ಬೆಂಗಳೂರು : ಡ್ರಗ್ಸ್ ಜಾಲ ನಂಟು ಆರೋಪ ಪ್ರಕರಣದಲ್ಲಿ ಬಂಧಿತನಾಗಿರುವ ಮಾಜಿ ಸಚಿವ ರುದ್ರಪ್ಪ ಲಮಾಣಿ ಪುತ್ರ ದರ್ಶನ್ ಲಮಾಣಿಯ ವಿಚಾರಣೆಯನ್ನು ಸಿಸಿಬಿ ಅಧಿಕಾರಿಗಳು ಚುರುಕುಗೊಳಿಸಿದ್ದಾರೆ. ವಿಚಾರಣೆ ವೇಳೆ ಪ್ರಕರಣದ ಪ್ರಮುಖ ಆರೋಪಿ ಹೇಮಂತ್ ಜೊತೆ ದರ್ಶನ್ ನಂಟು ಹೊಂದಿರುವ ವಿಚಾರ ಬೆಳಕಿಗೆ ಬಂದಿದೆ.
ಖುದ್ದು ದಕ್ಷಿಣ ವಿಭಾಗ ಡಿಸಿಪಿ ಹರೀಶ್ ಪಾಂಡೆ ಆರೋಪಿಯ ವಿಚಾರಣೆ ನಡೆಸುತ್ತಿದ್ದು, ವಿಚಾರಣೆ ವೇಳೆ ಸದಾಶಿವನಗರದ ಬಳಿ ಇರುವ ಸುನೀಶ್ ಎಂಬಾತನ ಮನೆಯಲ್ಲಿ ಹೈಫೈ ಪಾರ್ಟಿ ನಡೆಯುತ್ತಿದ್ದ ಬಗ್ಗೆ ಆರೋಪಿ ಬಾಯ್ಬಿಟ್ಟಿದ್ದಾನೆ. ಅಲ್ಲದೇ, ಸಿಬಿಐ ಕಚೇರಿ ಸಮೀಪದ ಎಸ್ಬಿಐ ಬಳಿಯಿರುವ ಅರ್ನವ್ ಗೌಡನ ಮನೆಗೆ ಡ್ರಗ್ ಸರಬರಜಾಗುತ್ತಿದ್ದ ಬಗ್ಗೆ ಸುಳಿವು ನೀಡಿದ್ದಾನೆ.
ಚಾಮರಾಜಪೇಟೆಯಲ್ಲಿ ವಿದೇಶಿ ಪೋಸ್ಟ್ ಆಫೀಸ್ ಇದ್ದು, ಪಾರ್ಸೆಲ್ ತಡವಾದರೆ ಪ್ರಮುಖ ಆರೋಪಿ ಹೇಮಂತ್ ಖುದ್ದು ಪೋಸ್ಟ್ ಆಫೀಸ್ಗೆ ಹೋಗಿ ವಿಚಾರಿಸುತ್ತಿದ್ದ. ಇದರಿಂದ ಅನುಮಾನಗೊಂಡಿದ್ದ ಕಸ್ಟಮ್ ಅಧಿಕಾರಿಗಳು ನವೆಂಬರ್ 4 ರಂದು ಬಂದಿದ್ದ ಪೋಸ್ಟ್ ತೆರೆದು ಪರಿಶೀಲನೆ ನಡೆಸಿದ್ದರು. ಈ ವೇಳೆ, 500 ಗ್ರಾಂ ಹೈಡ್ರೋ ಗಾಂಜಾ ಪತ್ತೆಯಾಗಿದೆ. ಕೂಡಲೇ ಸಿಸಿಬಿಗೆ ಮಾಹಿತಿ ನೀಡಿ, ನಂತರ ಪಾರ್ಸೆಲ್ ಬಂದಿದೆ ಎಂದು ಆರೋಪಿ ಹೇಮಂತ್ಗೆ ಮಾಹಿತಿ ನೀಡಿದ್ದರು. ಈ ವೇಳೆ, ಆರೋಪಿಗಳಾದ ಹೇಮಂತ್ ಮತ್ತು ಸುಜಯ್ ಸ್ಥಳಕ್ಕೆ ಬಂದಿದ್ದರು. ಸುಜಯ್ನ್ನು ಹಿಡಿಯುವಾಗ, ಹೇಮಂತ್ ತಪ್ಪಿಸಿಕೊಂಡಿದ್ದ. ಬಳಿಕ ಆರೋಪಿಗೆ ಮಾಜಿ ಸಚಿವರ ಪುತ್ರ ದರ್ಶನ್ ಲಮಾಣಿ ತಪ್ಪಿಸಿಕೊಳ್ಳಲು ಸಹಾಯ ಮಾಡಿರುವ ವಿಚಾರ ಗೊತ್ತಾಗಿತ್ತು.
ಡಾರ್ಕ್ ವೆಬ್ ಮೂಲಕ ಡ್ರಗ್ಸ್ ದಂಧೆ:
ಡಾರ್ಕ್ ವೆಬ್ ಒಂದು ಸಾಮಾಜಿಕ ಮಾಧ್ಯಮವಾಗಿದ್ದು, ಡ್ರಗ್ಸ್, ವೇಶ್ಯಾವಾಟಿಕೆ, ಹವಾಲಾ ಹೀಗೆ ಹಲವು ಅಕ್ರಮ ಚಟುವಟಿಕೆಗಳು ಇಲ್ಲಿ ನಡೆಯುತ್ತದೆ. ಡಾರ್ಕ್ ವೆಬ್ಗೆ ಲಾಗಿನ್ ಆಗುವ ವ್ಯಕ್ತಿಯ ಐಪಿ ಅಡ್ರೆಸ್ ಹುಡುಕಲು ಕಷ್ಟವಾಗುತ್ತದೆ. ಹೀಗಾಗಿ, ವಿದೇಶಿ ಡ್ರಗ್ ಪೆಡ್ಲರ್ಗಳನ್ನ ಸಂಪರ್ಕಿಸಿ ಪೋಸ್ಟ್ ಮೂಲಕ ಡ್ರಗ್ ತರಿಸುತ್ತಿದ್ದರು. ಪಾರ್ಸಲ್ ಟ್ರ್ಯಾಕ್ ನಂಬರ್ ಇಟ್ಟುಕೊಂಡು ಸಂಬಂಧಪಟ್ಟ ವಿದೇಶಿ ಅಂಚೆ ಕಚೇರಿಗೆ ಹೋಗಿ ಪಾರ್ಸೆಲ್ ಪಡೆಯುತ್ತಿದ್ದರು. ಒಂದು ವೇಳೆ, ಪೊಲೀಸರು ಆರೋಪಿಗಳು ಕೊಟ್ಟ ಅಡ್ರೆಸ್ಗೆ ಹೋದರೆ, ವಿಳಾಸ ಇರಬಾರದೆಂದು ಪ್ಲಾನ್ ಮಾಡಿ, ಪಾರ್ಸಲ್ ಬಂದ ತಕ್ಷಣ ಬಿಟ್ ಕಾಯಿನ್ ಮೂಲಕ ಹಣ ಪಾವತಿಸುತ್ತಿದ್ದರು.
ಸದ್ಯ, ಮಾಜಿ ಸಚಿವರ ಪುತ್ರನ ವಿಚಾರಣೆ ಮುಂದುವರೆದಿದೆ. ದರ್ಶನ್ ತನ್ನ ಸಹೋದರಿ ಮನೆಯಲ್ಲಿ ನೆಲೆಸಿದ್ದ ವಿಚಾರ ಬೆಳಕಿಗೆ ಬಂದಿದೆ. ಪದವಿ ಮುಗಿಸಿ ಎಲ್ಎಲ್ಬಿಗೆ ಸೇರಲು ದರ್ಶನ್ ಅರ್ಜಿ ಹಾಕಿದ್ದ. ಆದರೆ, ಕೊರೊನಾ ಕಾರಣದಿಂದ ತರಗತಿಗಳು ನಡೆಯದ ಹಿನ್ನೆಲೆ, ಡ್ರಗ್ಸ್ ದಂಧೆಯಲ್ಲಿ ಭಾಗಿಯಾಗಿದ್ದ ಎಂದು ತಿಳಿದು ಬಂದಿದೆ. ಬಂಧಿತರಾಗಿರುವ ಆರೋಪಿಗಳಿಂದ ಮತ್ತಷ್ಟು ಮಾಹಿತಿ ಕಲೆ ಹಾಕಿ ತಲೆಮರೆಸಿಕೊಂಡಿರುವ ಆರೋಪಿಗಳ ಬಂಧನಕ್ಕೆ ಮುಂದಾಗಿದ್ದಾರೆ.
