯಷ್ಟು ಮಂದಿ ಮಾತ್ರ ಸಭಾ ಕಾರ್ಯಕ್ರಮವನ್ನು ವೀಕ್ಷಿಸಿದ್ದು ಕಂಡು ಬಂತು. ಬೆಳಗಿನ ಅವಧಿಯ ವೇದಿಕೆ ಕಾರ್ಯಕ್ರಮದಲ್ಲಿ ಖಾಲಿ ಕುರ್ಚಿಗಳೇ ಹೆಚ್ಚಾಗಿ ಗೋಚರಿಸಿದವು.
ನಾಳೆ ನಾಡಿದ್ದು ಜನಸಾಗರ
ಕಳೆದ ಎರಡು ದಿನಗಳಿಂದ ನಡೆಯುತ್ತಿರುವ ಕೃಷಿ ಮೇಳಕ್ಕೆ ಸಿಗುತ್ತಿರುವ ಜನಬೆಂಬಲ ಗಮನಿಸಿದರೆ, ವಾರಾಂತ್ಯವಾದ ನಾಳೆ ಮತ್ತು ನಾಡಿದ್ದು ಇನ್ನಷ್ಟು ಬೆಂಬಲ ವ್ಯಕ್ತವಾಗುವ ನಿರೀಕ್ಷೆ ಹೊಂದಲಾಗಿದೆ. ಅಪಾರ ಸಂಖ್ಯೆಯಲ್ಲಿ ಕೃಷಿ ಪ್ರೇಮಿಗಳು ಹಾಗೂ ಆಸಕ್ತರು ಆಗಮಿಸಲಿದ್ದಾರೆ ಎಂಬ ನಿರೀಕ್ಷೆಯನ್ನು ಆಯೋಜಕರು ಹೊಂದಿದ್ದಾರೆ. ಕಳೆದ ಎರಡು ದಿನಗಳಿಂದ ಭೋಜನಾಲಯ ಸಹ ಭಾರಿ ಸಂಖ್ಯೆಯಲ್ಲಿ ಭರ್ತಿಯಾಗುತ್ತಿದೆ.
ನಾಳೆ ಇನ್ನಷ್ಟು ಸಿದ್ಧತೆ
ನಿನ್ನೆ ಮಳೆಯಿಂದಾಗಿ ಜನರಿಗೆ ಸಾಕಷ್ಟು ಸಮಸ್ಯೆ ಉಂಟಾಯಿತು. ಆದರೆ, ಇಂದು ಭೋಜನಾಲಯ ಹಾಗೂ ವಿವಿಧ ಕಡೆಗಳಲ್ಲಿ ಜನರಿಗೆ ಕೆಸರಿನ ಸಮಸ್ಯೆ ಅಷ್ಟಾಗಿ ಕಾಡದಂತೆ ಮುನ್ನೆಚ್ಚರಿಕೆ ವಹಿಸಿದ್ದೇವೆ. ನಾಳೆ- ನಾಡಿದ್ದು ಸಾಕಷ್ಟು ದೊಡ್ಡ ಸಂಖ್ಯೆಯಲ್ಲಿ ಕೃಷಿಮೇಳಕ್ಕೆ ಜನರು ಬರುವ ನಿರೀಕ್ಷೆ ಇದೆ. ಈ ಹಿನ್ನೆಲೆ ಇನ್ನಷ್ಟು ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಳ್ಳುತ್ತೇವೆ ಎಂದು ಕೃಷಿ ವಿವಿ ಕುಲಪತಿ ಡಾ.ರಾಜೇಂದ್ರ ಪ್ರಸಾದ್ ತಿಳಿಸಿದ್ದಾರೆ.
ಓದಿ: ಕೃಷಿಯಿಂದ ಮಾನವನಿಗೆ ಭದ್ರತೆ ಮತ್ತು ಬದ್ಧತೆ ಸಾಧ್ಯವಾಗಿದೆ : ಡಾ. ಶ್ರೀ ಶಿವಮೂರ್ತಿ ಮುರುಘಾ ಶರಣರು
