ಬೆಂಗಳೂರು : ಮಾಜಿ ಮುಖ್ಯಮಂತ್ರಿಗಳಿಗೆ ಕಾಂಗ್ರೆಸ್ ಅವಮಾನ ಮಾಡಿದೆ ಎಂದು ಆರೋಪಿಸುವ ಬಿಜೆಪಿ ತಮ್ಮ ಮಾಜಿ ಮುಖ್ಯಮಂತ್ರಿಗಳನ್ನು ಯಾವ ರೀತಿ ನಡೆಸಿಕೊಂಡಿದೆ ಎಂಬ ಆತ್ಮ ವಿಮರ್ಶೆ ಮಾಡಿಕೊಳ್ಳಲಿ ಎಂದು ಕೆಪಿಸಿಸಿ ಒಬಿಸಿ ಅಧ್ಯಕ್ಷ ಮಧುಬಂಗಾರಪ್ಪ ಸಲಹೆ ನೀಡಿದ್ದಾರೆ.
ಕಾಂಗ್ರೆಸ್ ಪಾದಯಾತ್ರೆಯಿಂದ ಬಿಜೆಪಿ ಕಂಗಾಲು : ನಗರದ ಕ್ವೀನ್ಸ್ ರಸ್ತೆಯ ಕೆಪಿಸಿಸಿ ಕಚೇರಿಯಲ್ಲಿ ಶಾಸಕ ಎನ್ ಎ ಹ್ಯಾರಿಸ್ ಜೊತೆ ಜಂಟಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿ ಅವರು, ಕಾಂಗ್ರೆಸ್ ಪಕ್ಷ ತಮ್ಮ ಮಾಜಿ ಸಿಎಂಗಳ ಕಡೆಗಣಿಸಿದೆ ಎಂದು ಬಿಜೆಪಿಯವರು ಪೇಡ್ ಪಬ್ಲಿಸಿಟಿ ಮಾಡುತ್ತಿದ್ದಾರೆ. ಎಐಸಿಸಿ ಮಾಜಿ ಅಧ್ಯಕ್ಷ ರಾಹುಲ್ ಗಾಂಧಿ ನೇತೃತ್ವದಲ್ಲಿ ನಡೆಯುತ್ತಿರುವ ಪಾದಯಾತ್ರೆಯ ಯಶಸ್ಸಿನಿಂದ ಕಂಗೆಟ್ಟಿರುವ ಬಿಜೆಪಿ ನಾಯಕರು ಕಾಂಗ್ರೆಸ್ನ ಮಾಜಿ ಸಿಎಂಗಳಾದ ದೇವರಾಜ ಅರಸು ವೀರೇಂದ್ರ ಪಾಟೀಲ್ ಹಾಗೂ ಬಂಗಾರಪ್ಪ ಅವರ ವಿಚಾರ ಮುಂದೆ ಇಟ್ಟು ಮಾಧ್ಯಮಗಳಲ್ಲಿ ಜಾಹೀರಾತು ನೀಡುತ್ತಿದ್ದಾರೆ ಎಂದರು.
ಬಿಜೆಪಿಯವರು ಅಡ್ವಾಣಿಯನ್ನು ಎಲ್ಲಿ ಇಟ್ಟಿದ್ದಾರೆ : ಜಾಹೀರಾತುಗಳಲ್ಲಿ ಫೋಟೋ ಹಾಕಿ ವಿಶ್ಲೇಷಣೆ ಮಾಡುತ್ತಿದ್ದಾರೆ. ಪೇಪರ್ ಗಳಲ್ಲಿ ವಿಶ್ಲೇಷಣೆ ಮಾಡುತ್ತಿದ್ದಾರೆ. ಇವರೆಲ್ಲರೂ ಹಿಂದುಳಿದ ಸಮುದಾಯ ಕಟ್ಟಿದವರು. ಭೂತದ ಬಾಯಿಯಲ್ಲಿ ಭಗವದ್ಗೀತೆ ಎಂದು ಹಾಕುತ್ತಾರೆ. ಬಂಗಾರಪ್ಪನವರನ್ನು ಮೂಲೆಗುಂಪು ಮಾಡಿದ್ದಾರೆ ಎಂದು ಹೇಳುತ್ತಾರೆ. ಇವರು ಅಡ್ವಾಣಿಯವರನ್ನು ಎಲ್ಲಿ ಇಟ್ಟಿದ್ದಾರೆ ಎಂದು ಪ್ರಶ್ನಿಸಿದರು.
ಇನ್ನು ಭಾರತ್ ಜೋಡೋ ಯಾತ್ರೆ ನಡೆಯುತ್ತಿದೆ. 3570 ಕಿ.ಮೀ ಮಗ ನಡೆಯುತ್ತಾನೆ. ಈ ನೋವು ಅವರ ತಾಯಿಗಿದೆ. ಹಾಗಾಗಿ ಬಂದು ಮಗನ ಜೊತೆ ಹೆಜ್ಜೆ ಹಾಕುತ್ತಾರೆ. ಅದನ್ನೂ ಬಿಜೆಪಿಯವರು ಕೀಳುಮಟ್ಟದಲ್ಲಿ ಕಾಣುತ್ತಾರೆ. ಇವರ ಮನಸ್ಥಿತಿ ಹೇಗಿದೆ ನೀವೇ ಯೋಚಿಸಿ ಎಂದು ಹೇಳಿದರು.
ಬಿಜೆಪಿ ನೀಚ ಬುದ್ಧಿಯನ್ನು ಬಿಡಬೇಕು : ಬಿಜೆಪಿಯವರು ಪತ್ರಿಕೆ ಜಾಹೀರಾತಿನಲ್ಲಿ ಬಂಗಾರಪ್ಪ ಫೋಟೋ ಹಾಕಿದ್ದೇಕೆ? ಫೋಟೋ ಹಾಕುವ ಮುನ್ನ ತಿಳಿದುಕೊಳ್ಳಬೇಕಲ್ಲ. ಬಿಜೆಪಿಗೆ ಹೋದ್ರೂ ಬಂಗಾರಪ್ಪ ಅಲ್ಲಿ ಉಳಿಯಲಿಲ್ಲ. ಒಬ್ಬರ ಬಗ್ಗೆ ಹೆಸರು ಉಪಯೋಗ ಮಾಡಬೇಕಾದರೆ ಯೋಚಿಸಬೇಕು.
ರಾಜ್ಯದ ಜನರಿಗೆ ಅವರ ಕೊಡುಗೆ ತಿಳಿಯಬೇಕು. ಬಿಜೆಪಿಗೆ ಮಾನಮರ್ಯಾದೆ ಇದ್ಯಾ? ಆಶ್ರಯ,ಆರಾಧನಾ ಕಾರ್ಯಕ್ರಮ ತಂದಿದ್ದು ಯಾರು? ಪುಕ್ಸಟ್ಟೆ ಕರೆಂಟ್ ಕೊಟ್ಟಿದ್ದು ಹಿಂದೆ ಕಾಂಗ್ರೆಸ್. ಭೂ ಹಕ್ಕು ಕಾಯ್ದೆಯನ್ನು ತಂದವರು ಯಾರು? ಜನರಿಗೆ ತಪ್ಪು ಮಾಹಿತಿ ಕೊಡಬಾರದು. ಇಂತಹ ನೀಚ ಬುದ್ಧಿಯನ್ನು ಅವರು ಬಿಡಬೇಕು. ಯಾರು ಬೆಳೆಸ್ತಾರೆ ಅವರನ್ನೇ ತುಳಿಯುವವರು ಬಿಜೆಪಿ ಎಂದು ಹೇಳಿದರು.
ಯಾಕೆ ಯಡಿಯೂರಪ್ಪನವರ ಫೋಟೋ ಹಾಕುತ್ತಿಲ್ಲ. ಪೇಪರ್ ಗಳಲ್ಲಿ ಯಡಿಯೂರಪ್ಪ ಅವರ ಜಾಹೀರಾತು ಕೊಡಲಿ. ಯಡಿಯೂರಪ್ಪ ಮೇಲೆ ಕೇಸ್ ಹಾಕಿದ್ದವರು ಯಾರು? ನಮ್ಮ ತಂದೆಯವರು ಮೇಲೆ ಸಿಬಿಐ ಕೇಸ್ ಇತ್ತು. 18 ವರ್ಷ ಆಯ್ತು ಕೇಸು ಮುಗಿಯಲು ಬೇಕಾಯಿತು. ಬಂಗಾರಪ್ಪ ನಿರಪರಾಧಿ ಆಗೇ ಹೋದರು. ಅಪರಾಧಿ ಹಣೆಪಟ್ಟಿ ಕಟ್ಟಿಕೊಳ್ಳಲಿಲ್ಲ. ಯಡಿಯೂರಪ್ಪ ಮೇಲೆ ಕೇಸ್ ಏನಿದೆ ಎಂದು ಬಿಜೆಪಿ ನಾಯಕರ ವಿರುದ್ಧ ಮಧುಬಂಗಾರಪ್ಪ ವಾಗ್ದಾಳಿ ನಡೆಸಿದರು.
ಪುಲ್ವಾಮಾ ಬಗ್ಗೆ ಇನ್ನೂ ಏಕೆ ತನಿಖೆ ಆಗಿಲ್ಲ: ಶಾಸಕ ಎನ್.ಎ. ಹ್ಯಾರೀಸ್ ಮಾತನಾಡಿ, ಪುಲ್ವಾಮಾ ದಾಳಿ ಬಗ್ಗೆ ಯಾಕೆ ಇಲ್ಲಿಯವರೆಗೆ ತನಿಖೆಯಾಗಿಲ್ಲ. ಹೇಗಾಯ್ತು ಅಂತ ಯಾಕೆ ಮಾಹಿತಿ ಬಂದಿಲ್ಲ. ಪರೋಕ್ಷವಾಗಿ ಸರ್ಕಾರದ ಕಾಲೆಳೆದರು. ದೇಶ ಇವತ್ತು ಕೀಳು ಮಟ್ಟಕ್ಕೆ ಹೋಗುತ್ತಿದೆ. ಭಾರತ್ ಜೋಡೋ ಯಾತ್ರೆ ಎಷ್ಟು ಯಶಸ್ವಿಯಾಗಿದೆ. ಈ ಬಗ್ಗೆ ಬಿಜೆಪಿಯವರೇ ಹೇಳುತ್ತಿದ್ದಾರೆ.
ಅವರ ಜಾಹಿರಾತುಗಳನ್ನು ನೋಡಿದ್ರೆ ಗೊತ್ತಾಗುತ್ತದೆ. ಅಡ್ವಾಣಿಯವರನ್ನು ಇವರು ಎಲ್ಲಿ ಕೂರಿಸಿದ್ದಾರೆ. ಮೊದಲು ಇದರ ಬಗ್ಗೆ ಅವರು ಮಾತನಾಡಲಿ. ಬಂಗಾರಪ್ಪ, ಅರಸು, ವಿರೇಂದ್ರ ಪಾಟೀಲರ ಬಗ್ಗೆ ಮಾತನಾಡಿದರೆ ಹೇಗೆ? ಇವರು ಕೊಟ್ಟ ಕಾರ್ಯಕ್ರಮ ಇವರು ಕೊಡ್ತಾರಾ? ಪಾಟೀಲರು ಎರಡು ಬಾರಿ ಸಿಎಂ ಆದವರು. ಬಂಗಾರಪ್ಪ ಕಾಂಗ್ರೆಸ್ ನಲ್ಲೇ ಸಿಎಂ ಆದವರು.
ನಮ್ಮಲ್ಲಿದ್ದ 17 ಜನರನ್ನು ಇವರು ಕೊಂಡೊಯ್ಯಲಿಲ್ಲವೇ? ಅವರ ನಾಯಕರನ್ನೇ ನಿರ್ಲಕ್ಷ್ಯ ಮಾಡುತ್ತಾರೆ. ಹುಟ್ಟಿಸಿದ ತಂದೆಗೆ ಇವರು ಮರ್ಯಾದೆ ಕೊಡಲಿಲ್ಲ. 15 ಲಕ್ಷ ಅಕೌಂಟಿಗೆ ಹಾಕ್ತೇವೆ ಅಂದ್ರು ಎಲ್ಲಿ? ಗ್ಯಾಸ್ ಸಿಲಿಂಡರ್ ಬೆಲೆ ಎಷ್ಟಾಗಿದೆ? ಇದರ ಬಗ್ಗೆ ಅವರು ಮಾತನಾಡ್ತಿಲ್ಲ. ಇದರ ಬಗ್ಗೆಯೂ ಜಾಹೀರಾತು ಕೊಡಲಿ ಎಂದರು.
ಹೊಸ ಇತಿಹಾಸ ನಿರ್ಮಿಸುವ ಕೆಲಸ ಮಾಡಲಿ : ರೈಲಿಗೆ ಟಿಪ್ಪು ಹೆಸರು ಕೈಬಿಟ್ಟು ಒಟೆಯರ್ ಹೆಸರಿಟ್ಟ ವಿಚಾರ ಪ್ರಸ್ತಾಪಿಸಿ, ರಾಜ್ಯ ಸರ್ಕಾರ ಇರುವ ಇತಿಹಾಸವನ್ನು ಬದಲಿಸುವ ಹಾಗೂ ಜನರಿಂದ ಮರೆಸುವ ಯತ್ನ ನಡೆಸುವ ಬದಲು ಹೊಸ ಇತಿಹಾಸ ನಿರ್ಮಿಸುವ ಕಾರ್ಯ ಮಾಡಲಿ. ಇರುವ ರೈಲಿಗೆ ಟಿಪ್ಪು ಹೆಸರನ್ನು ಬದಲಿಸಿ, ಒಡೆಯರ್ ಹೆಸರನ್ನು ಇರಿಸುವ ಬದಲು ಬಹು ದಿನಗಳಿಂದ ಹೇಳುತ್ತಿರುವ ಇವರ ಬುಲೆಟ್ ಟ್ರೈನ್ಗೆ ಒಡೆಯರ್ ಹೆಸರನ್ನು ಇರಿಸಲಿ. ಯಾರದು ಹೆಸರು ಬದಲಿಸುವುದರಿಂದ ಇತಿಹಾಸದಿಂದ ಅವರನ್ನು ಮರೆಸಲು ಸಾಧ್ಯವಿಲ್ಲ ಎಂದರು.
ಇದನ್ನೂ ಓದಿ : ಮೀಸಲು ಹೆಚ್ಚಳ ಮಾಡುವುದರಿಂದ ಮತ ಬರುವುದಿಲ್ಲ: ಕುಮಾರಸ್ವಾಮಿ
