ಜನರ ಹಿತಕ್ಕಾಗಿ ಕಾರ್ಯನಿರ್ವಹಿಸಿ: ಜಿಲ್ಲಾಧಿಕಾರಿಗೆ ಸಿಎಂ ಬೊಮ್ಮಾಯಿ ಸೂಚನೆ

ಇಂಸು ಸಿಎಂ ಬಸವರಾಜ ಬೊಮ್ಮಾಯಿಯವರು ವಿಧಾನಸೌಧದಲ್ಲಿ ಜಿಲ್ಲಾಧಿಕಾರಿಗಳ ಜೊತೆ ಸಭೆ ನಡೆಸಿ, ಜನರ ಹಿತಕ್ಕಾಗಿ ಕಾರ್ಯನಿರ್ವಹಿಸುವಂತೆ ಮನವಿ ಮಾಡಿದರು..

ಬೆಂಗಳೂರು : ಜನರು ಇರುವ ಕಡೆ ಹೋಗಿ ಕೆಲಸ ಮಾಡಬೇಕೆಂದು ಜಿಲ್ಲಾಧಿಕಾರಿಗಳಿಗೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಸೂಚಿಸಿದರು.

ವಿಧಾನಸೌಧದಲ್ಲಿ ಜಿಲ್ಲಾಧಿಕಾರಿಗಳ ಜೊತೆ ಸಭೆ ನಡೆಸಿದ ಬಳಿಕ ಪತ್ರಿಕಾಗೋಷ್ಠಿ ಉದ್ದೇಶಿಸಿ ಮಾತನಾಡಿದ ಅವರು, ಕಾನೂನು ಚೌಕಟ್ಟಿನಲ್ಲಿ ಬಡವರಿಗೆ ನೆರವು ಕೊಡುವ ಕೆಲಸ ಮಾಡಬೇಕು. ಗ್ರಾಮಗಳಿಗೆ ಭೇಟಿ‌ ಕೊಡಲು ನಿರ್ದೇಶನ ನೀಡಲಾಗಿದೆ. ಆಡಳಿತ ಚುರುಕಿಗೆ ಆದೇಶಿಸಲಾಗಿದೆ ಎಂದರು.

ಡಿಸಿಗಳ‌ ಪಾತ್ರ ದೊಡ್ಡದಿದೆ. ಜಿಲ್ಲಾಧಿಕಾರಿಗಳಾಗಿ, ಜಿಲ್ಲಾ ಮ್ಯಾಜಿಸ್ಟ್ರೇಟ್​​ಗಳಾಗಿ ಡಿಸಿಗಳು ಕೆಲಸ ಮಾಡುತ್ತಾರೆ. ಡಿಸಿಗಳು ಅಧಿಕಾರದ ಬಹುಮುಖ್ಯ ಕೊಂಡಿಯಾಗಿದ್ದಾರೆ. ಅವರ ಆಡಳಿತದ ಮೇಲೆ ಬಹಳಷ್ಟು ಅವಲಂಬನೆ ಇದೆ. ಡಿಸಿಗಳಿಗೆ ಜನಸ್ಪಂದನೆಯಾಗಿ ಕೆಲಸ ಮಾಡಬೇಕು. ಕೆಲವರ ಹಿತಕ್ಕಾಗಿ ಬೇಡ, ಜನರ ಹಿತಕ್ಕಾಗಿ ಕೆಲಸ ಮಾಡಲು ಸೂಚಿಸಿರುವುದಾಗಿ ತಿಳಿಸಿದರು.

ರೈತರ ಬಾಕಿ ಬೆಳೆ ಪರಿಹಾರ ಕೊಡಲು ಸೂಚನೆ ನೀಡಲಾಗಿದೆ. ಪರಿಹಾರ ಸಂಬಂಧ ಮಾಹಿತಿ ಆ್ಯಪ್​​​ನಲ್ಲಿ ಅಪ್​​​ಲೋಡ್​​​ಗೆ ಸೂಚಿಸಲಾಗಿದೆ‌. ಜನವರಿ 7ರವರೆಗೆ ಗಡುವು‌ ಕೊಡಲಾಗಿದೆ. 2019-20ರಲ್ಲಿ ಕೆಲವರು ಮನೆಗಳ ನಿರ್ಮಾಣ ಆರಂಭ ಮಾಡಿಲ್ಲ. ಇನ್ನೊಮ್ಮೆ ಜಿಪಿಎಸ್ ಮೂಲಕ‌ ಪರಿಶೀಲನೆಗೆ ಸೂಚಿಸದ್ದೇನೆ. ಸ್ಥಳ ಬದಲಾಯಿಸಿ ಇನ್ನೊಂದೆಡೆ ಅವರದೆ ಸ್ಥಳದಲ್ಲಿ ಮನೆ ಕಟ್ಟೋದಾದ್ರೆ ಅನುಮತಿಸಲು ಸೂಚನೆ ನೀಡಿದ್ದೇನೆ ಎಂದರು.

ನನೆಗುದಿಗೆ ಬಿದ್ದಿರುವ ಹಲವು ವಿಚಾರಗಳನ್ನ ಚರ್ಚೆ ಮಾಡಿದ್ದೇವೆ. ಅಕ್ರಮ ಸಕ್ರಮ ಬಗ್ಗೆಯೂ ಚರ್ಚೆಯಾಗಿದೆ. ಗೋಮಾಳಗಳ ಸಕ್ರಮ ಬಗ್ಗೆ ಚರ್ಚಿಸಿದ್ದೇವೆ. ಸಕ್ರಮಕ್ಕೆ ಕಾನೂನು ತೊಡಕುಗಳ ಬಗ್ಗೆ ಚರ್ಚಿಸಲಾಯಿತು. ಇವುಗಳ ಕಡತ ವಿಲೇವಾರಿ ಜವಾಬ್ದಾರಿ ವಿಭಾಗಾಧಿಕಾರಿಗಳಿಗೆ ನೀಡಲಾಗಿದೆ ಎಂದರು.

ಡೀಮ್ಡ್ ಅರಣ್ಯಗಳ ವಿಚಾರದಲ್ಲಿ ಬಡವರು, ರೈತರಿಗೆ ಹಲವು ಕಡೆ ತೊಂದರೆಯಾಗಿದೆ. ಇದರ ನಿವಾರಣೆ ಬಗ್ಗೆ ಚರ್ಚೆ ನಡೆದಿದೆ. ಕಂದಾಯ ಭೂಮಿಗಳ ಮಂಜೂರು ಪ್ರಕರಣ ಬಾಕಿ ಇದೆ. ಬಹಳಷ್ಟು ಜನಕ್ಕೆ ನ್ಯಾಯ ಸಿಗದೆ ವ್ಯಾಜ್ಯ ಮುಂದುವರಿದಿದೆ.

ಇಂಥ ವ್ಯಾಜ್ಯ ಇತ್ಯರ್ಥಕ್ಕೆ ಸೂಚನೆ ನೀಡಲಾಗಿದೆ. ಒಂದು ವರ್ಷದಲ್ಲಿ ಇವುಗಳ ವಿಲೇವಾರಿಗೆ ಸೂಚಿಸಲಾಗಿದೆ. ಭೂಪರಿವರ್ತನೆಗೆ ಕಂದಾಯ ಸಚಿವರು ಹೊಸ ನಿಯಮಾವಳಿ ತರುವ ಘೋಷಣೆ ಮಾಡಿದ್ದಾರೆ‌. ಇದಕ್ಕೆ ಎಲ್ಲಾ ನಗರಗಳ ಮಾಸ್ಟರ್ ಪ್ಲಾನ್ ಮಾಡ್ತಿದ್ದೇವೆ. 48 ನಗರಗಳ ಮಾಸ್ಟರ್ ಪ್ಲಾನ್ ಇನ್ನೂ ಆಗಿಲ್ಲ. ಇದಕ್ಕೂ ಸೂಚನೆ ಕೊಡಲಾಯಿತು ಎಂದರು.

ಸಾಮಾಜಿಕ ಭದ್ರತಾ ಯೋಜನೆಗಳ ಬಗ್ಗೆ ಚರ್ಚೆ ನಡೆದಿದೆ. ಈ ಸೇವೆಗಳನ್ನು ಆಧಾರ್​ಗೆ ಸೇರಿಸಲು ಒಂದು ತಿಂಗಳ ಗಡುವು ನೀಡಲಾಗಿದೆ‌. 4370 ಊರುಗಳಲ್ಲಿ ಸ್ಮಶಾನ ಭೂಮಿ ಅಗತ್ಯ ಇದೆ. ಸ್ಮಶಾನ ಭೂಮಿಗಳು ಎಲ್ಲೆಡೆ ಇಲ್ಲ. ಹಲವು‌ ಕಡೆ ಇದ್ರೂ ಜಾಗ ಸಾಕಾಗುತ್ತಿಲ್ಲ. ಸ್ಮಶಾನ ಭೂಮಿಗಳಿಗೆ ಸರ್ಕಾರದ ಜಾಗ ಕೊಡಲು ನಿರ್ಧಾರ ಮಾಡಲಾಗಿದೆ. ಸರ್ಕಾರಿ ಜಾಗ ಇಲ್ಲದಿರುವ ಕಡೆ ಖರೀದಿ ಮಾಡಲಾಗುವುದು ಎಂದರು.

ಕೋವಿಡ್ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ಜಾಗೃತೆ ವಹಿಸಲು ಸೂಚನೆ ನೀಡಿದ್ದೇನೆ. ಬೆಡ್, ಔಷಧ, ಟೆಸ್ಟಿಂಗ್, ಆರೋಗ್ಯ ಸೌಕರ್ಯ ಹೆಚ್ಚಿಸಲು ತಿಳಿಸಿದ್ದೇನೆ. ಶೇ.97 ರಷ್ಟು ಲಸಿಕೆ ನೀಡಲಾಗಿದ್ದು, ಜನವರಿ ಅಂತ್ಯಕ್ಕೆ ಶೇ.100 ಮುಗಿಸಲು ಸೂಚನೆ ನೀಡಲಾಗಿದೆ. ಶೇ.76 ರಷ್ಟು ಎರಡನೇ ಡೋಸ್ ಆಗಿದೆ‌. ಇದು 80% ಆಗಲು ಸೂಚಿಸಿದ್ದೇನೆ ಎಂದರು.