ಬೆಂಗಳೂರು: ಈ ಬಾರಿಯ ನಾಡಹಬ್ಬ ದಸರಾವನ್ನು ಅದ್ಧೂರಿಯಾಗಿ ಮಾಡಲು ತೀರ್ಮಾನಿಸಲಾಗಿದೆ ಎಂದು ಸಿಎಂ ಬೊಮ್ಮಾಯಿ ತಿಳಿಸಿದರು. ವಿಧಾನಸೌಧದಲ್ಲಿ ಮೈಸೂರು ದಸರಾ ಮಹೋತ್ಸವ 2022ರ ಉನ್ನತ ಮಟ್ಟದ ಸಮಿತಿ ಸಭೆ ಬಳಿಕ ಸುದ್ದಿಗೋಷ್ಠಿ ಉದ್ದೇಶಿಸಿ ಮಾತನಾಡಿದ ಸಿಎಂ, ಆ ಭಾಗದ ಜನ ಪ್ರತಿನಿಧಿಗಳು ಅದ್ಧೂರಿ ದಸರಾ ಹಬ್ಬ ಆಚರಣೆಗೆ ಮನವಿ ಮಾಡಿದ್ದಾರೆ. ಕೋವಿಡ್ ಬಳಿಕ ನಡೆಯುತ್ತಿರುವ ದಸರಾ ಅದ್ಧೂರಿಯಾಗಿ ಮಾಡಲು ಚರ್ಚೆ ಆಗಿದೆ ಎಂದರು.
ವಸ್ತು ಪ್ರದರ್ಶನವನ್ನು ಹದಿನೈದು ದಿನಕ್ಕೂ ಮೊದಲೇ ಪ್ರಾರಂಭ ಮಾಡ್ತೇವೆ. ಈ ಬಾರಿ ಸ್ಥಳೀಯ ಕಲಾವಿದರಿಗೆ ಹೆಚ್ಚು ಒತ್ತು ನೀಡಲಿದ್ದೇವೆ. ದಿನಕ್ಕೆ ಒಬ್ಬರು ರಾಷ್ಟ್ರೀಯ ಮಟ್ಟದ ಕಲಾಕಾರರನ್ನು ಕರೆಸುತ್ತೇವೆ . ಶ್ರೀರಂಗಪಟ್ಟಣ, ಚಾಮರಾಜನಗರದಲ್ಲೂ ವೈಭೋವಪೂರಿತವಾಗಿ ದಸರಾ ಮಾಡಲು ತೀರ್ಮಾನಿಸಿದ್ದೇವೆ. ಅನ್ಯ ರಾಜ್ಯಗಳಲ್ಲೂ ದಸರಾ ಸಂಬಂಧ ಪ್ರಚಾರ ಮಾಡಲು ಸೂಚನೆ ನೀಡಲಾಗಿದೆ ಎಂದು ಸಿಎಂ ವಿವರಿಸಿದರು.
ಮೈಸೂರು ಮತ್ತು ಹಂಪಿ ಟೂರಿಸಂಗೆ ಆದೇಶ ಹೊರಡಿಸಲಾಗುವುದು. ಅದರಂತೆ ಒಂದೇ ಟಿಕೆಟ್ನಲ್ಲಿ ಹಂಪಿ ಮತ್ತು ಮೈಸೂರು ನೋಡಬಹುದು. ವಿದೇಶದಿಂದ ಟಿಕೆಟ್ ಬುಕ್ ಮಾಡೋರಿಗೆ ಹೊರಗಡೆಯಿಂದ ಬರೋರಿಗೆ ಅನುಕೂಲ ಮಾಡಿಕೊಡಲಾಗುವುದು. 26 /9/2022 ಕ್ಕೆ ದಸರಾ ಆರಂಭವಾದರೆ, 5/10/2022 ಕ್ಕೆ ವಿಜಯದಶಮಿ, 5/10/2022ಕ್ಕೆ ಧ್ವಜ ಪೂಜೆ, 5/10/2022 ಕ್ಕೆ ನಂದಿ ಪೂಜೆ ನೆರವೇರಲಿದೆ. 7/8/2022 ಕ್ಕೆ ಗಜಪಯಣ ,10/8/2022 ಅರಮನೆಯ ಪ್ರವೇಶ , 7/10/2022 ಕ್ಕೆ ಗಜಪಡೆ ನಿರ್ಗಮನವಾಗಲಿದೆ ಎಂದು ವಿವರಿಸಿದರು.
ದಸರಾ ಹಬ್ಬಕ್ಕೆ 10 ಕೋಟಿ ರೂ. ಮುಡಾದಿಂದ ನೀಡಲಾಗುವುದು. ಉಳಿದಂತೆ ಸಿಎಸ್ ಆರ್ ಫಂಡ್ ಬಳಕೆಗೆ ಸೂಚನೆ ನೀಡಲಾಗಿದೆ. ಅರಮನೆ ಹೊರಗಡೆ ಹಬ್ಬ ಆಚರಣೆಗೆ ಎಷ್ಟು ವೆಚ್ಚ ಆಗುತ್ತೋ ಆ ಅನುದಾನವನ್ನು ಸರ್ಕಾರವೇ ಭರಿಸುತ್ತದೆ ಎಂದು ತಿಳಿಸಿದರು. ಬಾಗಿನ ಅರ್ಪಣೆಗೆ ರಾಜವಂಶಸ್ಥರಿಗೆ ಕರೆದಿಲ್ಲ ಎಂಬ ವಿಪಕ್ಷಗಳ ಟೀಕೆ ವಿಚಾರವಾಗಿ ಪ್ರತಿಕ್ರಿಯಿಸಿದ ಅವರು, ಈ ಹಿಂದೆ ರಾಜವಂಶಸ್ಥರನ್ನು ಕರೆದಿರಲಿಲ್ಲ. ಈಗ ಅವರನ್ನು ಕರೆಯೋದ್ರಲ್ಲಿ ತಪ್ಪೇನೂ ಇಲ್ಲ. ಇದರ ಬಗ್ಗೆ ಮಾತನಾಡುತ್ತೇನೆ ಎಂದರು.
ದಸರಾ ಹೊತ್ತಿಗೆ ಮುಗಿಯಲ್ಲ ಬೆಂಗಳೂರು - ಮೈಸೂರು ದಶಪಥ ರಸ್ತೆ ಕಾಮಗಾರಿ: ದಸರಾ ಹೊತ್ತಿಗೆ ಬೆಂಗಳೂರು-ಮೈಸೂರು ದಶಪಥ ರಸ್ತೆ ಕಾಮಗಾರಿ ಪೂರ್ಣವಾಗಲ್ಲ. ಕಾಮಗಾರಿ ಮುಗಿಯುವುದು ವಿಳಂಬ ಆಗಲಿದೆ. ಕಾಮಗಾರಿ ಮುಗಿಯೋದಕ್ಕೆ ಸಮಯ ಹಿಡಿಯಬಹುದು. ಮಳೆ ಹಿನ್ನೆಲೆಯಲ್ಲಿ ಸಮಯ ಹಿಡಿಯಲಿದೆ ಎಂದು ಇದೇ ವೇಳೆ ಮಾಹಿತಿ ನೀಡಿದರು.
ದಸರಾ ನೆಪದಲ್ಲಿ ತೊಂದರೆ ಆಗಬಾರದು: ಈ ವರ್ಷ ಮಳೆ ಬೆಳೆ ಆಗಿರುವುದರಿಂದ ಈ ವರ್ಷ ದಸರಾವನ್ನು ಸಾಂಪ್ರದಾಯಿಕವಾಗಿ , ವೈಭವಪೂರಿತವಾಗಿ ಮಾಡಲು ಶಾಸಕರು ಅಭಿಮತ ವ್ಯಕ್ತಪಡಿಸಿದ್ದಾರೆ. ದಸರಾ ಹಬ್ಬದ ಮೂರು ತಿಂಗಳು ಅಧಿಕಾರಿಗಳು ಕೈಗೆ ಸಿಗಲ್ಲ ಎಂದು ಜನಪ್ರತಿನಿಧಿಗಳು ದೂರು ನೀಡಿದ್ದಾರೆ. ಈ ಹಿನ್ನೆಲೆ ದಸರಾ ಸಂದರ್ಭ ಸಾರ್ವಜನಿಕರ ಕೆಲಸಕ್ಕೆ ಯಾವುದೇ ಸಮಸ್ಯೆ ಆಗಬಾರದು ಎಂದು ಸಿಎಂ ಡಿಸಿಗಳಿಗೆ ಸೂಚನೆ ನೀಡಿದ್ದಾರೆ ಎಂದು ಮೈಸೂರು ಜಿಲ್ಲೆ ಉಸ್ತುವಾರಿ ಸಚಿವ ಎಸ್.ಟಿ.ಸೋಮಶೇಖರ್ ತಿಳಿಸಿದರು.
ದಸರಾ ನೆಪದಲ್ಲಿ ಸಾರ್ವಜನಿಕರ ಕೆಲಸಕ್ಕೆ ಸಮಸ್ಯೆ ಆಗಬಾರದು ಎಂದು ಸಿಎಂ ಡಿಸಿಗಳಿಗೆ ಸೂಚನೆ ನೀಡಿದ್ದಾರೆ. ಪ್ರತಿ ವರ್ಷದಂತೆ ಈ ಬಾರಿಯೂ ಅದ್ಧೂರಿ ಲೈಟಿಂಗ್ ಮಾಡಲು ತೀರ್ಮಾನಿಸಲಾಗಿದೆ. ದಸರಾ ಉದ್ಘಾಟಕರನ್ನು ಆಯ್ಕೆ ಮಾಡುವ ಅಧಿಕಾರವನ್ನು ಸಿಎಂಗೆ ನೀಡಲಾಗಿದೆ ಎಂದರು.
ಇದನ್ನೂ ಓದಿ: ಸಾರಿಗೆ ನಿಗಮ ಪುನಶ್ಚೇತನ.. ಸಿಎಂಗೆ 131 ಪುಟಗಳ ಅಂತಿಮ ವರದಿ ಸಲ್ಲಿಸಿದ ಸಮಿತಿ
