ಭಾರತೀಯ ಕಾಫಿ ರುಚಿ ಜಗತ್ತಿನಾದ್ಯಂತ ಪಸರಿಸುವಂತಾಗಬೇಕು: ಪಿಯೂಷ್ ಗೋಯಲ್

ಬೆಂಗಳೂರಿನಲ್ಲಿ ನಡೆಯುತ್ತಿರುವ ಕಾಫಿ ಸಮ್ಮೇಳನದಲ್ಲಿ ಕೇಂದ್ರ ಸಚಿವ ಪಿಯೂಷ್ ಗೋಯಲ್ ಅವರು ಭಾರತೀಯ ಕಾಫಿ ಬಗ್ಗೆ ಮಾತನಾಡಿದರು.

ಬೆಂಗಳೂರು : ಭಾರತೀಯ ಎಲ್ಲ ಕಾಫಿ ಕಣಿವೆಯ ಕಾಫಿ ರುಚಿ ಜಗತ್ತಿನಾದ್ಯಂತ ವಿಸ್ತರಣೆಯಾಗಬೇಕು. ಇದನ್ನು ಮಿಷನ್ ಆಗಿ ಪರಿಗಣಿಸಬೇಕು. ದೇಶದ ವಿವಿಧ ರಾಜ್ಯಗಳ ಕಣಿವೆಗಳಲ್ಲಿಯೂ ಕಾಫಿ ವ್ಯಾಲಿ ಪಸರಿಸಬೇಕು ಎಂದು ಕೇಂದ್ರ ಸಚಿವ ಪಿಯೂಷ್ ಗೋಯಲ್ ಕರೆ ನೀಡಿದ್ದಾರೆ.

ಭಾರತೀಯ ಕಾಫಿ ಮಂಡಳಿ, ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯ, ರಾಜ್ಯ ಸರ್ಕಾರ ಮತ್ತು ಕಾಫಿ ಉದ್ಯಮದ ಸಹಯೋಗದಲ್ಲಿ ಅಂತಾರಾಷ್ಟ್ರೀಯ ಕಾಫಿ ಸಂಸ್ಥೆ ನಗರದ ಅರಮನೆ ಮೈದಾನದಲ್ಲಿ ನಾಲ್ಕು ದಿನಗಳ ಕಾಫಿ ಸಮ್ಮೇಳನ ಆಯೋಜನೆ ಮಾಡಿದೆ. ಈ ಸಮ್ಮೇಳನದ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ದೇಶದ ಸ್ಟಾರ್ಟ್ ಅಪ್ ರಾಜಧಾನಿಯಾಗಿರುವ ಸಿಲಿಕಾನ್ ಸಿಟಿಯಲ್ಲಿ ಕಾಫಿ ಸಮ್ಮೇಳನ ಆಯೋಜನೆ ಅರ್ಥಪೂರ್ಣವಾಗಿದೆ. ಪರಿಮಳ ಮತ್ತು ಆವಿಷ್ಕಾರದ ಕೇಂದ್ರ ಬಿಂದುವಾಗಿ ಬೆಂಗಳೂರನ್ನು ಆಯ್ಕೆ ಮಾಡಿದ್ದು ಉತ್ತಮ ನಿರ್ಧಾರವಾಗಿದೆ.

ಒಂದು ಭೂಮಿ, ಒಂದು ಕುಟುಂಬ, ಒಂದು ಭವಿಷ್ಯ ಎಂದು ಕಾಫಿ ಕುಟುಂಬ ಕಾಫಿ ಉತ್ಪನ್ನಗಳ ಕುರಿತು ಸಮಗ್ರ ಆವಿಷ್ಕಾರಗಳು ನಡೆಯಬೇಕು. ನಮ್ಮ ಕಾಫಿ ಕುಟುಂಬ ಬೆಂಗಳೂರಿನಲ್ಲಿ ಕಾಫಿ ಉದ್ಯಮಕ್ಕೆ ಸುಸ್ಥಿರ ರಹದಾರಿ ರೂಪಿಸಬೇಕು. ಜಗತ್ತಿನ ಕಾಫಿ ಉದ್ಯಮ ಉಳಿಸಿ ಬೆಳೆಸುವ ಅನಿವಾರ್ಯತೆ ಇದ್ದು ಅದಕ್ಕೆ ಪೂರಕವಾಗಿ ಮುಂದಿನ ಮೂರ್ನಾಲ್ಕು ದಿನಗಳ ಕಾಲ ಇಲ್ಲಿ ಚರ್ಚೆ ನಡೆಸಯಲಿದೆ ಎನ್ನುವ ವಿಶ್ವಾಸ ಇದೆ ಎಂದರು.

ತ್ಯಾಜ್ಯ ಕಡಿಮೆ ಮಾಡಬೇಕು : ಕಾಫಿ ಸಮ್ಮೇಳನದಲ್ಲಿ ನಡೆಯಲಿರುವ ಚರ್ಚೆಗಳಿಂದಾಗಿ ಕಾಫಿ ಉದ್ಯಮಕ್ಕೆ ಹೊಸತ ಸಿಗಲಿದ್ದು, ಕಾಫಿ ಉದ್ಯಮದ ಬೆಳವಣಿಗೆ ಸಹಕಾರಿಯಾಗಲಿದೆ. ಪ್ರಧಾನಿ ನರೇಂದ್ರ ಮೋದಿ ಆದ್ಯತೆ ಸುಸ್ಥಿರತೆ ಮತ್ತು ಮರು ಬಳಕೆಗೆ ಆಧ್ಯತೆ ನೀಡಿದ್ದು, ಕಾಫಿ ಉದ್ಯಮದ ತ್ಯಾಜ್ಯ ಕಡಿಮೆ ಮಾಡುವುದು. ಪರಿಸರ ಪೂರಕ ಚಟುವಟಿಕೆ ಹಮ್ಮಿಕೊಳ್ಳುವುದು ನಮ್ಮ ಜವಾಬ್ದಾರಿ. ಆ ನಿಟ್ಟಿನಲ್ಲಿ ಕಾಫಿ ಉದ್ಯಮಗಳು ಆವಿಷ್ಕಾರಗಳನ್ನು ಮಾಡಬೇಕು. ತ್ಯಾಜ್ಯ ಅತಿದೊಡ್ಡ ಸಮಸ್ಯೆ, ಇದರಿಂದ ಪರಿಸರ ಸಮಸ್ಯೆಗೆ ಸಿಲುಕುತ್ತಿದೆ. ಕಾಫಿ ಉದ್ಯಮ ಇದನ್ನು ಗಂಭೀರವಾಗಿ ಪರಿಗಣಿಸಬೇಕು. ತ್ಯಾಜ್ಯ ಕಡಿಮೆ ಮಾಡಬೇಕು ಎಂದು ಕೇಂದ್ರ ಸಚಿವ ಸಲಹೆ ನೀಡಿದರು.

17ನೇ ಶತಮಾನದಲ್ಲಿ ಕಾಫಿ ಉದ್ಯಮ ಭಾರತದಲ್ಲಿ ಆರಂಭವಾಯಿತು. ಚಿಕ್ಕಮಗಳೂರಿನಲ್ಲಿ ಮೊದಲ ಬಾರಿಗೆ ಕಾಫಿ ಕೃಷಿ ಆರಂಭವಾಯಿತು. ಶೇ.70 ರಷ್ಟು ದೇಶದ ಕಾಫಿ ಉತ್ಪಾದನೆ ಕರ್ನಾಟಕದಲ್ಲಿಯೆ ಆಗುತ್ತಿದೆ. 300 ವರ್ಷದ ಹಿಂದೆ ದೇಶಕ್ಕೆ ಬಂದ ಕಾಫಿ ತಳಿ ಕಾಫಿ ಕ್ರಾಂತಿಯನ್ನೇ ಮಾಡಿದೆ. ಮೈಸೂರು, ಚಿಕ್ಕಮಗಳೂರು ಸೇರಿ ಇತರ ಪ್ರದೇಶದಲ್ಲಿ ಬೆಳೆ ಆರಂಭಗೊಂಡು ಕಾಫಿಯ ಹೊಸ ಶೆಕೆಯನ್ನು ಆರಂಭಿಸಿದೆ. ಇಂದಿನ ಸಮ್ಮೇಳನದಲ್ಲಿ 90 ದೇಶಗಳು ಭಾಗಿಯಾಗಿವೆ. ಜಗತ್ತಿನ ಎಲ್ಲ ದೇಶಗಳೂ ಕಾಫಿ ಮಾರುಕಟ್ಟೆಗಳಾಗಿವೆ. ಎಲ್ಲೆಡೆ ವಿಭಿನ್ನ ಪ್ರಬೇಧದ ಕಾಫಿ ಇದೆ. ಸಾಂಕ್ರಾಮಿಕದ ವೇಳೆ ರಕ್ಷಣೆಗೆ ಕಾಫಿ ಸಹಕಾರಿಯಾಗಿತ್ತು ಎನ್ನುವುದನ್ನು ಯಾರೂ ಮರೆಯುವಂತಿಲ್ಲ ಎಂದು ಪಿಯೂಷ್ ಗೋಯಲ್ ತಿಳಿಸಿದರು.

ಕಾಫಿ ಉದ್ಯಮ ನಾಲ್ಕು ತತ್ವ : ಮೊದಲನೆಯದ್ದಾಗಿ ಕಾಫಿ ಉದ್ಯಮದಲ್ಲಿ ನಿರಂತರವಾಗಿ ಆವಿಷ್ಕಾರ ಮುಂದುವರೆಸಬೇಕು. ರೈತರಿಂದ ಕೈಗಾರಿಕೆ, ಕೈಗಾರಿಯಿಂದ ವಿದೇಶಕ್ಕೆ ಆವಿಷ್ಕಾರ ಮುಂದುವರೆಸಬೇಕು. ತಾಂತ್ರಿಕತೆ ರೈತರಿಂದ ಗ್ರಾಹಕವರಿಗೆ ತಲುಪಿಸಲು ಅಳವಡಿಸಿಕೊಳ್ಳಬೇಕು. ಎರಡನೆಯದಾಗಿ ಪರಿಸರಕ್ಕೆ ಪೂರಕವಾಗಿ ಕಾಫಿ ಕೃಷಿ ಪರಿವರ್ತನೆ ಮಾಡುವ ಕುರಿತು ವೈಜ್ಞಾನಿಕ ವಿಧಾನವನ್ನು ಅಳವಡಿಸಿಕೊಳ್ಳಬೇಕು. ಮೂರನೆಯದಾಗಿ ಕಾಫಿ ಉದ್ಯಮವನ್ನು ಪರಿಸರ ಸ್ನೇಹಿಯಾಗಿ ಪರಿವರ್ತಿಸಲು ಸಂಶೋಧನಾ ಸಂಸ್ಥೆಗಳು ಮತ್ತು ಜಾಗತಿಕ ಸಂಸ್ಥೆಗಳ ಸಹಯೋಗ ಪಡೆದುಕೊಳ್ಳಬೇಕು. ನಾಲ್ಕನೆಯದಾಗಿ ಉತ್ಪಾದನೆ, ಸಂಸ್ಕರಣೆ ಮತ್ತು ಪ್ಯಾಕಿಂಗ್ ನಲ್ಲಿ ಗುಣಮಟ್ಟವನ್ನು ಕಾಯ್ದುಕೊಳ್ಳಬೇಕು ಎಂದು ಪಿಯೂಷ್ ಗೋಯಲ್ ಕರೆ ನೀಡಿದರು.

ಗುಣಮಟ್ಟ ಮತ್ತು ಸುಸ್ಥಿರತೆಯಲ್ಲಿ ರಾಜಿಯಾಗಬಾರದು ಜೀರೋ ಡಿಫೆಕ್ಟ್ ಹೈ ಕ್ಯಾಲಿಟಿ ಮೂಲಕ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮನ್ನಣೆಗಳಿಸಬೇಕು ಎನ್ನುವುದು ಮೋದಿ ಆಶಯವಾಗಿದೆ. ಭಾರತ ಇಂದು ಗುಣಮಟ್ಟದ ವಿಚಾರದಲ್ಲಿ ಬೆಳಗುತ್ತಿದೆ. ನಮ್ಮ ಹಾದಿಯನ್ನು ಇಂದು ವಿಶ್ವದ ಹಲವು ದೇಶಗಳು ಅನುಕರಿಸುತ್ತಿವೆ. ನಾಟ್ ಜಸ್ಟ್ ಎ ಕಪ್ ಆಫ್ ಕಾಫಿ ಬಟ್ ಎ ಬೆಟರ್ ವರ್ಲ್ಡ್ ಎವರಿ ಸಿಪ್ ಸೆನ್ಸ್ ಆಫ್ ಸಸ್ಟೈನಬಿಲಿಟಿ ಎಂದು ಐದನೇ ವಿಶ್ವ ಕಾಫಿ ಸಮ್ಮೇಳನಕ್ಕೆ ಪಿಯೂಷ್ ಗೋಯಲ್ ಶುಭ ಕೋರಿದರು.

ಬಸವಣ್ಣನ ನೆನದ ಪಿಯೂಷ್ : 12ನೇ ಶತಮಾನದ ದಾರ್ಶನಿಕ ಹಾಗು ಸಮಾಜ ಸುಧಾರಕ ಬಸವೇಶ್ವರರು ತಮ್ಮ ಆಲೋಜನೆಗಳನ್ನು ಬಿಟ್ಟು ಹೋಗಿದ್ದಾರೆ. ಅಂದೇ ಅವರು ಮಹಿಳೆಯರಿಗೆ ಆದ್ಯತೆ ನೀಡುವ ಸಮಾನತೆ ಕಲ್ಪಿಸುವ ಕನಸು ಬಿತ್ತಿದ್ದರು. ಆದರೆ ಇಂದಿನ ಈ ಸಮ್ಮೇಳನದ ವೇದಿಕೆಯಲ್ಲಿ ಕೇವಲ ಓರ್ವ ಮಹಿಳೆ ಮಾತ್ರ ಇದ್ದಾರೆ. ಇದು ಬದಲಾಗಬೇಕು. ಮೂರು ದಿನಗಳ ಹಿಂದಷ್ಟೇ ಕೇಂದ್ರ ಸರ್ಕಾರ ಸಂಸತ್​ನಲ್ಲಿ ಮಹಿಳಾ ಮೀಸಲಾತಿ ವಿಧೇಯಕ ಮಂಡಿಸಿ ಪಾಸ್ ಮಾಡಿಸಿದೆ. ಇದರಿಂದಾಗಿ ಲೋಕಸಭೆ ಮತ್ತು ವಿಧಾನಸಭೆಯಲ್ಲಿ ಶೇ.33 ರಷ್ಟು ಮೀಸಲಾತಿ ಮಹಿಳೆಯರಿಗೆ ಸಿಗಲಿದೆ. ಬಸವೇಶ್ವರರು ಹೇಳಿದಂತೆ ಮಹಿಳೆಯರಿಗೆ ಆದ್ಯತೆ ಸಿಗಲಿದೆ. ಇದನ್ನು 12ನೇ ಶತಮಾನದಲ್ಲೇ ಬಸವಣ್ಣ ಹೇಳಿದ್ದರು. ಈ ಸಂದೇಶವನ್ನು ಮೋದಿ ಗೌರವಿಸಿದ್ದಾರೆ ಎಂದು ಮಹಿಳಾ ಮೀಸಲಾತಿ ವಿದೇಯಕ ಪ್ರಸ್ತಾಪಿಸಿದರು.

ಸಮಾಜಕ್ಕಿಂತ ಯಾರೂ ದೊಡ್ಡವರಲ್ಲ. ಕಾಯಕವೇ ಕೈಲಾಸ ಎಂದು ಬಸವೇಶ್ವರರು ಹೇಳಿದ್ದರು. ಅದರಂತೆ ಎಲ್ಲ ಕೆಲಸಗಾರರನ್ನು ನಾವು ಗೌರವಿಸಬೇಕು, ಸಮಾನತೆ ಕೊಡಬೇಕು, ಎಲ್ಲರೂ ಒಬ್ಬರಿಗೊಬ್ಬರು ಎನ್ನುವಂತಾಗಬೇಕು. ನಮ್ಮ ಕೊಡುಗೆ ಸಮಾಜಕ್ಕೆ ನೀಡಬೇಕು ಎಂದರು.

ಇದನ್ನೂ ಓದಿ : ಬೆಂಗಳೂರು: ಅರಮನೆ ಮೈದಾನದಲ್ಲಿ ನಾಳೆಯಿಂದ 4 ದಿನ ವಿಶ್ವ ಕಾಫಿ ಸಮ್ಮೇಳನ