ವಾಂಗಿ ಬಾತ್​ನಲ್ಲಿ ಜಿರಳೆ: ಬಿಬಿಎಂಪಿ ಕಾರ್ಪೋರೇಟರ್ಸ್​​ ಕಕ್ಕಾಬಿಕ್ಕಿ

ಬಿಬಿಎಂಪಿ ವಿಶೇಷ ಕೌನ್ಸಿಲ್ ಸಭೆಯಲ್ಲಿ ಬಜೆಟ್ ಕುರಿತ ಬಿಸಿಬಿಸಿ ಚರ್ಚೆ ನಡಿಯುತ್ತಿರುವಾಗ ಶಾಕ್​ ಕಾದಿತ್ತು. ಈ ನಡುವೆ ಕಾರ್ಪೋರೇಟರ್ಸ್​ಗೆ ಕೊಟ್ಟಿದ್ದ ವಾಂಗಿಬಾತ್​ನಲ್ಲಿ ಜಿರಳೆ ಮರಿ ಸಿಕ್ಕಿ ದೊಡ್ಡ ರಾದ್ಧಾಂತವೇ ಸೃಷ್ಟಿಯಾಯಿತು.

ಬೆಂಗಳೂರು: ಬಿಬಿಎಂಪಿ ವಿಶೇಷ ಕೌನ್ಸಿಲ್ ಸಭೆಯಲ್ಲಿ ಬಜೆಟ್ ಕುರಿತ ಬಿಸಿಬಿಸಿ ಚರ್ಚೆ ನಡಿಯುತ್ತಿರುವ ವೇಳೆ ಕಾರ್ಪೋರೇಟರ್ಸ್​ಗೆ ಕೊಟ್ಟ ವಾಂಗಿಬಾತ್ ನಲ್ಲಿ ಜಿರಳೆ ಮರಿ ಸಿಕ್ಕಿದ್ದು ದೊಡ್ಡ ರಾದ್ಧಾಂತಕ್ಕೆ ಕಾರಣವಾಯಿತು.

ಬೆಳಗಿನ ತಿಂಡಿ ಖಾಸಗಿ ಹೋಟೆಲ್ ಹಾಗೂ ಮಧ್ಯಾಹ್ನದ ಊಟ ಪೂರೈಕೆಯನ್ನು ಇಂದಿರಾ ಕ್ಯಾಂಟೀನ್ ಗೆ ವಹಿಸಲಾಗಿತ್ತು. ಈ ಹಿನ್ನೆಲೆ 12 ಗಂಟೆಯ ವೇಳೆಗೆ ಪಕೋಡ ಹಾಗೂ ನವಣೆಯ ವಾಂಗಿಬಾತ್ ನೀಡಿದ್ರು. ಚರ್ಚೆಯ ನಡುವೆ ತಿಂಡಿ ತಿನ್ನುತ್ತಿದ್ದಾಗ, ದೊಡ್ಡಬೊಮ್ಮಸಂದ್ರ ವಾರ್ಡ್ ಕಾರ್ಪೋರೇಟರ್ ಜಯಲಕ್ಷಮ್ಮ ಪಿಳ್ಳಪ್ಪ ಅವರಿಗೆ ವಾಂಗಿಬಾತ್​ನಲ್ಲಿ ಜಿರಳೆ ಮರಿ ಸಿಕ್ಕಿತು. ನೀವು ಕೊಟ್ಟ ತಿಂಡಿಯಲ್ಲಿ ಜಿರಳೆ ಇದೆ ನೋಡಿ ಎಂದು ಬಿಜೆಪಿ ಕಾರ್ಪೋರೇಟರ್ ರಾಜಾ ರಾಮ್ ಹಾಗೂ ಉಮೇಶ್ ಶೆಟ್ಟಿ ಗದ್ದಲ ಎಬ್ಬಿಸಿದ್ರು.

ಈ ವೇಳೆ ಬಜೆಟ್ ಚರ್ಚೆ ನಡೆಯಲು ಬಿಡಿ ಎಂದು ಮೇಯರ್ ಮನವಿ ಮಾಡಿದ್ರು. ಆಡಳಿತ ಪಕ್ಷದ ಮಾಜಿ ನಾಯಕ ಎಂ. ಶಿವರಾಜು, ನಾಟಕ ಮಾಡ್ಬೇಡಿ ಸುಮ್ನಿರಿ ಎಂದು ವಿಷಯವನ್ನು ಮರೆಮಾಚಲು ಯತ್ನಿಸಿದರು. ಅಲ್ಲಿಗೆ ಜಿರಳೆ ಗದ್ದಲ ಕಡಿಮೆಯಾಗಿ, ಚರ್ಚೆ ಪುನಾರಂಭವಾಯಿತು.