ಬೆಂಗಳೂರು : ಈ ಹಿಂದೆ ನೀವು (ಸಿದ್ದರಾಮಯ್ಯ) ಕಾಂಗ್ರೆಸ್ ಅನ್ನು ಸೀಮೆಎಣ್ಣೆ ಪಾರ್ಟಿ ಅಂದ್ರಿ. ಬಿಜೆಪಿಯನ್ನು ಬೆಂಕಿಪೊಟ್ಟಣ ಪಾರ್ಟಿ ಅಂದ್ರಿ. ಕಾಂಗ್ರೆಸ್ ನಾಯಕಿ ಸೋನಿಯಾ ಗಾಂಧಿ ಅವರನ್ನು ಏನೆಲ್ಲಾ ಬೈದಿರಿ, ನಂತರ ಯಾರ ಜೊತೆಗೆ ಸೇರಿಕೊಂಡ್ರಿ ಎಂದು ಮಾಜಿ ಸಚಿವ, ಜೆಡಿಎಸ್ ಕೋರ್ ಕಮಿಟಿ ಅಧ್ಯಕ್ಷ ಜಿ.ಟಿ.ದೇವೇಗೌಡ ಅವರು ಸಿದ್ದರಾಮಯ್ಯ ವಿರುದ್ಧ ವಾಕ್ಸಮರ ನಡೆಸಿದರು.
ಪಕ್ಷದ ಕಚೇರಿ ಜೆಪಿ ಭವನದಲ್ಲಿ ಇಂದು ಕೋರ್ ಕಮಿಟಿ ಸಭೆ ನಡೆಯಿತು. ನಂತರ ಸುದ್ದಿಗಾರರ ಜೊತೆ ಮಾತನಾಡಿದ ಅವರು, ಹೆಚ್.ಡಿ.ಕುಮಾರಸ್ವಾಮಿ ಅವರನ್ನು ಮುಖ್ಯಮಂತ್ರಿ ಹುದ್ದೆಯಿಂದ ಕೆಳಗಿಳಿಸಿದ್ದು ಯಾರು? ಯಡಿಯೂರಪ್ಪ ಮುಖ್ಯಮಂತ್ರಿ ಆಗಲು ಅವರ ಜೊತೆಗೆ ಸೇರಲಿಲ್ಲವೇ? ಎಂದು ವಾಗ್ಗಾಳಿ ನಡೆಸಿದರು.
1983ರಲ್ಲಿ ನಿಮ್ಮನ್ನು ಗೆಲ್ಲಿಸಿದ ಸಮುದಾಯ ಯಾವುದು? ಗೆಲ್ಲಿಸಿದವರ ಹೆಸರನ್ನೂ ಹೇಳಲಿಲ್ಲ, ನೆನಪು ಸಹ ಮಾಡಿಕೊಳ್ಳಲಿಲ್ಲ. ನೀವು ಯಾರಿಗೂ ಅಗೌರವ ತೋರಿಸಬೇಡಿ. ನೀವು ಸಿಎಂ ಆಗಿದ್ದೀರಿ, ಒಳ್ಳೆಯ ಬಟ್ಟೆ ಹಾಕಿದವರನ್ನು, ಅಧಿಕಾರ ಮಾಡಿದವರನ್ನು ನೀವು ಸಹಿಸುತ್ತೀರಾ? ಸುಮ್ಮನೆ ಮಾತಾಡಬೇಡಿ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಕೆಲಸಕ್ಕೆ ಬಾರದವರನ್ನು ಗೆಲ್ಲಿಸಿದ್ರಿ ಅಂತ ಸಿದ್ದರಾಮಯ್ಯ ಹೇಳಿಕೆ ವಿಚಾರಕ್ಕೆ ಪ್ರತಿಕ್ರಿಯಿಸಿದ ಜಿ.ಟಿ.ದೇವೇಗೌಡ, ನಾನು ನಿಮ್ಮನ್ನು ಗೆಲ್ಲಿಸುವುದಕ್ಕೆ ಏನೇನು ಮಾಡಿದೆ. ಉಪಚುನಾವಣೆಯಲ್ಲಿ ಗೆಲ್ಲಿಸುವುದಕ್ಕೆ ಏನೇನು ಮಾಡಿದ್ದೆ ಅಂತ ಗೊತ್ತಿಲ್ವಾ? ನೀವು ಬೇರೆಯವರನ್ನು ಅಧಿಕಾರ ಮಾಡಲು ಬಿಡಲ್ಲ. ಜಿಲ್ಲಾ ಪಂಚಾಯತಿ ಅಧಿಕಾರ 5 ವರ್ಷ ಇದ್ದಿದ್ದು, 20 ತಿಂಗಳು ಇಳಿಸಿದ್ರಿ? ನೀವು ನನಗೆ ಅನ್ಯಾಯ ಮಾಡಿದ್ರಿ, ನಾನು ನಾಯಕನೇ. ಸುಮ್ಮನೆ ಏಕವಚನದಲ್ಲಿ ಮಾತನಾಡಬೇಡಿ. ಅವನು ಜವಾನನೇ ಆಗಿರಲಿ. ಗೌರವ ಕೊಡಬೇಕು ನೀವು. ಸುಮ್ಮನೆ ಆರೋಪ ಮಾಡೋದನ್ನು ನಿಲ್ಲಿಸಿ. ಒಳ್ಳೆಯ ಬಟ್ಟೆ ಹಾಕಿದ್ರೆ, ಓದಿದ್ರೆ ಬ್ರಾಹ್ಮಣರು ಸಹಿಸಲ್ಲ ಅಂತ ನೀವು ಹೇಳಿದ್ರಿ. ನೀವು ಯಾರ ತರಹ ಆಗಿದ್ರಿ ಈಗ, ಅಧಿಕಾರ ಮಾಡುವುದನ್ನು ಸಹಿಸ್ತೀರಾ ನೀವು? ಎಂದು ಸಿದ್ದರಾಮಯ್ಯ ವಿರುದ್ಧ ಕೆಂಡಾಮಂಡಲರಾದರು.
ನಾನು ಯಾರ ಸಹವಾಸದಲ್ಲಿ ಇದ್ದೆ ಅಂತ ಮೊದಲು ತಿಳಿದುಕೊಳ್ಳಿ. ನಾನು ಐದು ಬಾರಿ ಗೆದ್ದಿದ್ದೇನೆ. ರಾಜಶೇಖರ ಮೂರ್ತಿ ವಿರುದ್ಧ ಸೋತೋರು ನೀವು. ನನ್ನ ವಿರುದ್ಧ ಕೂಡ ಸೋತ್ರಿ. 2013 ರಲ್ಲಿ ನನ್ನ ಸೋಲಿಸಲು ಬಂದ್ರಿ. ಸೋಲಿಸಲು ಆಯ್ತಾ? ಇದು ನೀವು ಚಾಮುಂಡೇಶ್ವರಿ ಕ್ಷೇತ್ರದ ಜನರಿಗೆ ಮಾಡಿದ ಅವಮಾನ ಎಂದು ಜಿಟಿಡಿ ಗರಂ ಆದರು.
ರಾಜ್ಯ ಮಟ್ಟದ ಸಭೆ ಬಗ್ಗೆ ವರಿಷ್ಠರ ಜೊತೆ ಚರ್ಚೆ: ಜೆಡಿಎಸ್ ಸಂಘಟನೆಗೆ ಎಲ್ಲಾ ಹಂತದ ಪ್ರಯತ್ನ ಮಾಡಲು ತೀರ್ಮಾನ ಮಾಡಿದ್ದೇವೆ. ಸೆಪ್ಟೆಂಬರ್ 10 ರಂದು ನಡೆಸಲು ಉದ್ದೇಶಿಸಿದ್ದ ರಾಜ್ಯ ಮಟ್ಟದ ಸಭೆ ಕುರಿತು ವರಿಷ್ಠರ ಜೊತೆಗೆ ಚರ್ಚೆ ಮಾಡುತ್ತೇವೆ. ಸಭೆ ನಡೆಯುವ ದಿನ ಒಂದೆರಡು ದಿನಗಳ ಕಾಲ ವ್ಯತ್ಯಾಸ ಆಗಬಹುದು. ವರಿಷ್ಠರ ಜೊತೆಗೆ ಚರ್ಚೆ ಮಾಡಿ ದಿನಾಂಕ ಘೋಷಣೆ ಮಾಡುತ್ತೇವೆ ಎಂದು ಜಿ.ಟಿ ದೇವೇಗೌಡ ಮಾಹಿತಿ ನೀಡಿದರು.
ಕೋರ್ ಕಮಿಟಿ ಸದಸ್ಯರು ಆಸಕ್ತಿಯಿಂದ ಪಕ್ಷವನ್ನು ಕಟ್ಟಬೇಕು ಎಂದಿದ್ದಾರೆ. ರಾಜ್ಯದಲ್ಲಿರುವ ಏಕೈಕ ಪ್ರಾದೇಶಿಕ ಪಕ್ಷ ಕಟ್ಟಲು ಸದಸ್ಯರು ಬಂದಿದ್ದಾರೆ. ಹೆಚ್ಡಿಕೆ ಅನಾರೋಗ್ಯ ಹಿನ್ನೆಲೆಯಲ್ಲಿ ರಾಜ್ಯಾದ್ಯಂತ ಭ್ರಮನಿರಸ ಆಗಿದ್ದರು. ಚಾಮುಂಡೇಶ್ವರಿಗೆ ಪೂಜೆ ಮಾಡಿ ಬೇಗ ಗುಣಮುಖರಾಗಿ ಬರಲೆಂದು ಪ್ರಾರ್ಥನೆ ಮಾಡಿದ್ದೇವೆ ಎಂದು ಹೇಳಿದರು.
ರಾಜ್ಯ ಸರ್ಕಾರದ ನೂರು ದಿನಗಳಲ್ಲಿ ಜಾರಿ ಮಾಡಿದ ಗ್ಯಾರಂಟಿ ಬಗ್ಗೆ ನೋಡಿದ್ದೇವೆ. ಒಂದು ಕಡೆ ಗೃಹ ಲಕ್ಷ್ಮೀ ಯೋಜನೆ ಮೂಲಕ ಎರಡು ಸಾವಿರ ರೂ. ನೀಡಿದ್ದಾರೆ. ಇನ್ನೊಂದು ಕಡೆ ಮದ್ಯದ ದರ ಹೆಚ್ಚಳ ಮಾಡಿದ್ದಾರೆ. ಗ್ಯಾರಂಟಿಗಳಿಂದ ಆಗುತ್ತಿರುವ ಸಮಸ್ಯೆಗಳು ತುಂಬಾ ಇವೆ. ಕಾವೇರಿ, ವಿದ್ಯುತ್, ಮದ್ಯದ ಬೆಲೆ ಏರಿಕೆಯಾಗಿದೆ. ಗ್ಯಾರಂಟಿಯಿಂದ ಪ್ರಯೋಜಗಳು, ತೊಂದರೆಗಳ ಬಗ್ಗೆ ಕೋರ್ ಕಮಿಟಿ ಸಭೆಯಲ್ಲಿ ಚರ್ಚೆಯಾಗಿದೆ. ನಮ್ಮ ಪಂಚರತ್ನ ಯೋಜನೆಗಳು ಜಾರಿಯಾದರೇ ಯಾವ ರೀತಿ ಉಪಯೋಗ ಆಗುತ್ತದೆ. ಇದನ್ನು ಜನರಿಗೆ ತಿಳಿಸಬೇಕು ಎಂದು ತೀರ್ಮಾನ ಮಾಡಿದ್ದೇವೆ. ಸೆ. 10 ರಿಂದ 14 ರ ಒಳಗೆ ಹೊಸಪೇಟೆ, ಕಲಬುರಗಿಯಲ್ಲಿ ಸಮಾವೇಶ ಮಾಡಲು ತೀರ್ಮಾನ ಮಾಡಿದ್ದೇವೆ. ರಾಷ್ಟ್ರೀಯ ನಾಯಕರ ಜೊತೆ ಚರ್ಚೆ ಮಾಡಿ ದಿನಾಂಕ ನಿಗದಿ ಮಾಡುತ್ತೇವೆ ಎಂದು ತಿಳಿಸಿದರು.
ಕಚೇರಿಯಲ್ಲಿ ಪೂಜೆ: ಇದಕ್ಕೂ ಮುನ್ನ ಪಕ್ಷದ ಕಚೇರಿ ಜೆಪಿ ಭವನದಲ್ಲಿ ಕೋರ್ ಕಮಿಟಿ ಅಧ್ಯಕ್ಷರಿಗೆ ನೀಡಿರುವ ಕಚೇರಿಯಲ್ಲಿ ಜಿ.ಟಿ.ದೇವೇಗೌಡರು ಪೂಜೆ ನೆರವೇರಿಸಿದರು. ಹೆಚ್.ಡಿ.ಕುಮಾರಸ್ವಾಮಿ ಆರೋಗ್ಯ ಚೇತರಿಕೆಗೆ ಸಂಕಲ್ಪ ಮಾಡಿ ಪ್ರಾರ್ಥನೆ ಸಲ್ಲಿಸಿದರು. ಈ ಸಂದರ್ಭದಲ್ಲಿ ಕೋರ್ ಕಮಿಟಿ ಸಂಚಾಲಕ ವೈ.ಎಸ್.ವಿ ದತ್ತಾ, ಸದಸ್ಯರಾದ ಬಂಡೆಪ್ಪ ಕಾಶೆಂಪೂರ್, ವೆಂಕಟರಾವ್ ನಾಡಗೌಡ ಮತ್ತಿತರರು ಉಪಸ್ಥಿತರಿದ್ದರು.
ಇದನ್ನೂ ಓದಿ : ಆಸ್ಪತ್ರೆಯಿಂದಲೇ 'ಕಾವೇರಿ ಹೋರಾಟ'ಕ್ಕೆ ಕರೆ ನೀಡಿದ ಮಾಜಿ ಸಿಎಂ ಹೆಚ್ಡಿಕೆ
