ಸಿಎಂ ಬೊಮ್ಮಾಯಿ, ಸಚಿವ ಈಶ್ವರಪ್ಪ ಇಬ್ಬರೂ ರಾಷ್ಟ್ರ ದ್ರೋಹಿಗಳು: ಸಿದ್ದರಾಮಯ್ಯ

ರಾಜ್ಯಪಾಲರ ಭೇಟಿ ನಂತರ ಮಾತನಾಡಿದ ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ, ನಾನು ಹಾಗೂ ಕಾಂಗ್ರೆಸ್ ಶಾಸಕರ ನಿಯೋಗ ರಾಜ್ಯಪಾಲರನ್ನು ಪಾದಯಾತ್ರೆ ಮೂಲಕ ಬಂದು ಭೇಟಿ ಮಾಡಿದೆವು. ಆ ವೇಳೆ, ಸಚಿವ ಈಶ್ವರಪ್ಪ ವಿರುದ್ಧ ಅವರಿಗೆ ಮನವಿ ಪತ್ರ ಸಲ್ಲಿಸಿದ್ದೇವೆ ಎಂದು ಹೇಳಿದರು.

ಬೆಂಗಳೂರು: ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಹಾಗೂ ಗ್ರಾಮೀಣಾಭಿವೃದ್ಧಿ ಸಚಿವ ಕೆಎಸ್ ಈಶ್ವರಪ್ಪ ಇಬ್ಬರು ದೇಶದ್ರೋಹಿಗಳು ಎಂದು ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ ಅಭಿಪ್ರಾಯಪಟ್ಟಿದ್ದಾರೆ.

ವಿಧಾನಸೌಧದಿಂದ ರಾಜಭವನದವರೆಗೆ ಮೆರವಣಿಗೆ ತೆರಳಿ ರಾಜ್ಯಪಾಲರನ್ನು ಭೇಟಿಯಾಗಿ ಮನವಿ ಸಲ್ಲಿಸಿದ ಬಳಿಕ ಸುದ್ದಿಗಾರರ ಜೊತೆ ಮಾತನಾಡಿ, ಸಚಿವ ಈಶ್ವರಪ್ಪ ಹೇಳಿಕೆ ಬಾಯ್ ತಪ್ಪಿನಿಂದಾಗಿ ಬಂದಿದ್ದಲ್ಲ ಉದ್ದೇಶಪೂರ್ವಕವಾಗಿ ಹೇಳಿದ್ದಾಗಿದೆ. ಈ ರಾಷ್ಟ್ರವಿರೋಧಿ ಹೇಳಿಕೆಯನ್ನು ಗಂಭೀರವಾಗಿ ಪರಿಗಣಿಸಿ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕಿತ್ತು. ಆದರೆ, ಸಿಎಂ ಸೇರಿದಂತೆ ಸರ್ಕಾರವೇ ಈಶ್ವರಪ್ಪ ಬೆನ್ನಿಗೆ ನಿಂತದ್ದು ಸರಿಯಲ್ಲ.

ರಾಷ್ಟ್ರದ್ರೋಹಿ ಹೇಳಿಕೆಯನ್ನು ನೀಡಿರುವ ಈಶ್ವರಪ್ಪ ಹಾಗೂ ಹಾಗೂ ಅದನ್ನು ಸಮರ್ಥಿಸಿರುವ ಸಿಎಂ ಕೂಡ ದೇಶದ್ರೋಹಿಯಾಗಿದ್ದಾರೆ. ಇದರಿಂದ ಮುಂದಿನ ನಿರ್ಧಾರ ನಿಮಗೆ ಬಿಟ್ಟಿದ್ದು ಎಂದು ರಾಜ್ಯಪಾಲರಿಗೆ ಮನವಿ ಸಲ್ಲಿಸಿದ ಸಂದರ್ಭ ತಿಳಿಸಿದ್ದೇವೆ. ಅವರಿಂದ ಸೂಕ್ತ ಕ್ರಮ ಜರುಗುವ ನಿರೀಕ್ಷೆ ಇದೆ ಎಂದರು.

ಕೇಸರಿ ಧ್ವಜವನ್ನು ಕೆಂಪು ಕೋಟೆ ಮೇಲೆ ಇವತ್ತಲ್ಲ ನಾಳೆ ಹಾರಿಸ್ತೇವೆ ಎಂದರು. ರಾಷ್ಟ್ರಧ್ವಜ ಹಾರಾಡುವ ಕೆಂಪುಕೋಟೆ ಮೇಲೆ ಕೇಸರಿ ಧ್ಚಜ ಹಾರಿಸ್ತೇವೆ ಅಂದಿದ್ದಾರೆ. ಇದು ರಾಷ್ಟ್ರ ಧ್ವಜಕ್ಕೆ ಮಾಡಿದ ಅವಮಾನ. ಅಕ್ಷಮ್ಯ ಅಪರಾಧ. ಇವತ್ತು ನಾವೆಲ್ಲ ರಾಜ್ಯಪಾಲರ ಭೇಟಿ ಮಾಡಿದೆವು.

ಪಾದಯಾತ್ರೆಯಲ್ಲಿ ನಿಯೋಗದ ಜತೆ ಬಂದು ಮನವಿ ಸಲ್ಲಿಸಿದ್ದೇವೆ. ಫ್ಲ್ಯಾಗ್ ಕೋಡ್​​​​​ನ ಸ್ಪಷ್ಟ ಉಲ್ಲಂಘನೆ ಆಗಿದೆ. ಇದು ದೇಶದ್ರೋಹದ ಹೇಳಿಕೆ. ಪ್ರತಿಯೊಬ್ಬ ಪ್ರಜೆಯ ಮೂಲ ಹಕ್ಕು ರಾಷ್ಟ್ರಧ್ವಜ, ಸಂವಿಧಾನ, ರಾಷ್ಟ್ರಗೀತೆ ಗೌರವಿಸುವುದು. ಗೌರವಿಸದಿದ್ದರೆ ಅಪರಾಧ, ಈ ಅಪರಾಧಕ್ಕೆ ಶಿಕ್ಷೆ ಆಗುತ್ತೆ ಎಂಬ ವಿಚಾರವನ್ನು ಸರ್ಕಾರಕ್ಕೆ ಮನದಟ್ಟು ಮಾಡಿಕೊಡುವಂತೆ ಕೋರಿದ್ದೇವೆ ಎಂದು ಹೇಳಿದರು.

ಈಶ್ವರಪ್ಪ ಮಾಡಿದ್ದೂ ದೇಶದ್ರೋಹದ ಕೆಲಸ, ಸಿಎಂ ಮಾಡಿದ್ದೂ ದೇಶದ್ರೋಹದ ಕೆಲಸ. ನಮ್ಮ ನಿಲುವಳಿ ಸೂಚನೆ ತಿರಸ್ಕರಿಸಲಾಯ್ತು. ನಮ್ಮ ಚರ್ಚೆ ಕೇಳಲೇ ಇಲ್ಲ. ಮೇಲ್ಮನೆಯಲ್ಲಿ ಚರ್ಚೆ ಆಯ್ತು. ಐದು ದಿನ ನಾವು ಧರಣಿ ಮಾಡಿದೆವು. ಈಶ್ವರಪ್ಪ 2006 ರಿಂದಲೂ ಸಚಿವರು. ದುರುದ್ದೇಶದಿಂದ ಹೇಳಿಕೆ ಕೊಟ್ಟಿದ್ದಾರೆ.

ರಾಷ್ಟ್ರಧ್ವಜ ನಮ್ಮ ದೇಶದ ಹೆಮ್ಮೆ. ರಾಷ್ಟ್ರಧ್ವಜದ ಇತಿಹಾಸ ಅವರಿಗೆ ಗೊತ್ತಿದೆಯೋ ಇಲ್ಲವೋ? ಸ್ವಾತಂತ್ರ್ಯ ಹೋರಾಟಗಾರರಿಗೆ ಸ್ಫೂರ್ತಿ ಕೊಟ್ಟ ಧ್ವಜ ಅದು. ಸ್ವಾತಂತ್ರ್ಯದ ಸಂಕೇತ ರಾಷ್ಟ್ರಧ್ವಜ. ಅದಕ್ಕೆ ಈಶ್ವರಪ್ಪ ಅವಮಾನ ಮಾಡಿದ್ದಾರೆ. ನಾವು ಎರಡೂ ಮನೆಗಳಲ್ಲೂ ನಿಲುವಳಿ ಸೂಚನೆ‌ ಮಂಡನೆಗೆ ಕೇಳಿದ್ವಿ. ಈಶ್ವರಪ್ಪ ಮಂತ್ರಿ ಆಗಲು ಅನರ್ಹ, ಅವರನ್ನು ವಜಾ ಮಾಡಲು ಕೇಳಿದ್ವಿ. ಸಿಎಂ ಏನೂ ಮಾಡದೇ ಈಶ್ವರಪ್ಪ ತಪ್ಪನ್ನು ಸಮರ್ಥಿಸಿಕೊಂಡ್ರು ಎಂದು ಕಿಡಿಕಾರಿದರು.

ಜೆ ಪಿ ನಡ್ಡಾ ಅವರೇ ಈಶ್ವರಪ್ಪ ಹೇಳಿಕೆ ತಪ್ಪು ಅಂದಿದ್ದಾರೆ. ನಮ್ಮ ನಿಲುವನ್ನು ನಡ್ಡಾ ಸಮರ್ಥನೆ ಮಾಡಿದ್ದಾರೆ. ಇದನ್ನು ನೋಡಿಯಾದರೂ ಸಿಎಂ ಈಶ್ವರಪ್ಪರನ್ನು ವಜಾ ಮಾಡಬೇಕಿತ್ತು. ಇದು ಅವರ ಭಂಡ ಧೈರ್ಯ, ಭಂಡತನ ತೋರಿಸುತ್ತೆ.

ಇವತ್ತು ಸದನ ಅನಿರ್ದಿಷ್ಟಾವಧಿಗೆ ಮುಂದೂಡಿದ್ರು. ಹೀಗಾಗಿ ನಾವು ರಾಜ್ಯಪಾಲರ ಭೇಟಿ ಮಾಡಿದೆವು. ರಾಜ್ಯಪಾಲರು ರಾಜ್ಯದ ಮುಖ್ಯಸ್ಥರು. ರಾಜ್ಯಪಾಲರಿಗೆ ಮನವಿ ಮಾಡಿದ್ದೇವೆ. ಸಿಎಂ ಈಶ್ವರಪ್ಪರನ್ನು ವಜಾ ಮಾಡಲಿಲ್ಲ, ನೀವು ವಜಾ ಮಾಡಿ ಅಂತ ಮನವಿ ಸಲ್ಲಿಸಿದ್ದೇವೆ ಎಂದು ವಿವರಿಸಿದರು.

ನಾನು ಸಿಂಹ ಅಂದ ಈಶ್ವರಪ್ಪಗೆ ಸಿದ್ದರಾಮಯ್ಯ ತಿರುಗೇಟು ನೀಡಿ, ಕೊನೆಗೂ ಅವರು ಪ್ರಾಣಿಗಳು ಅಂತ ಒಪ್ಕೊಂಡ್ರಲ್ಲ. ಅಧಿವೇಶನ ಮುಕ್ತಾಯವಾಗಬಹುದು. ಆದರೆ, ಈಶ್ವರಪ್ಪ ವಿರುದ್ಧದ ನಮ್ಮ ಹೋರಾಟ ಮುಮದುವರೆಯುತ್ತದೆ.

ಅದನ್ನು ಜನರ ಬಳಿ ಕೊಂಡೊಯ್ಯುತ್ತೇವೆ. ನಮಗೆ ರಾಜ್ಯಪಾಲರ ಮೇಲೆ ವಿಶ್ವಾಸ ಇದೆ. ರಾಜ್ಯಪಾಲರು ಈಶ್ವರಪ್ಪರನ್ನು ವಜಾ ಮಾಡುವ ವಿಶ್ವಾಸ ಇದೆ. ವಜಾ ಮಾಡದಿದ್ದರೆ ನಾವು ಜನತೆ ಬಳಿ‌ ಹೋಗ್ತೇವೆ. ಹಿಜಾಬ್ ಪ್ರಕರಣ ಹುಟ್ ಹಾಕಿದ್ದೇ ಬಿಜೆಪಿ. ಇಲ್ಲಿವರೆಗೂ ಹಿಜಾಬ್ ಸಮಸ್ಯೆ ಇರ್ಲಿಲ್ಲ. ಪ್ರಕರಣ ಕೋರ್ಟಿನಲ್ಲಿದೆ, ಕೋರ್ಟ್ ಏನ್ ಹೇಳುತ್ತೋ ನೋಡೋಣ ಎಂದು ಅಭಿಪ್ರಾಯಪಟ್ಟರು.

ಇದನ್ನೂ ಓದಿ: ರಾಜ್ಯಪಾಲರಿಂದ ಬುಲಾವ್ ಬಂದಿಲ್ಲ, ಶಿವಮೊಗ್ಗ ಘಟನೆ ಬಗ್ಗೆ ಚರ್ಚಿಸಿಯೂ ಇಲ್ಲ: ಕೆ.ಎಸ್‌. ಈಶ್ವರಪ್ಪ ಸ್ಪಷ್ಟನೆ