ಬೆಂಗಳೂರು : ಸಿಎಂ ಬಿ ಎಸ್ ಯಡಿಯೂರಪ್ಪ ಭಾಗವಹಿಸಿದ್ದ ಕಿಟ್ ವಿತರಣಾ ಕಾರ್ಯಕ್ರಮ ಆರಂಭದಲ್ಲಿ ಅತ್ಯಂತ ಶಿಸ್ತಾಗಿ ನಡೆಯಿತು. ಅವರು ತೆರಳಿದ ಬಳಿಕ ಜನರೆಲ್ಲ ಜಮಾವಣೆಗೊಂಡು, ಕೋವಿಡ್ ನಿಯಮ ಉಲ್ಲಂಘಿಸಿದರು. ಬಿಬಿಎಂಪಿ ಮಾಜಿ ಸದಸ್ಯ ಸಿ ಕೆ ರಾಮಮೂರ್ತಿ, ಜಯನಗರದ 5ನೇ ಬ್ಲಾಕ್ ಚಂದ್ರಗುಪ್ತ ಮೌರ್ಯ ಕ್ರೀಡಾಂಗಣದಲ್ಲಿ ಇಂದು ಕೋವಿಡ್ ವಾರಿಯರ್ಸ್ಗೆ ಸನ್ಮಾನ ಹಾಗೂ ಬಡವರಿಗೆ ದಿನಸಿ ಕಿಟ್ ಹಂಚಿಕೆ ಕಾರ್ಯಕ್ರಮ ಆಯೋಜಿಸಿದ್ದರು.
ಸಮಾರಂಭಕ್ಕೆ ಸಿಎಂ ಬಿ ಎಸ್ ಯಡಿಯೂರಪ್ಪ ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದರು. ಅವರು ಬಂದು ಕಾರ್ಯಕ್ರಮ ನೆರವೇರಿಸಿ ತೆರಳುವವರೆಗೂ ಅತ್ಯಂತ ಅಚ್ಚುಕಟ್ಟಾಗಿ ಕಾರ್ಯಕ್ರಮ ನಡೆಯಿತು.
ವೇದಿಕೆ ಮೇಲೆ ತಲಾ ಹತ್ತು ಮಂದಿಗೆ ಸಾಂಕೇತಿಕವಾಗಿ ಸನ್ಮಾನ, ಫಲಾನುಭವಿಗಳಿಗೆ ದಿನಸಿ ಕಿಟ್ ವಿತರಿಸಿದ ಸಿಎಂ ಬಿಎಸ್ವೈ ಅಲ್ಲಿಂದ ತೆರಳಿದರು. ಇದಾದ ತಕ್ಷಣ ಕಾರ್ಯಕ್ರಮಕ್ಕೆ ಆಗಮಿಸಿ ಟೋಕನ್ ಪಡೆದಿದ್ದ ಸಾವಿರಾರು ಮಂದಿ ಜನರು ಕೌಂಟರ್ಗಳತ್ತ ನುಗ್ಗಿದರು.
ವೇದಿಕೆಯ ಎರಡು ಭಾಗದಲ್ಲಿ ತಲಾ ಎರಡೆರಡು ಕೌಂಟರ್ಗಳನ್ನು ನಿರ್ಮಿಸಿದ್ದರೂ ಸಾರ್ವಜನಿಕರನ್ನು ನಿಯಂತ್ರಿಸುವುದು ಕಷ್ಟವಾಯಿತು. ಅರ್ಧಗಂಟೆಗೂ ಹೆಚ್ಚು ಕಾಲ ಜನತೆ ಕೋವಿಡ್ ನಿಯಮಾವಳಿಗಳನ್ನು ಮೀರಿ, ಒಟ್ಟಾಗಿ ನಿಂತು ಕಿಟ್ ಪಡೆದರು. ಇದಾದ ಬಳಿಕ ಲಘು ಉಪಾಹಾರದ ವ್ಯವಸ್ಥೆ ಮಾಡಲಾಗಿತ್ತು. ಅಲ್ಲಿಯೂ ಸಾಕಷ್ಟು ನೂಕುನುಗ್ಗಲು ಕಂಡು ಬಂದಿತು.
ಕಿಟ್ಗಾಗಿ ಪರದಾಟ : ಸಿ ಕೆ ರಾಮಮೂರ್ತಿ ಪ್ರತಿನಿಧಿಸುತ್ತಿದ್ದ ವಾರ್ಡ್ ಹಾಗೂ ಜಯನಗರದ ಕೆಲ ಭಾಗದ ಸಾರ್ವಜನಿಕರಿಗೆ ಆಹಾರದ ಕಿಟ್ ಟೋಕನ್ ನೀಡಲಾಗಿತ್ತು. ಆದರೆ, ಕಿಟ್ ವಿತರಣೆ ಮಾಹಿತಿ ಪಡೆದಿದ್ದ ಇತರೆ ಜನರೂ ಆಗಮಿಸಿದ್ದರು.
ಇದರಿಂದಾಗಿ ಕೆಲಕಾಲ ಗೊಂದಲದ ವಾತಾವರಣ ನಿರ್ಮಾಣವಾಯಿತು. ಆಯೋಜಕರು ಸಾಕಷ್ಟು ಮಂದಿಗೆ ಸ್ಥಳದಲ್ಲಿ ಟೋಕನ್ ನೀಡಿ ದಿನಸಿ ಕಿಟ್ ವಿತರಿಸಿದರು. ಉಳಿದವರಿಗೆ ಸೋಮವಾರ ಬಂದು ಪಡೆಯುವಂತೆ ಮನವಿ ಮಾಡಿದರು.
