ಬೆಂಗಳೂರು(ಬೊಮ್ಮನಹಳ್ಳಿ) : ಪುರಾತನ ದೇವಾಲಯ ತೆರೆವಿಗೆ ಬೊಮ್ಮನಹಳ್ಳಿಯಲ್ಲಿ ಪರ-ವಿರೋಧ ವ್ಯಕ್ತವಾಗಿದೆ. ಮೆಟ್ರೋ ವಿಸ್ತರಣೆಗಾಗಿ ಗಾರ್ವೆಬಾವಿ ಪಾಳ್ಯದಲ್ಲಿರುವ ಆಂಜನೇಯ ದೇವಾಲಯ ತೆರವಿಗೆ ಮೆಟ್ರೋ ಸಂಸ್ಥೆ ಗುರುತಿಸಿದಾಗಿನಿಂದಲೂ ವಿರೋಧ ವ್ಯಕ್ತವಾಗುತ್ತಲೇ ಇತ್ತು. ಇದೀಗ ದೇಗುಲವನ್ನು ತೆರವುಗೊಳಿಸಲಾಗಿದೆ.
ಈ ನಡುವೆ ದೇವಾಲಯದ ಮುಂಭಾಗ ಮಾತ್ರ ತೆರವುಗೊಳಿಸಿ ಗರ್ಭಗುಡಿ ಉಳಿಸಿಕೊಳ್ಳುವ ಮಾತೂ ಕೇಳಿ ಬಂದಿತ್ತು. ದೇವಾಲಯ ತೆರವಿನ ಮಾತು ಕೇಳಿಬಂದಾಗಲಂತೂ ಭಕ್ತ ಸಮೂಹ ಬೀದಿಗಿಳಿದು ಹೋರಾಟ ಮಾಡಿತ್ತು. ಈ ನಡುವೆ ದೇವಾಲಯ ಹೋರಾಟ ಸಮಿತಿಯ ಬಾಯಿ ಮಾತಿಗೆ ತುಸು ಬೆಂಬಲ ವ್ಯಕ್ತಪಡಿಸಿದ ಮೆಟ್ರೋ ಇಂದು ದೇವಾಲಯ ಕೆಡವಿ ವಿಗ್ರಹವನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಿದೆ.
ಹೊಸೂರು ಮುಖ್ಯರಸ್ತೆಯ ಬೊಮ್ಮಸಂದ್ರಕ್ಕೆ ಸಂಪರ್ಕ ಕಲ್ಪಿಸುತ್ತಿರುವ ಮೆಟ್ರೋ ಯೋಜನೆಯ ಕಾಮಗಾರಿ ಚುರುಕುಗೊಂಡಿದ್ದು, ಮೆಟ್ರೋ ಪಿಲ್ಲರ್ಗಳ ಸಮೀಪದಲ್ಲೆ ದೇವಾಲಯವಿರುವುದರಿಂದ ಕಾಮಗಾರಿಗೆ ತೊಡಕಾದ ಹಿನ್ನೆಲೆ ಇಂದು ತೆರವುಗೊಳಿಸಲಾಗಿದೆ.
ಇದಕ್ಕೆ ಪರಿಹಾರಾರ್ಥವಾಗಿ ಒಂದೂವರೆ ಕೋಟಿ ರೂ. ಗಳನ್ನು ದೇಗುಲದ ಟ್ರಸ್ಟ್ಗೆ ನೀಡಲಾಗಿದೆ. ಇತ್ತ ದೇವಾಲಯವನ್ನು ಮೆಟ್ರೋ ತೆರವುಗೊಳಿಸುತ್ತಿರುವ ಸ್ಥಳಕ್ಕೆ ಆಗಮಿಸಿದ ಕಾಳಿ ಸ್ವಾಮಿ ದೇಗುಲ ತೆರವಿಗೆ ವಿರೋಧ ವ್ಯಕ್ತಪಡಿಸಿದರು. ಪುರಾತನ ದೇವಾಲಯ ತೆರವಿನಿಂದ ಗ್ರಾಮಕ್ಕೆ ಕೆಡುಕಾದರೆ ಹೊಣೆ ಯಾರೆಂದು ಆಕ್ರೋಶ ವ್ಯಕ್ತಪಡಿಸಿದರು.
ತೆರವುಗೊಳ್ಳುತ್ತಿರುವ ದೇವಾಲಯದ ಸುತ್ತ ಪೊಲೀಸ್ ಸರ್ಪಗಾವಲಿದ್ದು, ಮೂಲ ದೇವರ ಮೂರ್ತಿಗಳನ್ನ ಆಡಳಿತ ಮಂಡಳಿಯೇ ಸ್ಥಳಾಂತರಿಸಿದೆ.
