ಸ್ಮಶಾನದ ಜಾಗ ಪರಿಶೀಲನೆ ವಿಚಾರ: ಬಿಬಿಎಂಪಿ ಅಧಿಕಾರಿಗಳ ಮೇಲೆ ಸ್ಥಳೀಯರಿಂದ ಹಲ್ಲೆ ಯತ್ನ

ಕೋವಿಡ್ ಶವಗಳ ದಹನಕ್ಕಾಗಿ ಸ್ಮಶಾನ ಜಾಗದ ಕೊರತೆ ಉಂಟಾಗಿದ್ದು, ಹೊಸ ಜಾಗದ ಹುಡುಕಾಟದಲ್ಲಿ ಬಿಬಿಎಂಪಿ ನಿರತವಾಗಿದೆ. ಈ ಹಿನ್ನೆಲೆ ನಗರದ ಮಾವಳ್ಳಿಪುರದ ಬಳಿ ಜಾಗ ಗುರುತಿಸಿರುವುದಕ್ಕೆ ಸ್ಥಳೀಯರಿಂದ ತೀವ್ರ ವಿರೋಧ ವ್ಯಕ್ತವಾಗಿದ್ದು, ಸ್ಥಳ ಪರಿಶೀಲನೆಗೆ ತೆರಳಿದ್ದ ಅಧಿಕಾರಿಗಳ ಜೊತೆ ಮಾತಿನ ಚಕಮಕಿ ನಡೆದಿದೆ.

ಬೆಂಗಳೂರು: ಕೋವಿಡ್​​​ನಿಂದ ಮೃತಪಟ್ಟವರ ಅಂತ್ಯಕ್ರಿಯೆಗೆ ತೆರೆದ ಸ್ಮಾಶನದ ವ್ಯವಸ್ಥೆ ವಿಚಾರವಾಗಿ ಬಿಬಿಎಂಪಿ‌ ಯಲಹಂಕದ ಮಾವಳ್ಳಿಪುರದ ಬಳಿ 20 ಎಕರೆ ಜಾಗ ಗೊತ್ತು ಮಾಡಿತ್ತು. ಇನ್ನು ಈ ವಿಚಾರವಾಗಿ ಸ್ಮಾಶನದ ಜಾಗ ಸರ್ವೇಗೆ ಹೋದ ಬಿಬಿಎಂಪಿ ಅಧಿಕಾರಿಗಳ ಮೇಲೆ‌ ಸ್ಥಳೀಯರು ಮಾತಿನ ಚಕಮಕಿ ನಡೆದಿದ್ದು, ಹಲ್ಲೆಗೆ ಯತ್ನಿಸಿರುವ ಘಟನೆ ನಡೆದಿದೆ.

2012ರ ವರೆಗೆ ಬಿಬಿಎಂಪಿ ಲ್ಯಾಂಡ್‌ಫಿಲ್ಲಿಂಗ್‌ಗಾಗಿ ಈ ಜಾಗ ಬಳಸಿಕೊಳ್ಳುತ್ತಿತ್ತು. ಆದರೆ, ವಾಯು ಮಾಲಿನ್ಯದಿಂದ ಕೋರ್ಟ್ ಮೆಟ್ಟಿಲೇರಿ ವಾಯುಮಾಲಿನ್ಯ ನಿಯಂತ್ರಣ ಇಲಾಖೆ ಈ ಜಾಗದಲ್ಲಿ ತ್ಯಾಜ್ಯ ಸುರಿಯದಂತೆ ಆದೇಶ ನಿಡಲಾಗಿತ್ತು. ಹೀಗಾಗಿ ಗೋಮಾಳದ ಖಾಲಿ ಬಿದ್ದಿದ್ದ ಮಾವಳ್ಳಿಪುರ ಲ್ಯಾಂಡ್‌ಫಿಲ್ಲಿಂಗ್ ಮಾಡಲು ಬಿಬಿಎಂಪಿ ಮುಂದಾಗಿತ್ತು.

ಇದೀಗ ಕೊರೊನಾ ಮೃತ ದೇಹಗಳನ್ನು ಸುಡಲು ತೆರೆದ ಸ್ಮಶಾನಕ್ಕೆ ಈ ಜಾಗವನ್ನ ಬಿಬಿಎಂಪಿ ಗುರುತಿಸಿದೆ. ಈ ಹಿನ್ನೆಲೆ ಇಂದು ಜಾಗ ಪರಿಶೀಲನೆ ನಡೆಸಲು ಅಧಿಕಾರಿಗಳು ಹೋದಾಗ ಸ್ಥಳೀಯರಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ. ಈ ಜಾಗದ ಸುತ್ತ-ಮುತ್ತ 12 ಹಳ್ಳಿಗಳಿವೆ, ಈಗ ಕೊರೊನಾ ಸೋಂಕಿತರ ಶವಗಳನ್ನ ತಂದು ಸುಟ್ಟರೆ ಇದರಿಂದ ಆಗುವ ಪರಿಣಾಮಗಳಿಗೆ ಯಾರು ಹೊಣೆ ಎಂದು ಸ್ಥಳೀಯರು ಪ್ರಶ್ನಿಸಿದ್ದಾರೆ.

ಈ ಬಗ್ಗೆ ಸ್ಥಳೀಯರನ್ನು ಮನವೊಲಿಸಲು ಬಿಬಿಎಂಪಿ ಅಧಿಕಾರಿಗಳು ಪ್ರಯತ್ನಿಸಿದ್ದಾರೆ. ಆದರೆ, ಇದ್ಯಾವುದಕ್ಕೂ ಒಪ್ಪದ ಸ್ಥಳೀಯರು ಸ್ಮಶಾನ ನಿರ್ಮಾಣ ಮಾಡದಂತೆ ಪಟ್ಟು ಹಿಡಿದಿದ್ದಾರೆ.

ಇದನ್ನೂ ಓದಿ: 18 ರಿಂದ 45 ವರ್ಷದೊಳಗಿನವರಿಗಾಗಿ ಹಂತ ಹಂತವಾಗಿ ಲಸಿಕೆ ಅಭಿಯಾನ; ಸಿಎಂ ಬಿಎಸ್​ವೈ