ಬೆಂಗಳೂರು: 2023-24 ಸಾಲಿನಲ್ಲಿ ಕರ್ನಾಟಕ ರಾಜ್ಯಕ್ಕಾಗಿ 3.59 ಲಕ್ಷ ಕೋಟಿ ರೂ.ಗಳ ಆದ್ಯತಾ ವಲಯದ ಸಾಲದ ಗುರಿಯನ್ನು ಯೋಜಿಸಿದೆ ಎಂದು ನಬಾರ್ಡ್ ನ ಮುಖ್ಯ ಪ್ರಧಾನ ವ್ಯವಸ್ಥಾಪಕರು (CGM) ಟಿ.ರಮೇಶ್ ತಿಳಿಸಿದ್ದಾರೆ. ಇಲ್ಲಿನ ಕೆ.ಜಿ.ರಸ್ತೆಯಲ್ಲಿ ಆಯೋಜಿಸಲಾಗಿದ್ದ 2023-24ನೇ ಸಾಲಿನ ಸ್ಟೇಟ್ ಫೋಕಸ್ ಪೇಪರ್ ಬಿಡುಗಡೆಯ ವಿಚಾರಗೋಷ್ಠಿಯಲ್ಲಿ ಮಾತನಾಡಿದ ಅವರು, ಇದು ಹಿಂದಿನ ವರ್ಷಗಳ ಸಾಲದ ಸಾಮರ್ಥ್ಯಕಿಂತ ಶೇ. 8 ರಷ್ಟು ಹೆಚ್ಚಾಗಿದೆ ಎಂದು ಹೇಳಿದರು.
ನಬಾರ್ಡ್ 2023-24ನೇ ಸಾಲಿನ ರಾಜ್ಯದ 3.59 ಲಕ್ಷ ಕೋಟಿ ರೂ.ಗಳ ಆದ್ಯತಾ ವಲಯಗಳ ಸಾಲದ ಅಡಿಯಲ್ಲಿ ಕೃಷಿ ಮೂಲಸೌಕರ್ಯ ಮತ್ತು ಪೂರಕ ಚಟುವಟಿಕೆಗಳು ಸೇರಿದಂತೆ ಕೃಷಿ ಕ್ಷೇತ್ರಕ್ಕೆ ರೂ.1.79 ಲಕ್ಷ ಕೋಟಿ (50%), MSME ವಲಯಕ್ಕೆ ರೂ.1.35 ಲಕ್ಷ ಕೋಟಿ (38%) ಮತ್ತು ಇತರ ಆದ್ಯತಾ ವಲಯಗಳಿಗೆ ರೂ.0.45 ಲಕ್ಷ ಕೋಟಿ (12%) ಸಾಲದ ಗುರಿಯನ್ನು ಯೋಜಿಸಿದೆ ಎಂದು ಮಾಹಿತಿ ನೀಡಿದರು.
ಕೃಷಿ ಬೆಳವಣಿಗೆಯನ್ನು ವೇಗಗೊಳಿಸಲು ಮತ್ತು ಉಳಿಸಿಕೊಳ್ಳಲು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಆದ್ಯತೆಗಳನ್ನು ಗಮನದಲ್ಲಿಟ್ಟುಕೊಂಡು ಕೆಲಸ ಮಾಡಲಾಗುತ್ತದೆ. ಮಾರುಕಟ್ಟೆ ನೇತೃತ್ವದ ಕೃಷಿ ಉದ್ಯಮಗಳು ಮತ್ತು ಸ್ಥಳೀಯ ಮಟ್ಟದಲ್ಲಿ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುವ ಮೂಲಕ ರೈತರ ಆದಾಯವನ್ನು ಹೆಚ್ಚಿಸುವ ಮತ್ತು ಕೃಷಿಯಲ್ಲಿ ಉತ್ಪಾದಕತೆ ಹೆಚ್ಚಿಸುವ ಕೆಲಸ ಮಾಡಲಾಗುತ್ತದೆ. ಜೊತೆಗೆ ಆಹಾರ ಮತ್ತು ಕೃಷಿ ಸಂಸ್ಕರಣಾ ಚಟುವಟಿಕೆಗಳನ್ನು ಸುಗಮಗೊಳಿಸುವುದು, MSME ಮತ್ತು ಅನೌಪಚಾರಿಕ ಸಾಲ ವಿತರಣಾ ವ್ಯವಸ್ಥೆಗಳು (SHGs/JLGs) ಮತ್ತು ಕೃಷಿಯಲ್ಲಿ ಬಂಡವಾಳ ರಚನೆಗೆ ಸಾಲದ ಪ್ರಕ್ಷೇಪಣಗಳಿಗೆ ವಿಶೇಷ ಒತ್ತು ನೀಡಲಾಗುವುದು ಎಂದು ತಿಳಿಸಿದರು.
ರೈತರಿಗೆ ಸಕಾಲಿಕ ಸಾಲ ವಿತರಣೆ : ರೈತರು ಸಕಾಲಿಕ ಮತ್ತು ತೊಂದರೆಯಿಲ್ಲದ ಸಾಲ ವಿತರಣೆಯನ್ನು ಖಚಿತಪಡಿಸಿಕೊಳ್ಳಲು ರಾಜ್ಯ ಸರ್ಕಾರದ FRUITS ಪೋರ್ಟಲ್ನೊಂದಿಗೆ ಪ್ರಸ್ತಾವಿತ eKCC ಪೋರ್ಟಲ್ ನ ಏಕೀಕರಣದ ಕೆಲಸವನ್ನು ನಬಾರ್ಡ್ ಪ್ರಾರಂಭಿಸಿದೆ. ಕೃಷಿ ಮೌಲ್ಯ ಸರಪಳಿ ಹಣಕಾಸು ಡಿಜಿಟಲೀಕರಣದ ಮೇಲೆ ಪ್ರಾಯೋಗಿಕ ಯೋಜನೆಯನ್ನು ನಬಾರ್ಡ್ ಕೈಗೊಂಡಿದೆ. ರಾಜ್ಯದ ತುಮಕೂರು ಜಿಲ್ಲೆಯಲ್ಲಿ ಅಗ್ರಿ ಸ್ಟಾರ್ಟ್ ಅಪ್, ಸಾರ್ವಜನಿಕ ವಲಯದ ಬ್ಯಾಂಕ್ ಮತ್ತು FPO ಗಳನ್ನೂ ಅನುಷ್ಠಾನಗೊಳಿಸುತ್ತಿದೆ ಎಂದು ತಿಳಿಸಿದರು.
ಸಣ್ಣ ಮತ್ತು ಅತಿ ಸಣ್ಣ ರೈತರಿಗೆ ನೀರಿನ ಭದ್ರತೆ : ಉತ್ತರ ಕರ್ನಾಟಕದ ಶುಷ್ಕ ಮತ್ತು ಅರೆ ಶುಷ್ಕ ಪ್ರದೇಶಗಳಲ್ಲಿನ ಸಣ್ಣ ಮತ್ತು ಅತಿ ಸಣ್ಣ ರೈತರಿಗೆ ನೀರಿನ ಭದ್ರತೆಯನ್ನು ತರಲು ಉದ್ದೇಶಿಸಲಾಗಿದೆ. ಈ ಸಂಬಂಧ ನಬಾರ್ಡ್ ಜಂಟಿ ಹೊಣೆಗಾರಿಕೆ ಗುಂಪುಗಳಿಂದ (JLG) ಕೃಷಿ ಹೊಂಡಗಳ ನಿರ್ಮಾಣದ ಮೂಲಕ ನೀರಿನ ಸಂರಕ್ಷಣೆಯ ವಿಶಿಷ್ಟ ಯೋಜನೆಯನ್ನು ಕೈಗೊಳ್ಳಲಾಗಿದೆ. ಈ ಸಂಬಂಧ ಎರಡು ಒಪ್ಪಂದಗಳನ್ನು ಪ್ರಮುಖ ಬ್ಯಾಂಕುಗಳೊಂದಿಗೆ ಮಾಡಿಕೊಳ್ಳಲಾಗಿದೆ. ರೈತರ ಆದಾಯವನ್ನು ಹೆಚ್ಚಿಸಲು SBI ಮತ್ತು HDFC ಬ್ಯಾಂಕ್ ಗಳು ಈ JLGಗಳಿಗೆ ಮೇಲಾಧಾರ ಉಚಿತ ಸಾಲವನ್ನು ನೀಡಲು ಒಪ್ಪಿದೆ ಎಂದರು.
2021-22ರ ಅವಧಿಯಲ್ಲಿ ನೆಲಮಟ್ಟದ ಸಾಲದ ಹರಿವು ಸ್ವಲ್ಪಮಟ್ಟಿಗೆ ಕಡಿಮೆ ಆಗಿತ್ತು. ಇದಕ್ಕೆ ಮುಖ್ಯ ಕಾರಣ ಕೋವಿಡ್ ಸಾಂಕ್ರಾಮಿಕ ರೋಗ ಮತ್ತು ಕೃಷಿ ಸಾಲಗಳ ಪುನರ್ರಚನೆಯಿಂದಾಗಿ ರೈತರು ಹೊಸ ಸಾಲವನ್ನು ಪಡೆಯುವುದನ್ನು ನಿರ್ಬಂಧಿಸಿತ್ತು. ಜೊತೆಗೆ GLC ಪೋರ್ಟಲ್ ನಲ್ಲಿ ಪರಿಷ್ಕರಿಸಿದ ದತ್ತಾಂಶ ಸೆರೆಹಿಡಿಯುವಲ್ಲಿ ತಾಂತ್ರಿಕ ಸಮಸ್ಯೆಗಳು ಇತ್ತು. ಆದಾಗ್ಯೂ, 2022ರ ಸೆಪ್ಟೆಂಬರ್ 30ಕ್ಕೆ ನೆಲ ಮಟ್ಟದ ಸಾಲ ಹರಿವಿನ ಗುರಿಯನ್ನು ಶೇ. 43ರಷ್ಟು ಸಾಧಿಸಲಾಗಿದೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ ಅದನ್ನು ಮೀರಿಸುವ ಆಶಾವಾದವನ್ನು ವ್ಯಕ್ತಪಡಿಸಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಆರ್ಥಿಕ ಇಲಾಖೆ ಅಪರ ಮುಖ್ಯ ಕಾರ್ಯದರ್ಶಿ ಐಎಸ್ಎನ್ ಪ್ರಸಾದ್, ರಾಜ್ಯದಲ್ಲಿ ಕೃಷಿಯೋಗ್ಯ ಪ್ರದೇಶದ ಮೂರನೇ ಎರಡರಷ್ಟು ಪ್ರದೇಶವು ಮಳೆಯಾಶ್ರಿತ ಮತ್ತು ಬರಪೀಡಿತವಾಗಿದೆ. ಇದರಿಂದ ನೀರಾವರಿ ಮೂಲಸೌಕರ್ಯಗಳನ್ನು ರಚಿಸಲು ರಾಜ್ಯವು ಯಾವಾಗಲೂ ಬಹುಮುಖಿ ವಿಧಾನವನ್ನು ಅಳವಡಿಸಿಕೊಳ್ಳುತ್ತಿದೆ. ಪ್ರಮುಖ, ಮಧ್ಯಮ, ಸಣ್ಣ ಮತ್ತು ಸೂಕ್ಷ್ಮ ನೀರಾವರಿ ಯೋಜನೆಗಳಿಗೆ ಸಮಾನ ಗಮನವನ್ನು ನೀಡುತ್ತಿದೆ. ರಾಜ್ಯ ಸರ್ಕಾರದ ಈ ಉತ್ತಮ ಯೋಜಿತ ಹೂಡಿಕೆಗಳು, ಉತ್ತಮ ಬ್ಯಾಂಕಿಂಗ್ ನೆಟ್‌ವರ್ಕ್‌ನೊಂದಿಗೆ ಗ್ರಾಮೀಣ ಮೂಲಸೌಕರ್ಯ ಸೃಷ್ಟಿಗಾಗಿ ಹಾಗು ಸುಧಾರಿತ ಗ್ರಾಮೀಣ ಆರ್ಥಿಕ ಚಟುವಟಿಕೆಗಳಿಗೆ ದಾರಿ ಮಾಡಿಕೊಟ್ಟಿವೆ. ಜೊತೆಗೆ ನೆಲಮಟ್ಟದ ಸಾಲದ ಹರಿವನ್ನು ಸೂಕ್ತ ಕಾಲಾವಧಿಯಲ್ಲಿ ಹೆಚ್ಚಿಸಿದೆ ಎಂದು ಹೇಳಿದರು.
ಯೋಜನೆ, ಕಾರ್ಯಕ್ರಮ ಸಂಯೋಜನೆ ಮತ್ತು ಸಾಂಖ್ಯಿಕ ಇಲಾಖೆ ಅಪರ ಮುಖ್ಯ ಕಾರ್ಯದರ್ಶಿಗಳಾದ ಶಾಲಿನಿ ರಜನೀಶ್ ಮಾತನಾಡಿ, ಕರ್ನಾಟಕದ 54 ಹಳ್ಳಿಗಳಲ್ಲಿ ಸುಸಜ್ಜಿತ ಬ್ಯಾಂಕ್ ಶಾಖೆಗಳನ್ನು ಹೊಂದಲು ಒತ್ತು ನೀಡಿದ್ದೇವೆ. ರಾಜ್ಯದಲ್ಲಿ ಶೇ.88 ರಷ್ಟು ಮಹಿಳಾ ಉದ್ಯಮಗಳು ಆಸ್ತಿಗಳ / ಮೇಲಾಧಾರಗಳ ಕೊರತೆಯಿಂದಾಗಿ ಸ್ವಂತ ನಿಧಿಯಿಂದ ಸ್ಥಾಪಿಸಲಾಗಿದೆ ಎಂದು ತಿಳಿಸಿದರು. ಇಂತಹ ಉದ್ಯಮಗಳನ್ನು ಬೆಂಬಲಿಸಲು ಬ್ಯಾಂಕ್ ಗಳನ್ನು ಒತ್ತಾಯಿಸಿದರು.
ಇದನ್ನೂ ಓದಿ : ನಬಾರ್ಡ್ ವತಿಯಿಂದ ರಾಜ್ಯಪಟ್ಟದ ಸಾಲಗೋಷ್ಠಿ ಸಮಾವೇಶ
