ಬೆಂಗಳೂರು: ಲೇಡಿಸ್ ಪಿಜಿಯಲ್ಲಿಟ್ಟಿದ್ದ ಹಣವನ್ನು ಅಲ್ಲೇ ಕೆಲಸ ಮಾಡುತ್ತಿದ್ದ ನೇಪಾಳಿ ದಂಪತಿಗಳು ಕದ್ದು ಪರಾರಿಯಾಗಿರುವ ಘಟನೆ ಹೈಗ್ರೌಂಡ್ಸ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.
ನೇಪಾಳ ಮೂಲದ ಪೂಜಾ ಸಿಂಗ್ ಹಾಗೂ ರಾಜು ಸಿಂಗ್ ಹಣ ಕದ್ದು ಪರಾರಿಯಾದವರು. ಇಲ್ಲಿನ ಕಾವೇರಪ್ಪ ಲೇಔಟ್ನಲ್ಲಿ ಪದ್ಮನಾಭ ಎಂಬುವರು ಕಳೆದ ಎಂಟು ವರ್ಷಗಳಿಂದ ಪಿಜಿ ನಡೆಸುತ್ತಿದ್ದಾರೆ. 5 ವರ್ಷಗಳಿಂದ ನೇಪಾಳಿ ದಂಪತಿಗಳು ಇಲ್ಲಿ ಕೆಲಸ ಮಾಡುತ್ತಿದ್ದರು. ಪಿಜಿಗೆ ಸೇರುವ ಮುಂಚಿತವಾಗಿ ಯುವತಿಯರು ಮುಂಗಡ ಹಣವನ್ನು ನೀಡುತ್ತಿದ್ದು, ಅದನ್ನು ಮಾಲೀಕರು ಬೀರುವಿನಲ್ಲಿ ಇಡುತ್ತಿದ್ದರು. ಇದನ್ನು ಗಮನಿಸಿದ್ದ ದಂಪತಿಗಳು ರಾತ್ರಿ ವೇಳೆ ಸಿಸಿಟಿವಿ ಕ್ಯಾಮರಾ ಆಫ್ ಮಾಡಿ ಸುಮಾರು 2 ಲಕ್ಷ ರೂ. ಕಳ್ಳತನವೆಸಗಿ ಪರಾರಿಯಾಗಿದ್ದಾರೆ.
ಇತ್ತ ಮಾಲೀಕರ ಅಜ್ಜಿ ಅನಾರೋಗ್ಯದಿಂದ ಆಸ್ಪತ್ರೆ ಸೇರಿದ್ದು, ಅವರ ಚಿಕಿತ್ಸೆಗೆ ಹಣ ಪಾವತಿಸಲು ಬೀರುವಿನಲ್ಲಿದ್ದ ಹಣಕ್ಕಾಗಿ ಕೈಹಾಕಿದ್ದಾರೆ. ಈ ವೇಳೆ ಹಣ ಕಳ್ಳತನವಾಗಿರುವ ಘಟನೆ ಬೆಳಕಿಗೆ ಬಂದಿದೆ. ತಕ್ಷಣವೇ ಸಿಸಿಟಿವಿ ಪರಿಶೀಲಿಸಿದಾಗ ನೋಸಿಗ್ನಲ್ ಎಂದು ಬಂದಿದೆ. ಬಳಿಕ ಡಿವಿಆರ್ ಚೆಕ್ ಮಾಡಿದಾಗ ಸಿಸಿಟಿವಿ ಸ್ವಿಚ್ ಆಫ್ ಮಾಡಿರುವುದು ತಿಳಿದುಬಂದಿದೆ. ಸದ್ಯ ಹೈಗ್ರೌಂಡ್ಸ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಕಲಾಗಿದೆ.
