ಬಿಬಿಎಂಪಿಯ ಎಲ್ಲ ಚಿತಾಗಾರಗಳಲ್ಲಿ ಶವಸುಡಲು ಆನ್​ಲೈನ್ ಬುಕ್ಕಿಂಗ್.. ಹಣ ವಸೂಲಿಗೆ ಬ್ರೇಕ್​

ನಿಗದಿ ಮಾಡಲಾಗಿರುವ ಸಹಾಯವಾಣಿಗೆ ಕರೆ ಮಾಡಿ, ಸ್ಥಳ - ಸಮಯ ನಿಗದಿ ಬಳಿಕ ಟೋಕನ್ ಸಂಖ್ಯೆ ಮೆಸೇಜ್ ಬರಲಿದೆ, ಅರ್ಧ ಗಂಟೆ ಮೊದಲು ಸ್ಮಶಾನ ತಲುಪಬೇಕು ಎಂದು ತಿಳಿಸಲಾಗಿದೆ. ಇದರಿಂದ ಸ್ಮಶಾನದ ಮುಂದೆ ಗಂಟೆಗಳ ಕಾಲ ಕಾಯುವುದು ತಡೆಯಬಹುದಾಗಿದೆ.

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯ ಎಲ್ಲ ವಲಯಗಳಲ್ಲಿ ಚಿತಾಗಾರ - ಸ್ಮಶಾನಗಳಲ್ಲಿ ಅಂತ್ಯಕ್ರಿಯೆ ವ್ಯವಸ್ಥೆ ಆನ್‌ಲೈನ್ ಮೂಲಕ ಜಾರಿಗೆ ತರಲು ಸರ್ಕಾರ ಆದೇಶಿಸಿದೆ.
20 ಚಿತಾಗಾರಗಳಿಗೂ ಹೊಸ ಆನ್​ಲೈನ್ ವ್ಯವಸ್ಥೆ ಜಾರಿಗೊಳಿಸಿ, ಉಚಿತ ಆ್ಯಂಬುಲೆನ್ಸ್ ಹಾಗೂ ಮೃತದೇಹಗಳ ಅಂತ್ಯಸಂಸ್ಕಾರಕ್ಕೆ ಯಾವುದೇ ಹಣ ವಸೂಲಿ ಮಾಡುವಂತಿಲ್ಲ ಎಂದು ಸೂಚಿಸಿದೆ.

ಆನ್​ಲೈನ್ ಚಿತಾಗಾರ/ ಸ್ಮಶಾನ ನಿರ್ವಹಣಾ ವ್ಯವಸ್ಥೆ 24/7 ಕೆಲಸ ಮಾಡಬೇಕು. ಅಂತ್ಯಕ್ರಿಯೆ ಸ್ಥಳ ಮತ್ತು ಸಮಯ ನಿಗದಿಗೆ ಸಹಾಯವಾಣಿ ಸಂಖ್ಯೆ 8495998495 ಆಗಿದ್ದು, ಇದೇ ಸಂಖ್ಯೆಗೆ ವಾಟ್ಸ್​ಆ್ಯಪ್​ ಸಂದೇಶ ಕೂಡಾ ಕಳಿಸಬಹುದಾಗಿದೆ. ಸಹಾಯವಾಣಿಗೆ ಕರೆ ಮಾಡಿ, ಸ್ಥಳ-ಸಮಯ ನಿಗದಿ ಬಳಿಕ ಟೋಕನ್ ಸಂಖ್ಯೆ ಮೆಸೇಜ್ ಬರಲಿದೆ, ಅರ್ಧ ಗಂಟೆ ಮೊದಲು ಸ್ಮಶಾನ ತಲುಪಬೇಕು ಎಂದು ತಿಳಿಸಲಾಗಿದೆ.

ಇದರ ನಿರ್ವಹಣೆ ಕುರಿತು ನೋಡಲ್ ಅಧಿಕಾರಿಗಳು ಮೇಲ್ವಿಚಾರಣೆ ನಡೆಸುತ್ತಿರಬೇಕು, ಆನ್​ಲೈನ್ ವ್ಯವಸ್ಥೆಯಲ್ಲಿ ಸಮಸ್ಯೆ ಕಂಡು ಬಂದರೆ ತಕ್ಷಣವೇ ಪರಿಹರಿಸಬೇಕು. ಟೋಕನ್ ವಾರು ಅಂತ್ಯಕ್ರಿಯೆ ಪೂರ್ಣಗೊಂಡ ಬಗ್ಗೆ ನೋಡಲ್ ಅಧಿಕಾರಿಗಳು ತಂತ್ರಾಂಶದಲ್ಲಿ ನಮೂದಿಸಬೇಕು ಎಂದರು ತಿಳಿಸಲಾಗಿದೆ.

ನಗರದ ಒಟ್ಟು 18 ಚಿತಾಗಾರ/ ಸ್ಮಶಾನಗಳಲ್ಲಿ ದಿನವೊಂದಕ್ಕೆ 500 ಅಂತ್ಯಸಂಸ್ಕಾರ ನಡೆಸುವ ಸಾಮರ್ಥ್ಯವಿದೆ. ಈ ಹಿಂದೆಯೂ ಚಿತಾಗಾರ ಬುಕ್ಕಿಂಗ್​ಗಾಗಿ ಕೇಂದ್ರೀಕೃತ ವ್ಯವಸ್ಥೆ ಜಾರಿಗೆ ತಂದ ಪಾಲಿಕೆ ಮುಂದುವರಿಸುವಲ್ಲಿ ವಿಫಲವಾಗಿ ಬಳಿಕ ವಲಯವಾರು ಆರೋಗ್ಯ ಅಧಿಕಾರಿಗಳಿಗೇ ಜವಾಬ್ದಾರಿ ವರ್ಗಾಯಿಸಿತ್ತು.

ಇದನ್ನೂ ಓದಿ: ಕುಂಭಮೇಳದಿಂದ ಬೆಂಗಳೂರಿಗೆ ಬಂದ ಮಹಿಳೆಗೆ ಕೊರೊನಾ - ಸಂಪರ್ಕಿತ 14 ಜನರಿಗೆ ಸೋಂಕು!