ಸೈಬರ್ ಕ್ರೈಂ ಆಗಿದ್ರೆ ಇನ್ಮುಂದೆ ಸೈಬರ್ ಠಾಣೆಗೆ ಹೋಗ್ಬೇಕಾಗಿಲ್ಲ..

ಸೈಬರ್ ಠಾಣೆಯಲ್ಲಿ ಇತ್ತೀಚೆಗೆ ಸೈಬರ್ ಪ್ರಕರಣಗಳು ಜಾಸ್ತಿ ದಾಖಲಾಗ್ತಿವೆ. ಹೀಗಾಗಿ ಸರ್ಕಾರ ಇನ್ಮುಂದೆ ಸೈಬರ್ ಟೆಕ್ನಿಕಲ್‌ನಂತಹ ಪ್ರಕರಣಗಳನ್ನ ಸ್ಥಳೀಯ ಠಾಣೆಯಲ್ಲಿ ದಾಖಲಿಸಿ ತನಿಖೆ ನಡೆಸಬಹುದೆಂದು ಆದೇಶ ಹೊರಡಿಸಿದೆ.

ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಪ್ರತಿ ದಿನ ನಗರ ಪೊಲೀಸ್ ಕಮಿಷನರ್ ಕಚೇರಿ ವ್ಯಾಪ್ತಿಯಲ್ಲಿರುವ ಸೈಬರ್ ಠಾಣೆಯಲ್ಲಿ ಸೈಬರ್ ಪ್ರಕರಣಗಳು ಜಾಸ್ತಿ ದಾಖಲಾಗ್ತಿವೆ.

ಈ ಹಿನ್ನೆಲೆ ಸೈಬರ್ ಠಾಣೆಯಲ್ಲಿ ದೂರುಗಳ ಸುರಿ ಮಳೆ ಬರುತಿತ್ತು. ಈ ವರ್ಷ ಈವರೆಗೆ 9 ಸಾವಿರಕ್ಕೂ ಹೆಚ್ಚು ಎಫ್​​ಐಆರ್ ದಾಖಲಾಗಿವೆ. ಸದ್ಯ ಸೈಬರ್ ಪೊಲೀಸರಿಗೆ ಕೊಂಚ ರಿಲೀಫ್ ಸಿಕ್ಕಿದೆ. ಯಾಕಂದ್ರೆ, ಸರ್ಕಾರ ಇನ್ಮುಂದೆ ಸೈಬರ್ ಟೆಕ್ನಿಕಲ್‌ನಂತಹ ಪ್ರಕರಣಗಳನ್ನ ಸ್ಥಳೀಯ ಠಾಣೆಯಲ್ಲಿ ದಾಖಲಿಸಿ, ತನಿಖೆ ನಡೆಸಬಹುದೆಂದು ಆದೇಶ ಹೊರಡಿಸಿದೆ.

ಈತನಕ ಸ್ಥಳೀಯ ಪೊಲೀಸರು ಬ್ಯಾಂಕ್​ನಿಂದ ಹಣ ಕಳ್ಳತನ, ಎಟಿಎಂ ಸ್ಕ್ಯಾಮ್, ಮೋಸ, ಅಶ್ಲೀಲ ಅಥವಾ ಕಾನೂನು ಬಾಹಿರ, ಸೈಬರ್ ಭಯೋತ್ಪಾದನೆ, ಡೇಟಾ ಡಿಡ್ಲಿಂಗ್, ವೈರಸ್ ಅಟ್ಯಾಕ್, ಇಮೇಲ್ ಹ್ಯಾಕ್ ಪ್ರಕರಣಗಳು ಬಂದಾಗ ನಮಗೆ ಈ ಪ್ರಕರಣ ಬರಲ್ಲ ಎನ್ನುತ್ತಿದ್ದರು. ಆದರೆ, ಇನ್ಮುಂದೆ ಹಾಗೇ ಹೇಳುವ ಹಾಗಿಲ್ಲ. ಯಾಕಂದ್ರೆ, ಪೊಲೀಸರು ಕೂಡ ಸೈಬರ್ ಕ್ರೈಂನಂತೆ ತನಿಖೆ ನಡೆಸಬೇಕೆಂದು ಸದ್ಯ ಆದೇಶ ಹೊರಡಿಸಲಾಗಿದೆ.