ಅಧಿಕಾರಕ್ಕಾಗಿ, ಹಣಕ್ಕಾಗಿ ವಲಸೆ ಹೋದವರು ಮಾರಾಟದ ವಸ್ತುಗಳು: ದಿನೇಶ್ ಗುಂಡೂರಾವ್ ವಾಗ್ದಾಳಿ

ಬಿಕೆ ಹರಿಪ್ರಸಾದ್​ ಹೇಳಿಕೆ ಸಮರ್ಥಿಸಿಕೊಂಡ ದಿನೇಶ್​ ಗುಂಡೂರಾವ್ ​- ಹೋಲಿಕೆ ಮಾಡಿ ಹೇಳಿಕೆ ಕೊಟ್ಟಿದ್ದಾರೆ - ಬಿಜೆಪಿ ಸರ್ಕಾರಕ್ಕೆ ಮಾನ ಮರ್ಯಾದೆ ಇಲ್ಲ

ಬೆಂಗಳೂರು: ಅಧಿಕಾರಕ್ಕಾಗಿ, ಹಣಕ್ಕಾಗಿ ವಲಸೆ ಹೋದವರು ಮಾರಾಟದ ವಸ್ತುಗಳು ಎಂದು ಎಐಸಿಸಿ ಪ್ರಧಾನ ಕಾರ್ಯದರ್ಶಿ ದಿನೇಶ್ ಗುಂಡೂರಾವ್ ಅವರು ಬಾಂಬೆ ಟೀಂ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ. ನಗರದಲ್ಲಿ ಇಂದು ಮಾಧ್ಯಮಗಳ ಜೊತೆ ಮಾತನಾಡಿದ ಅವರು, ವಲಸೆ ಹೋಗಿರುವುದು ಅಧಿಕಾರಕ್ಕಾಗಿ ಹಾಗೂ ದುಡ್ಡು ಬೇಕೆಂಬ ಕಾರಣಕ್ಕಾಗಿ ಕಾಂಗ್ರೆಸ್ ತೊರೆದು ಬಿಜೆಪಿಗೆ ವಲಸೆ ಹೋಗಿದ್ದಾರೆ. ಅದಕ್ಕಾಗಿ ಅವರು ಮಾರಾಟ ಆದ ವಸ್ತುಗಳು ಎಂದು ಕಿಡಿಕಾರಿದರು.

ಹೇಳಿಕೆ ಸಮರ್ಥನೆ: ಯಾವ ಉದ್ದೇಶಕ್ಕಾಗಿ ಪಕ್ಷ ತೊರೆದು ಹೋದರು ಎಂಬುದನ್ನು ಮುಚ್ಚಿಹಾಕಲು ಆಗುವುದಿಲ್ಲ ಎಂದು ವಿಧಾನ ಪರಿಷತ್ ಪ್ರತಿಪಕ್ಷದ ನಾಯಕ ಬಿ.ಕೆ‌ ಹರಿಪ್ರಸಾದ್ 'ಮಾರಿಕೊಂಡವರು' ಎಂಬ ಹೇಳಿಕೆಯನ್ನು ಸಮರ್ಥಿಸಿಕೊಂಡ ದಿನೇಶ್ ಗುಂಡೂರಾವ್ ಅವರು, ಬಿ.ಕೆ. ಹರಿಪ್ರಸಾದ್ ಅವರು, ವಲಸಿಗರು ಯಾವ ರೀತಿ ಮಾರಾಟ ಆಗಿದ್ದಾರೆ ಎಂದು ಹೋಲಿಕೆ ಮಾಡಿ ಹೇಳಿಕೆ ಕೊಟ್ಟಿದ್ದಾರೆ. ಜನ ಆಶೀರ್ವಾದ ಮಾಡಿದಾಗ ಕಾಂಗ್ರೆಸ್ ನಿಂದ ಗೆದ್ದು ಬಂದರು. ಈಗ ಅಲ್ಲಿಗೆ ಹೋಗಿ ಏನೇನೋ ನೆಪಗಳನ್ನು ಹೇಳುತ್ತಿದ್ದಾರೆ ಎಂದು ಟೀಕಿಸಿದರು.

ಬಿಜೆಪಿಯ ಬಜೆಟ್​​​ಗೆ ಯಾವ ಬೆಲೆ ಇರುತ್ತದೆ. ಈ ಬಜೆಟ್ ಗೆ ಏನೂ ಕಿಮ್ಮತ್ತಿಲ್ಲ. ಲೇಖಾನುದಾನ ಮಾಡ್ಕೊಂಡು ಹೋಗಬೇಕಷ್ಟೆ. ಯಾವ ಭರವಸೆಗಳನ್ನು ಬಿಜೆಪಿ ಈಡೇರಿಸುವುದಿಲ್ಲ. 200 ಭರವಸೆ ಕೊಟ್ಡಿದ್ರಲ್ಲ ಅದರಲ್ಲಿ ಶೇ10ರಷ್ಟು ಕೂಡಾ ಈಡೇರಿಸಿಲ್ಲ. ಹೀಗಿದ್ದಾಗ ಬಿಜೆಪಿಯವರ ಬಜೆಟ್ ಗೆ ಏನು ವ್ಯಾಲ್ಯೂ ಇರುತ್ತದೆ ? ಎಂದು ಪ್ರಶ್ನಿಸಿದರು.

ಬಿಜೆಪಿ ಸರ್ಕಾರ ಮಾನ ಮರ್ಯಾದೆಯನ್ನು ಕಳೆದುಕೊಂಡಿದೆ. ಯಾವುದೇ ಒಂದು ಗೌರವ ಇಲ್ಲದ ಆಡಳಿತ ನಡೆಸುತ್ತಿದ್ದಾರೆ. ಮರ್ಯಾದೆಯಿಂದ ಆಡಳಿತ ನಡೆಯುತ್ತಿಲ್ಲ. ಇಷ್ಟು ಕೆಳಮಟ್ಟಕ್ಕೆ ಹೋದ ಸರ್ಕಾರ ನಾನಂತೂ ನೋಡಿರಲಿಲ್ಲ. ನಿರ್ಭೀತವಾಗಿ ಯಾವುದೇ ಮಾನದಂಡ ಇಲ್ಲದೆ ಲೂಟಿಯೇ ಮುಖ್ಯುದ್ದೇಶವಾಗಿದೆ. ಯಾವ ಅಧೋಗತಿಗೆ ಹೋಗಿದೆ ಎನ್ನುವುದಕ್ಕೆ ಗುತ್ತಿಗೆದಾರರ ಹೋರಾಟವೇ ಸಾಕ್ಷಿ ಎಂದು ಗುಡುಗಿದರು.

ಶೇ 40ರಷ್ಟು ಕಮಿಷನ್ ನಿಂದಾಗಿ ಶೇ20ರಷ್ಟು ಕೆಲಸವೂ ಕೂಡ ಆಗುತ್ತಿಲ್ಲ. ಶಾಸಕರಾದ ತಿಪ್ಪಾರೆಡ್ಡಿ, ಕೆ.ಎಸ್. ಈಶ್ವರಪ್ಪ ಯಾರೇ ಇರಬಹುದು. ಮಾನ ಮರ್ಯಾದೆ ಇಲ್ಲದೆ ಎಲ್ಲವನ್ನೂ ಬಿಟ್ಟು ನಿಂತಿದ್ದಾರೆ ಎಂದು ಕಿಡಿಕಾರಿದರು‌.

ಹರಿಪ್ರಸಾದ್​ ಹೇಳಿಕೆ: ತಮ್ಮನ್ನು ತಾವು ಹಣಕ್ಕೆ ಮಾರಿಕೊಂಡವರು ಈಗ ಗರತಿಯರಂತೆ ಆಡುತ್ತಿದ್ದಾರೆ ಎಂದು ಬಿಸಿ ಪಾಟೀಲ್​ ವಿರುದ್ಧ ಕಾಂಗ್ರೆಸ್​ ನಾಯಕ ಬಿಕೆ ಹರಿಪ್ರಸಾದ್​ ಟೀಕಿಸಿದ್ದರು. ಈ ಟೀಕೆ ವಿರುದ್ಧ ಹರಿಹಾಯ್ದ ಸಚಿವ ಬಿಸಿ ಪಾಟೀಲ್​​​, ಚುನಾವಣೆಯನ್ನು ಗೆಲ್ಲದೇ ಶಾಸಕರಾದ ಅವರನ್ನು ಪಿಂಪ್​ ಎಂದು ಕರೆಯಬಹುದಲ್ವಾ ಎಂದಿದ್ದರು.

ಕ್ಷಮೆ ಕೋರಿದ ಕಾಂಗ್ರೆಸ್​ ನಾಯಕ: ಇನ್ನು ತಮ್ಮ ಹೇಳಿಕೆ ನೀಡುವ ಭರದಲ್ಲಿನ ಪದ ಬಳಕೆಯಲ್ಲಿ ಲೈಂಗಿಕ ಕಾರ್ಯಕರ್ತರಿಗೆ ನೋವಾಗಿದ್ದರೆ, ಕ್ಷಮೆ ಕೋರುವುದಾಗಿ ವಿಧಾನ ಪರಿಷತ್​​ ವಿಪಕ್ಷ ನಾಯಕರು ತಿಳಿಸಿದ್ದಾರೆ. ಈ ವೇಳೆ, ಮತ್ತೆ ಬಿಸಿ ಪಾಟೀಲ್​ ವಿರುದ್ಧ ಹರಿಹಾಯ್ದ ಅವರು, ಇವರು ಮಂತ್ರಿಯಾಗಲು ಏನು ಮಾಡಿದ್ದಾರೆ ಎಂದು ಹೇಳಿ ಬಾಯಿ ಹೊಲಸು ಮಾಡಿಕೊಳ್ಳುವುದಿಲ್ಲ. ಅವರೆಲ್ಲಾ ಏನು ಎಂಬುದು ನನಗೆ ಚೆನ್ನಾಗಿ ಗೊತ್ತಿದೆ ಎಂದಿದ್ದಾರೆ.

ಇದನ್ನೂ ಓದಿ: ಲೈಂಗಿಕ‌ ಕಾರ್ಯಕರ್ತೆಯರ ಬಗ್ಗೆ ವಿವಾದಿತ ಹೇಳಿಕೆ: ಕ್ಷಮೆ ಕೋರಿದ ಬಿ.ಕೆ.ಹರಿಪ್ರಸಾದ್​