ಆನೇಕಲ್ : ಪ್ರೇಮ ವಿವಾಹಕ್ಕೆ ಕುಟುಂಬದವರು ಒಪ್ಪಲಿಲ್ಲ ಎಂದು ಯುವ ಪ್ರೇಮಿಗಳು ರೈಲಿಗೆ ಸಿಲುಕಿ ಆತ್ಮಹತ್ಯೆ ಮಾಡಿಕೊಂಡ ಘಟನೆ ಭಾನುವಾರ ನಡೆದಿದ್ದು, ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ. ಸಮಂದೂರು ದಿನ್ನೆ ರೈಲ್ವೆ ಹಳಿ ಮೇಲೆ ನಿನ್ನೆ ಸಂಜೆ ಹೊಸೂರು ಕಡೆಗೆ ಹೊರಟಿದ್ದ ರೈಲಿಗೆ ಪ್ರೇಮಿಗಳು ಸಿಲುಕಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಸಮಂದೂರು ಬಳಿಯ ಮಾರನಾಯಕನಹಳ್ಳಿಯ ಮಣಿ ಮತ್ತು ತಮಿಳುನಾಡಿನ ಕೊತ್ತಗೊಂಡಪಲ್ಲಿಯ ಅನುಷಾ ಆತ್ಮಹತ್ಯೆಗೆ ಶರಣಾದ ಪ್ರೇಮಿಗಳು ಎಂದು ಗುರುತಿಸಲಾಗಿದೆ. ಭಾನುವಾರ ಮಾರನಾಯಕನಹಳ್ಳಿಯ ಹುಡುಗನ ಮನೆ ಬಳಿ ಇಬ್ಬರು ಕಾಣಿಸಿಕೊಂಡಿದ್ದರು. ಈ ಕುರಿತು ಹುಡುಗಿಯ ಮನೆಗೆ ಹುಡುಗನ ಸಂಬಂಧಿಕರು ವಿಷಯ ಮುಟ್ಟಿಸಿದ್ದರಂತೆ. ಅನಂತರ ಸಂಜೆಯ ವೇಳೆಗೆ ಇಬ್ಬರ ಮೃತ ದೇಹಗಳು ರೈಲ್ವೆ ಹಳಿಯ ಮೇಲೆ ಕಾಣಿಸಿಕೊಂಡಿವೆ.
ಇದನ್ನೂ ಓದಿ : ಮಕ್ಕಳಿಲ್ಲದ ದಂಪತಿಗಳೇ ಈ ನಕಲಿ ವೈದ್ಯ ದಂಪತಿಗಳ ಟಾರ್ಗೆಟ್: ಔಷಧ ತಿಂದವರ ಆರೋಗ್ಯ ಸ್ಥಿತಿ ಗಂಭೀರ!
ರಾತ್ರಿ ಬೈಯಪ್ಪನಹಳ್ಳಿ ಪೊಲೀಸರಿಗೆ ಮಾಹಿತಿ ತಿಳಿದು ಶವಗಳನ್ನು ಪರಿಶೀಲನೆ ನಡೆಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಹುಡುಗನ ಮೊಬೈಲ್ ರಿಂಗ್ ಆಗುತ್ತಿದ್ದು, ಯಾರೂ ಪ್ರತಿಕ್ರಿಯಿಸುತ್ತಿಲ್ಲ. ಜೊತೆಗೆ ಹುಡುಗಿಯ ಮೊಬೈಲ್ ಹುಡುಗನ ಸಂಬಂಧಿಕರ ಬಳಿಯಿದೆ ಎಂದು ತಿಳಿದುಬಂದಿದೆ.
