ಬೆಂಗಳೂರು: ಕರ್ನಾಟಕ ಪ್ರೀಮಿಯರ್ ಲೀಗ್ ಮ್ಯಾಚ್ ಫಿಕ್ಸಿಂಗ್ ಪ್ರಕರಣದ ತನಿಖೆ ನಡೆಸುತ್ತಿರುವ ಸಿಸಿಬಿ ಇದೀಗ ಬೆಂಗಳೂರು ಬ್ಲಾಸ್ಟರ್ಸ್ ತಂಡದ ಮಾಲೀಕರಿಗೆ ನೋಟಿಸ್ ನೀಡಿದ್ದು, ಇದೇ ತಿಂಗಳ 28ರೊಳಗೆ ವಿಚಾರಣೆಗೆ ಹಾಜರಾಗಬೇಕೆಂದು ತಿಳಿಸಿದೆ.
ಬ್ಲಾಸ್ಟರ್ಸ್ ತಂಡದ ಆಟಗಾರರು ನಡೆಸಿದ್ದ ಫಿಕ್ಸಿಂಗ್ ವಿಚಾರಕ್ಕೆ ಸಂಬಂಧಿಸಿದಂತೆ ಈಗಾಗಲೇ ಭಾರತೀನಗರ ಠಾಣೆಯಲ್ಲಿ ದೂರು ದಾಖಲಿಸಲಾಗಿದೆ. ಬಳ್ಳಾರಿ ಟಸ್ಕರ್ಸ್ ಆಟಗಾರರ ವಿಚಾರಣೆ ನಡೆಸಿರುವ ಸಿಸಿಬಿ ಇದೀಗ ಬೆಂಗಳೂರು ಬ್ಲಾಸ್ಟರ್ಸ್ ತಂಡದ ವಿಚಾರಣೆ ನಡೆಸಲು ಮುಂದಾಗಿದೆ.
ಏನಿದು ಪ್ರಕರಣ
ಕೆಪಿಎಲ್ 2018ನೇ ಸಾಲಿನ 18ನೇ ಮ್ಯಾಚ್ ಹುಬ್ಬಳ್ಳಿ ಟೈಗರ್ಸ್ ಮತ್ತು ಬೆಂಗಳೂರು ಬ್ಲಾಸ್ಟರ್ಸ್ ನಡುವೆ ನಡೆದಿದ್ದು. ಈ ವೇಳೆ ಬುಕ್ಕಿಗಳು ಹೇಳಿದಂತೆ ಪಂದ್ಯವನ್ನ ಬೆಂಗಳೂರು ಬ್ಲಾಸ್ಟರ್ಸ್ ತಂಡದ ಆಟಗಾರನಾದ ಎಂ.ವಿಶ್ವನಾಥನ್ ಹಾಗೂ ಕೋಚ್ ವಿನು ಪ್ರಸಾದ್ ಹಾಗೂ ಬುಕ್ಕಿ ಮನೋಜ್ ಕುಮಾರ್ ಮೋಸದ ಆಟದಲ್ಲಿ ಫಾಲ್ಗೊಂಡು ವೆಂಕಿ ಖಾನ್ ಫಿಕ್ಸಿಂಗ್ ಮಾಡಿದ್ದರು.
ಕೆಪಿಎಲ್ ಟೂರ್ನಿ 2018ರ ಆಗಸ್ಟ್ 15 ರಿಂದ 2018 ಸಪ್ಟೆಂಬರ್ 3ರವರೆಗೆ ನಡೆದಿತ್ತು. 31-2018 ರಂದು ಹುಬ್ಬಳ್ಳಿ ಟೈಗರ್ಸ್ ಮತ್ತು ಬೆಂಗಳೂರು ಬ್ಲಾಸ್ಟರ್ ತಂಡದ ನಡುವೆ ಮೈಸೂರಿನ ಶ್ರೀ ಕಂಠದತ್ತ ನರಸಿಂಹ ಒಡೆಯರ್ ಮೈದಾನದಲ್ಲಿ ನಡೆದಿತ್ತು. ಮ್ಯಾಚ್ ನಡೆಯುವ ಮೊದಲೇ ಭಾರತೀನಗರದ ಪೊಲೀಸ್ ಠಾಣಾ ವ್ಯಾಪ್ತಿಯ ಲೆಮನ್ ಟ್ರೀ ಹೊಟೇಲ್ನಲ್ಲಿ ಉಭಯ ತಂಡಗಳ ನಡುವಿನ ಪಂದ್ಯ ಫಿಕ್ಸಿಂಗ್ ಆಗಿತ್ತು.
ಅದರಂತೆ ಕೋಚ್ ವಿನು ಪ್ರಸಾದ್ ಮೈಸೂರಿನ ಶ್ರೀಕಂಠದತ್ತ ನರಸಿಂಹ ಒಡೆಯರ್ ಮೈದಾನದಲ್ಲಿ ನಡೆದ ಮ್ಯಾಚ್ನಲ್ಲಿ ಬೆಂಗಳೂರು ಬ್ಲಾಸ್ಟರ್ಸ್ ತಂಡದ ಆರಂಭಿಕ ಆಟಗಾರ ಎಂ ವಿಶ್ವನಾಥ್ಗೆ ನಿಧಾನಗತಿ ಆಟವಾಡಿ 20 ಬಾಲ್ಗಳಲ್ಲಿ 10ಗಿಂತಲೂ ಕಡಿಮೆ ರನ್ಗಳಿಸುವಂತೆ ಹೇಳಿದ್ದರು. ಜತೆಗೆ ರನ್ ಗಳಿಸುವಾಗ ಹೊರಗಡೆ ನಿಂತಿರುವ ಬುಕ್ಕಿಗಳಿಗೆ ಸೂಚನೆ ನೀಡಬೇಕು ಎಂದು ತಿಳಿಸಿದ್ರು. ಈ ಪಂದ್ಯದಲ್ಲಿ ವಿಶ್ವನಾಥ್ 17ಎಸೆತಗಳಲ್ಲಿ 9ರನ್ ಮಾಡಿ ಔಟ್ ಆಗಿ ಬುಕ್ಕಿಗಳ ಕೈಯಿಂದ ಹಣ ಪಡೆದುಕೊಂಡಿದ್ದರು ಎಂದು ತಿಳಿದು ಬಂದಿದೆ.
ಸದ್ಯ ಈ ವಿಚಾರಕ್ಕೆ ಸಂಬಂಧಿಸಿದಂತೆ ಕೋಚ್ ವಿನು ಪ್ರಸಾದ್ ಹಾಗೂ ಆಟಗಾರ ವಿಶ್ವನಾಥನ್ ಇಬ್ಬರನ್ನ ಬಂಧಿಸಿರುವ ಸಿಸಿಬಿ ಸದ್ಯ ತಂಡದ ಮಾಲೀಕರಿಗೆ ನೋಟಿಸ್ ಜಾರಿ ಮಾಡಿದೆ.
