ರಾಜ್ಯದಲ್ಲಿ ಶಾಲೆ ಪ್ರಾರಂಭ ವಿಚಾರ: ತಜ್ಞರೊಂದಿಗೆ ಸಚಿವ ಶ್ರೀರಾಮುಲು ಮಹತ್ವದ ಸಭೆ

ಕೇಂದ್ರ ಸರ್ಕಾರ ಅಕ್ಟೋಬರ್ 15ಕ್ಕೆ ಶಾಲಾ - ಕಾಲೇಜು ಪ್ರಾರಂಭ ಮಾಡಲು ಅಧಿಸೂಚನೆ ನೀಡಿದ ಹಿನ್ನೆಲೆ ಇಂದು ಸಚಿವ ಶ್ರೀರಾಮುಲು ಶಾಲಾ-ಕಾಲೇಜು ಆರಂಭ ಕುರಿತಂತೆ ತಜ್ಞರ ಜೊತೆ ಮಹತ್ವದ ಸಮಾಲೋಚನೆ ನಡೆಸಿದ್ದಾರೆ.

ಬೆಂಗಳೂರು: ಇಂದು ಆರೋಗ್ಯ ಸಚಿವ ಶ್ರೀರಾಮುಲು ಶಾಲಾ ಕಾಲೇಜು ಆರಂಭಿಸುವುದರ ಬಗ್ಗೆ ತಜ್ಞರೊಂದಿಗೆ ಮಹತ್ವದ ಸಭೆ ನಡೆಸಿದರು.

ರಾಜ್ಯದಲ್ಲಿ ಕೊರೊನಾ ಆರ್ಭಟದಿಂದಾಗಿ ಶಾಲಾ - ಕಾಲೇಜು ಆರಂಭಕ್ಕೆ ಸಂಕಷ್ಟ ಎದುರಾಗಿದೆ. ಕೇಂದ್ರ ಸರ್ಕಾರ ಅಕ್ಟೋಬರ್ 15ಕ್ಕೆ ಶಾಲಾ-ಕಾಲೇಜು ಪ್ರಾರಂಭ ಮಾಡಲು ಅಧಿಸೂಚನೆ ನೀಡಿದೆ.. ಆದರೆ, ರಾಜ್ಯದಲ್ಲಿ ಕೊರೊನಾ ನಿತ್ಯ 10ಸಾವಿರ ಗಡಿದಾಟುತ್ತಿದ್ದು, ಶಾಲೆ ಆರಂಭದ ಬಗ್ಗೆ ಚರ್ಚೆಗಳು ನಡೆಯುತ್ತಿದೆ.‌ ಈ ಹಿನ್ನೆಲೆಯಲ್ಲಿ ಈ ಸಭೆ ನಡೆಸಲಾಯ್ತು.

ಈ ಸಂಬಂಧ ಮಾತಾನಾಡಿದ ಆರೋಗ್ಯ ಸಚಿವ ಶ್ರೀರಾಮುಲು, ಮಕ್ಕಳು ಹಾಗೂ ಪೋಷಕರು ತೊಂದರೆಗೆ ಒಳಗಾಗಬಾರದು ಎಂಬ ಕಾರಣಕ್ಕೆ ನಾವು ಮುನ್ನೆಚ್ಚರಿಕಾ ಕ್ರಮ ಕೈಗೊಂಡಿದ್ದೇವೆ. ಟೆಕ್ನಿಕಲ್ ಎಕ್ಸ್​​ಪರ್ಟ್ ಡಾ. ಸುದರ್ಶನ್, ಶಿಕ್ಷಸ ಸಚಿವ ಸುರೇಶ್ ಕುಮಾರ್ ರೊಂದಿಗೆ ಚರ್ಚೆ ಮಾಡಿದ್ದೇವೆ.. ಮಕ್ಕಳ ಮಾನಸಿಕ ಸಮತೋಲನ ಹಾಳಾಗದಂತೆ ಕ್ರಮ ಕೈಗೊಳ್ಳಲಾಗುತ್ತೆ.. ಈ ಬಗ್ಗೆ ಮಕ್ಕಳ ತಜ್ಞರ ಬಳಿಯೂ ಮಾಹಿತಿ ಕೇಳಿದ್ದೇವೆ‌‌. ಮಕ್ಕಳಿಗೆ ಕೌನ್ಸೆಲಿಂಗ್ ಮಾಡಿ, ಅವರಲ್ಲಿ ಕಾನ್ಫಿಡೆನ್ಸ್ ಮೂಡಿಸಿ ನಂತರವಷ್ಟೇ ಶಾಲಾ - ಕಾಲೇಜು ತೆರೆಯಲು ಚಿಂತನೆ ಮಾಡಲಾಗುತ್ತೆ.

ಕೇಂದ್ರ ಸರ್ಕಾರ ಆಗಲೇ ಅನುಮತಿ ಕೊಟ್ಟಿದೆ. ಆದರೆ, ಪೋಷಕರು ಮತ್ತು ಮಕ್ಕಳನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ನಂತರ ನಿರ್ಧಾರ ಮಾಡಲಾಗುತ್ತೆ. ಆರೋಗ್ಯ ಇಲಾಖೆಯ ಮುಖ್ಯ ಕಾರ್ಯದರ್ಶಿ ಜಾವೇದ್ ಅಕ್ತರ್ ಅವರ ಪ್ರಕಾರ, ಎಸ್ಎಸ್ಎಲ್​ಸಿ ಪರೀಕ್ಷೆ ವೇಳೆ ಮಾಡಿದ್ದ ಎಸ್. ಒ. ಪಿ.ಯನ್ನೇ ಇಲ್ಲಿಯೂ ಮಾಡಬೇಕಾಗಿದೆ. ಅದನ್ನೇ ಶಿಕ್ಷಣ ಇಲಾಖೆಗೆ ಕೊಡುವಂತಹ ಕೆಲಸ ಮಾಡುತ್ತೇವೆ.

ಈ ಹಂತದಲ್ಲಿ ಶಾಲೆ ಕಾಲೇಜು ಪ್ರಾರಂಭ ಮಾಡಬೇಕಾ- ಬೇಡ್ವಾ ಎಂಬುದನ್ನು ತೀರ್ಮಾನ ಮಾಡಿಲ್ಲ. ಕೇಂದ್ರ ಸರ್ಕಾರ ರಾಜ್ಯ ಸರ್ಕಾರದ ವಿವೇಚನೆಗೆ ಬಿಟ್ಟ ವಿಚಾರ ಎಂದು ಹೇಳಿದೆ. ತಜ್ಞರ ಜೊತೆ ಅಭಿಪ್ರಾಯ ಹಂಚಿಕೊಳ್ಳಬೇಕಾಗಿದೆ. ನಂತರ ಶಿಕ್ಷಣ ಇಲಾಖೆಗೆ ಈ ಬಗ್ಗೆ ವರದಿ ನೀಡಲಾಗುತ್ತೆ ಎಂದು ತಿಳಿಸಿದರು..